Azərbaycan ilə Çex Respublikası arasında müdafiə sənayesi sahəsində əməkdaşlıq - ŞƏRH

Azərbaycan Respublikası ilə Çex Respublikası arasında münasibətlər qarşılıqlı hörmət və tərəfdaşlıq prinsipləri əsasında inkişaf edərək bu gün çoxşaxəli əməkdaşlıq modelinə çevrilmişdir. Siyasi, iqtisadi və humanitar sahələrdə əldə olunan nailiyyətlər fonunda müdafiə sənayesi istiqaməti də getdikcə daha çox əhəmiyyət kəsb edir və iki ölkə arasında strateji əməkdaşlığın vacib komponentlərindən biri kimi çıxış edir.

1992-ci ildə Çex Respublikasının Azərbaycanın müstəqilliyini tanıması və 1993-cü ildə diplomatik münasibətlərin qurulması ilə əsası qoyulan əlaqələr zamanla dərinləşmiş, xüsusilə 2015-ci ildə imzalanmış Strateji Tərəfdaşlıq haqqında Birgə Bəyannamə münasibətlərin yeni mərhələyə keçidini təmin etmişdir. Bu sənəd yalnız siyasi və iqtisadi deyil, həm də təhlükəsizlik və müdafiə sahələrində əməkdaşlıq üçün mühüm çərçivə yaratmışdır. Müasir dövrdə qlobal və regional təhlükəsizlik çağırışları fonunda belə əməkdaşlığın aktuallığı daha da artır.

Çex Respublikası Avropada inkişaf etmiş müdafiə sənayesi infrastrukturu, texnoloji imkanları və zəngin təcrübəsi ilə seçilir. Hərbi texnikanın istehsalı, modernizasiyası və innovativ həllərin tətbiqi sahəsində Çexiyanın imkanları Azərbaycan üçün mühüm tərəfdaşlıq perspektivləri yaradır. Azərbaycan isə öz növbəsində son illərdə müdafiə sənayesini sürətlə inkişaf etdirərək yerli istehsal gücünü artırmaq, ordunun maddi-texniki bazasını müasirləşdirmək və beynəlxalq əməkdaşlığı genişləndirmək istiqamətində mühüm addımlar atmışdır.

İki ölkə arasında mövcud olan iqtisadi əməkdaşlıq mexanizmləri, o cümlədən 2011-ci ildə yaradılmış Hökumətlərarası Qarışıq Komissiya müdafiə sənayesi sahəsində də əməkdaşlığın genişləndirilməsi üçün əlverişli platforma rolunu oynayır. Komissiya çərçivəsində həyata keçirilən görüşlər və müzakirələr müxtəlif sahələrdə olduğu kimi, müdafiə texnologiyaları və sənaye kooperasiyası istiqamətində də yeni imkanların araşdırılmasına şərait yaradır.

Bundan əlavə, dövlət başçıları və yüksək səviyyəli nümayəndə heyətlərinin qarşılıqlı səfərləri, xarici işlər nazirlərinin mütəmadi görüşləri və parlamentlərarası əlaqələr iki ölkə arasında etimad mühitini daha da gücləndirir. Bu isə müdafiə sənayesi kimi həssas və strateji sahədə əməkdaşlığın inkişafı üçün mühüm şərtdir. Qarşılıqlı etimad və siyasi iradə olmadan bu cür əməkdaşlığın dərinləşməsi mümkün deyil.

Müdafiə sənayesi sahəsində əməkdaşlıq yalnız hərbi texnika və avadanlıqların alınması ilə məhdudlaşmır. Bu sahə həm də texnologiya transferi, mütəxəssis hazırlığı, birgə istehsal layihələri və innovativ həllərin tətbiqini əhatə edir. Belə əməkdaşlıq hər iki ölkənin sənaye potensialının inkişafına, yeni iş yerlərinin yaradılmasına və elmi-texniki tərəqqinin sürətlənməsinə töhfə verir.

Azərbaycan ilə Çex Respublikası arasında müdafiə sənayesi sahəsində əməkdaşlıq ümumi strateji tərəfdaşlığın mühüm istiqamətlərindən biri kimi çıxış edir. Mövcud siyasi dialoq, iqtisadi əlaqələr və institusional mexanizmlər bu sahədə əməkdaşlığın daha da genişlənməsi üçün möhkəm zəmin yaradır. Gələcəkdə bu istiqamətdə həyata keçiriləcək birgə layihələr iki ölkənin təhlükəsizlik potensialının güclənməsinə, regional sabitliyin möhkəmlənməsinə və qarşılıqlı münasibətlərin daha da dərinləşməsinə xidmət edəcəkdir.

Pərviz Hüseynzadə

YAP Babək rayon təşkilatının əməkdaşı