Bayrağımız qürur mənbəyimizdir - ŞƏRH

Azərbaycan idmanı son illərdə dinamik inkişaf edərək beynəlxalq arenada böyük uğurlara imza atıb. Xüsusilə güləş sahəsində qazanılan nailiyyətlər ölkəmizin idman tarixində mühüm yer tutur. Avropa çempionatında komanda hesabında əldə olunan çempionluq, müxtəlif çəki dərəcələrində qazanılan qızıl, gümüş və bürünc medallar Azərbaycan güləşçilərinin gücünü və peşəkarlığını bir daha nümayiş etdirib.

Güləşçilərimizin bu möhtəşəm çıxışı nəticəsində Azərbaycan komandası Avropanın ən güclü kollektivlərindən biri olduğunu təsdiqləyib. Ayrı-ayrı idmançılarımızın final görüşlərində göstərdiyi əzmkarlıq, çətin rəqiblər üzərində qələbələr və son saniyələrə qədər davam edən mübarizə xüsusilə yadda qalıb. Bu uğurlar Azərbaycan güləş məktəbinin sistemli inkişafının nəticəsidir.

Çempion güləşçilərlə keçirilən görüşdə ölkə başçısı onların nailiyyətlərini yüksək qiymətləndirərək bildirib: “Sizin qələbələriniz Azərbaycan xalqını sevindirir, ölkəmizin beynəlxalq nüfuzunu artırır.” Prezident vurğulayıb ki, bu uğurlar böyük zəhmətin bəhrəsidir: “Bu nəticələr uzun illərin zəhmətinin, əzmkarlığın və peşəkarlığın nəticəsidir.”

Dövlət başçısı xüsusi olaraq qeyd edib: “Azərbaycan bayrağı qaldırılanda hər bir vətəndaşımız qürur hissi keçirir.” Məhz güləşçilərimizin qazandığı medallar sayəsində bu bayraq dəfələrlə Avropa arenalarında ucaldılıb, dövlət himnimiz səsləndirilib.

Azərbaycan güləş məktəbi bu gün dünya miqyasında öz sözünü deyən aparıcı məktəblərdən biridir. Güclü məşqçi heyəti, müasir hazırlıq sistemi və dövlət dəstəyi idmançılarımızın uğurlarının əsasını təşkil edir. Prezident çıxışında da bu məsələyə toxunaraq qeyd edib: “Azərbaycanda idmanın inkişafı dövlət siyasətinin əsas istiqamətlərindən biridir və bu siyasət ardıcıl şəkildə davam etdirilir.”

Ümumilikdə ölkəmizdə idmanın inkişafı geniş vüsət alıb. Müasir idman infrastrukturu yaradılıb, beynəlxalq yarışlar təşkil olunur və idmançılara hərtərəfli dəstək göstərilir. Dövlət başçısının sözləri ilə desək: “Biz idmanın bütün növlərinin inkişafına böyük önəm veririk.”

Son illərdə qadın güləşçilərimiz və ümumilikdə qadın idmançılarımız da mühüm uğurlar qazanırlar. Onların beynəlxalq yarışlarda qazandıqları medallar Azərbaycan qadınının gücünü və iradəsini nümayiş etdirir. Prezident bu uğurları yüksək qiymətləndirərək bildirib: “Qadın idmançılarımızın nailiyyətləri bizi xüsusilə sevindirir.”

Tanınmış güləşçilərimiz və digər idmançılarımız cəmiyyətin diqqət mərkəzindədir. Onlar yalnız yarış meydanlarında deyil, gündəlik həyatda da gənclər üçün nümunədirlər. Dövlət başçısı qeyd edib: “Siz gənclər üçün örnəksiniz və sizin uğurlarınız yeni nəsli idmana cəlb edir.”

Bu gün Azərbaycan idmanı yeni zirvələrə doğru inamla irəliləyir. Güləşçilərimizin qazandığı hər medal, qaldırılan hər bayraq xalqımızın qürur mənbəyinə çevrilir. Çünki o bayraq ucalanda, bütün Azərbaycan qürur duyur.

Sevda Quluyeva

YAP Kəngərli rayon təşkilatının sədri