Azərbaycan güləşçilərinin Avropa zəfəri - ŞƏRH

Prezident İlham Əliyev tərəfindən Avropa çempionatında komanda hesabında çempion olmuş güləşçilərin qəbul edilməsi Azərbaycan idman tarixində əlamətdar hadisələrdən biri kimi yadda qaldı. Bu görüş yalnız əldə olunmuş nailiyyətlərin qeyd edilməsi deyil, eyni zamanda ölkədə idmanın inkişafına verilən yüksək dəyərin və göstərilən dövlət qayğısının bariz nümunəsidir.

Görüş zamanı dövlət başçısı idmançıları səmimi şəkildə təbrik edərək onların qazandığı uğurların bütün xalq üçün qürur mənbəyi olduğunu vurğuladı. Bildirildi ki, Azərbaycan idmanı son illərdə böyük inkişaf yolu keçib və bu inkişaf beynəlxalq arenada qazanılan qələbələrdə öz əksini tapır. Həm Olimpiya Oyunlarında, həm də dünya və Avropa çempionatlarında idmançılarımız ölkəmizi layiqincə təmsil edir, üçrəngli bayrağımızı yüksəklərə qaldırırlar.

Prezident çıxışında qeyd etdi ki, idmanda qələbə ilə yanaşı məğlubiyyətlər də qaçılmazdır. Lakin əsas məsələ idmançılarda olan güclü iradə, qələbə əzmi və daim irəli getmək istəyi ilə bağlıdır. Azərbaycan idmançılarının məhz bu keyfiyyətlərə sahib olması onların uğurlarını şərtləndirən əsas amillərdən biridir. Bu xüsusiyyətlər isə bütövlükdə ölkəmizin inkişafını və xalqımızın ruh yüksəkliyini əks etdirir.

Görüşdə həmçinin vurğulandı ki, idmanın inkişafı dövlət siyasətinin prioritet istiqamətlərindən biridir. Uzun illər ərzində aparılan məqsədyönlü siyasət nəticəsində ölkədə müasir idman infrastrukturu yaradılıb, gənclərin idmana marağı əhəmiyyətli dərəcədə artıb. Bu gün Azərbaycan qalib dövlət və qalib xalq kimi yaşayır və əldə olunan idman uğurları da bu qələbə ruhunun ayrılmaz hissəsidir.

Dövlət başçısı idmançılarla görüşlərinin müntəzəm xarakter daşıdığını qeyd edərək bildirdi ki, uzun illər ərzində Azərbaycan idmanının inkişafını yaxından izləyib. Bu müddət ərzində bir neçə nəsil idmançı yetişib və hər yeni nəsil əvvəlkilərin uğurlarını davam etdirərək daha böyük zirvələr fəth edib. Bu isə idmanın dayanıqlı inkişafının göstəricisidir.

Güləşçilərin Avropa çempionatında komanda hesabında çempion olması da bu inkişafın məntiqi nəticəsi kimi dəyərləndirildi. Qeyd olundu ki, Azərbaycan Güləş Federasiyası və digər idman qurumları öz fəaliyyətlərini düzgün istiqamətdə quraraq gənc istedadların üzə çıxmasına və peşəkar idmançı kimi formalaşmasına geniş imkan yaradırlar. Bu sistemli yanaşma nəticəsində Azərbaycan güləşi dünya miqyasında öz sözünü deməyə davam edir.

Sonda bir daha vurğulandı ki, Azərbaycan xalqı idmançıların uğurlarını böyük sevinc hissi ilə qarşılayır. Gələcəkdə də federasiyaların və idman qurumlarının fəaliyyətini daha da təkmilləşdirərək yeni nailiyyətlərə imza atacağına əminlik ifadə olundu. Bu uğurlar isə ölkəmizin beynəlxalq nüfuzunun artmasına və gənc nəslin sağlam ruhda formalaşmasına xidmət edir.

Lalə Mədətova

YAP Kəngərli rayon təşkilatının məsləhətçisi