“Nə? Harada? Nə zaman?” intellektual yarış keçirilib -FOTOLAR

“Şəhərsalma və Memarlıq İli” çərçivəsində Ümummilli Lideri Heydər Əliyevin anadan olmasının 103-cü ildönümü münasibətilə Yeni Azərbaycan Partiyası (YAP) Xocavənd rayon təşkilatı və Xocavənd rayon İcra Hakimiyyətinin birgə təşkilatçılığı ilə rayonun idarə, müəssisə və təşkilatları arasında “Nə? Harada? Nə zaman?” intellektual yarışı keçirilib.

Beyləqan rayon Xaçınabad kənd 4 saylı tam orta ümüumtəhsil məktəbində baş tutan tədbirdə əvvəlcə partiyanın yaradıcısı, Azərbaycan dövlətinin banisi Ulu Öndər Heydər Əliyevin abidəsini ziyarət olunub.

Azərbaycan Respublikasının Dövlət Himninin səsləndirilməsi ilə açıq elan olunan tədbirdə Ümummilli Lider Heydər Əliyevin, ölkəmizin ərazi bütövlüyü uğrunda canlarını fəda etmiş şəhidlərimizin əziz xatirələri bir dəqiqəlik sükutla yad olunub.

Tədbiri giriş sözü ilə açan YAP Xocavənd rayon təşkilatının sədri Vüsal Hüseynov qeyd etdi ki, Ulu Öndər Heydər Əliyev hər zaman vurğulayırdı ki, Azərbaycanın gələcəyi yüksək bilikli və savadlı gənclərin çiyinləri üzərində ucalacaqdır. Onun zəngin dövlətçilik təcrübəsi və xalqımız qarşısındakı misilsiz xidmətləri bu gün hər birimiz üçün ən böyük örnəkdir. Bu yarış sadəcə bir yarış deyil, həm də Ulu Öndərin dahi şəxsiyyətinə və onun bizə miras qoyduğu milli dəyərlərə olan sonsuz ehtiramımızın ifadəsidir. V.Hüseynov çıxışın sonunda hər bir komandaya gərgin və maraqlı mübarizədə uğurlar arzuladı.

​Tədbirdə Xocavənd rayon İcra Hakimiyyətinin əməkdaşı Nicat Şirinov və digər çıxış edənlər Ulu Öndər Heydər Əliyevin zəngin və mənalı həyat yolundan, çoxşaxəli fəaliyyətindən, xalqın təkidli tələbi ilə ikinci dəfə hakimiyyətə qayıdışından və Azərbaycan dövlətçiliyinin qorunub saxlanılması və möhkəmləndirilməsi istiqamətində göstərdiyi misilsiz xidmətlərdən bəhs ediblər.

Daha sonra “Nə? Harada? Nə zaman?” intellektual yarışına start verilib. Gərgin və maraqlı mübarizə şəraitində keçən bilik yarışının sonunda qaliblər diplom və hədiyyələrlə təltif edildi.