Azərbaycan güləşində növbəti zəfər - ŞƏRH

Azərbaycan Respublikasının Prezidenti İlham Əliyev Avropa çempionatında komanda hesabında çempionluq qazanmış güləşçilərlə görüş keçirib. Görüşdə ölkəmizin idman sahəsində əldə etdiyi növbəti mühüm uğur yüksək qiymətləndirilib, bu nailiyyətin Azərbaycan güləş məktəbinin gücünü və davamlı inkişafını bir daha nümayiş etdirdiyi vurğulanıb.

Prezident çıxışında qeyd edib ki, beynəlxalq arenada əldə olunan bu cür qələbələr yalnız idman uğuru deyil, həm də ölkənin nüfuzunun artmasına xidmət edir. Azərbaycan güləşçilərinin Avropa çempionatında komanda hesabında birinci yeri tutması böyük zəhmətin, düzgün qurulmuş hazırlıq prosesinin və güclü iradənin nəticəsidir. Dövlət başçısı bildirib ki, bu qələbə bütün xalqımız tərəfindən böyük sevinc hissi ilə qarşılanır və idmançılarımızın qazandığı uğurlar gənc nəslə də örnək olur.
Görüş zamanı vurğulanıb ki, Azərbaycan güləşinin zəngin ənənələri bu gün də uğurla davam etdirilir. Ölkəmizdə idmana göstərilən dövlət qayğısı, müasir idman infrastrukturu və peşəkar məşqçi heyəti bu nailiyyətlərin əsasını təşkil edir. Xüsusilə diqqətə çatdırılıb ki, təcrübəli idmançılarla yanaşı, gənc güləşçilərin də yüksək nəticələr göstərməsi gələcək uğurlar üçün möhkəm zəmin yaradır.
Prezident federasiyanın fəaliyyətini yüksək qiymətləndirərək qeyd edib ki, idmançıların seçimi və hazırlanması prosesi düzgün istiqamətdə aparılır. Bu isə Azərbaycanın gələcəkdə də beynəlxalq yarışlarda uğurla təmsil olunacağına inam yaradır. Dövlət başçısı məşqçilərin əməyini xüsusi vurğulayaraq qeyd edib ki, idmançıların uğurunda məşqçilərin peşəkarlığı, onların düzgün istiqamətləndirilməsi və fədakar zəhməti mühüm rol oynayır. Bu baxımdan məşqçilərin fəaliyyəti dövlət tərəfindən daim dəstəklənir və onların əməyinə yüksək qiymət verilir.
İdman sahəsindəki uğurlar onu göstərir ki, gənc nəslin fiziki və mənəvi cəhətdən sağlam yetişməsini dövlətimiz daim diqqət mərkəzində saxlayır. Məhz bu diqqət və qayğı Azərbaycanın qarşıdakı illərdə idmanda daha böyük uğurlara imza atacağını deməyə əsas verir.

Məhərrəm Hacıyev
YAP Kəngərli rayon təşkilatının fəalı