Azərbaycan–İtaliya münasibətlərində yeni mərhələ - ŞƏRH

2026-cı il mayın 4-də Azərbaycan Respublikasının Prezidenti İlham Əliyev ilə İtaliya Respublikası Nazirlər Şurasının sədri Ciorcia Meloni arasında keçirilən görüş və birgə mətbuat bəyanatları iki ölkə arasında strateji tərəfdaşlığın yeni mərhələyə qədəm qoyduğunu bir daha nümayiş etdirdi. Sözügedən səfər yalnız diplomatik protokol xarakteri daşımayıb, həm də Azərbaycan–İtaliya əlaqələrinin dərinləşdirilməsi baxımından mühüm siyasi və iqtisadi əhəmiyyət kəsb etmişdir.

Prezident İlham Əliyev bəyanatında vurğulamışdır ki, İtaliya Azərbaycanın əsas ticarət tərəfdaşıdır və iki ölkə arasında əməkdaşlıq çoxşaxəli xarakter daşıyır. Xüsusilə enerji sahəsində formalaşmış güclü tərəfdaşlıq münasibətləri bu əməkdaşlığın əsas sütunlarından biridir. Azərbaycanın neft və qaz ixracında İtaliya bazarının xüsusi yer tutması bu münasibətlərin strateji mahiyyətini daha da gücləndirir.

Dövlət başçısı həmçinin qeyd etmişdir ki, Azərbaycan və İtaliya artıq uzun illərdir strateji tərəfdaş kimi fəaliyyət göstərir və bu tərəfdaşlıq qarşılıqlı hörmət, etimad və ortaq maraqlar üzərində qurulub. Bu baxımdan, Ciorcia Meloninin Azərbaycana səfəri əlaqələrin daha da möhkəmlənməsi üçün mühüm addım kimi qiymətləndirilir.

İtaliya tərəfi də öz növbəsində Azərbaycanı mühüm tərəfdaş kimi dəyərləndirmişdir. Baş nazir Meloni çıxışında bildirmişdir ki, mövcud mürəkkəb beynəlxalq şəraitdə Azərbaycanla əməkdaşlıq xüsusi əhəmiyyət daşıyır və bu münasibətlər gələcəkdə daha da inkişaf edəcək.

Azərbaycan–İtaliya münasibətləri tarixi baxımdan da möhkəm təməllərə əsaslanır. Hər iki ölkə arasında diplomatik əlaqələr uzun müddətdir mövcuddur və tərəflər beynəlxalq təşkilatlar çərçivəsində də fəal əməkdaşlıq edirlər. Bu münasibətlər yalnız siyasi və iqtisadi sahələrlə məhdudlaşmır, eyni zamanda humanitar, təhsil və mədəniyyət sahələrini də əhatə edir. Məsələn, birgə layihələr, o cümlədən ali təhsil sahəsində həyata keçirilən təşəbbüslər əməkdaşlığın davamlılığını təmin edir.

Bununla yanaşı, Prezident İlham Əliyev çıxışında qeyd etmişdir ki, tərəflər regional və beynəlxalq məsələlər ətrafında da fikir mübadiləsi aparmış, xüsusilə regionda sülh və sabitliyin təmin olunması məsələlərinə toxunulmuşdur. İtaliya tərəfi Azərbaycanın sülh təşəbbüslərini dəstəklədiyini ifadə etmişdir.

2026-cı il mayın 4-də keçirilmiş görüş və səsləndirilmiş bəyanatlar göstərir ki, Azərbaycan ilə İtaliya arasında münasibətlər yüksələn xətt üzrə inkişaf edir və yeni əməkdaşlıq istiqamətləri formalaşır. Enerji təhlükəsizliyi, iqtisadi əməkdaşlıq, nəqliyyat-logistika və humanitar sahələr bu tərəfdaşlığın əsas prioritetlərini təşkil edir.

Prezident İlham Əliyevin bəyanatı fonunda demək olar ki, Azərbaycan–İtaliya əlaqələri təkcə iki ölkə üçün deyil, həm də daha geniş regional əməkdaşlıq baxımından strateji əhəmiyyət daşıyır. Bu münasibətlərin gələcəkdə daha da dərinləşəcəyi və qarşılıqlı faydalı əməkdaşlığın genişlənəcəyi gözlənilir.

Lalə Mədətova

YAP Kəngərli rayon təşkilatının məsləhətçisi