Azərbaycanın Avropa ilə yeni siyasi dialoq xətti - ŞƏRH

2026-cı il mayın 4-də Azərbaycan Respublikasının Prezidenti İlham Əliyev “Avropa Siyasi Birliyi Zirvə Toplantısı”nın 8-ci toplantısında videobağlantı formatında çıxış edərək, ölkəmizin regional və qlobal siyasətdə artan rolunu bir daha nümayiş etdirdi. Bu çıxış yalnız diplomatik jest deyil, həm də dəyişən dünya düzənində Azərbaycanın prinsipial mövqeyinin və strateji baxışının aydın ifadəsi idi.
Prezidentin çıxışında diqqət çəkən əsas məqamlardan biri Avropa ilə Azərbaycan arasında formalaşan qarşılıqlı etimad mühitinin möhkəmləndirilməsi idi. Dövlət başçısı vurğuladı ki, Azərbaycan Avropanın enerji təhlükəsizliyində etibarlı tərəfdaş kimi çıxış edir və bu əməkdaşlıq artıq yalnız enerji sahəsi ilə məhdudlaşmır. Xüsusilə qeyd olundu ki, Azərbaycanın təşəbbüsləri nəticəsində həyata keçirilən iri layihələr Avropa ilə region arasında strateji körpü rolunu oynayır.
Bu kontekstdə Prezident İlham Əliyev Azərbaycanın çoxtərəfli əməkdaşlığa açıq olduğunu və beynəlxalq platformalarda konstruktiv dialoqa üstünlük verdiyini bildirdi. Onun sözlərinə görə, müasir beynəlxalq münasibətlər sistemində qarşılıqlı hörmət və daxili işlərə qarışmamaq prinsipləri əsas götürülməlidir. Bu yanaşma Azərbaycanın xarici siyasət kursunun dəyişməz xətti kimi təqdim edildi.
Çıxışın mühüm istiqamətlərindən biri də regional təhlükəsizlik və sülh məsələləri oldu. Prezident qeyd etdi ki, Cənubi Qafqazda dayanıqlı sülhün təmin olunması yalnız region ölkələrinin deyil, bütövlükdə Avropanın maraqlarına xidmət edir. Azərbaycanın təşəbbüs göstərdiyi sülh gündəliyinin beynəlxalq platformalarda dəstəklənməsi xüsusi vurğulandı. Bu, ölkəmizin sülhə sadiqliyinin və məsuliyyətli aktor kimi çıxış etdiyinin göstəricisi kimi dəyərləndirildi.
Prezident İlham Əliyev, həmçinin nəqliyyat və logistika imkanlarının genişləndirilməsinin vacibliyinə toxundu. Azərbaycanın yerləşdiyi coğrafi mövqenin üstünlüklərindən bəhs edən dövlət başçısı, ölkənin Şərq ilə Qərb arasında əsas tranzit mərkəzlərdən birinə çevrildiyini diqqətə çatdırdı. Bu baxımdan Azərbaycanın həyata keçirdiyi layihələrin Avropa üçün alternativ və etibarlı marşrutlar yaratdığı qeyd olundu.
Videobağlantı formatında olsa da, Prezident İlham Əliyevin çıxışı siyasi məzmun və mesaj baxımından olduqca təsirli idi. O, Azərbaycanın müstəqil siyasət yürüdən, beynəlxalq hüquqa əsaslanan mövqeyini bir daha beynəlxalq ictimaiyyətə çatdırdı. Bu çıxış, həm də ölkəmizin qlobal siyasi platformalarda fəal iştirakının və təşəbbüskar rolunun göstəricisi kimi qiymətləndirilə bilər.
Qeyd edək ki, 8-ci “Avropa Siyasi Birliyi” Zirvə toplantısında səsləndirilən fikirlər Azərbaycanın Avropa ilə münasibətlərində yeni mərhələnin konturlarını cızdı. Prezident İlham Əliyevin çıxışı bir daha sübut etdi ki, Azərbaycan yalnız regionda deyil, daha geniş coğrafiyada sabitlik, əməkdaşlıq və inkişafın təşviqində mühüm rol oynayan aktordur. Bu isə ölkəmizin beynəlxalq nüfuzunun artmasının və strateji tərəfdaşlıqlarının genişlənməsinin bariz göstəricisidir.

Gündüz Bayramov

YAP Samux rayon təşkilatının sədri