Bizim siyasi əlaqələrimiz ən yüksək səviyyədədir - ŞƏRH

Müasir beynəlxalq münasibətlər sistemində müxtəlif geosiyasi və iqtisadi səbəblərdən dövlətlər arasında ixtilafların və gərginliklərin artdığı bir dövrdə Azərbaycan balanslı və müstəqil siyasəti ilə seçilir. Ölkəmiz hər hansı qütbdə təmsil olunmaqdan daha çox, qlobal əməkdaşlığın təşviqi, sülhün möhkəmləndirilməsi və qarşıdurmaların aradan qaldırılması istiqamətində fəal rol oynayır.
Bu siyasətin nəticəsi olaraq Azərbaycanın beynəlxalq nüfuzu durmadan yüksəlir, bir çox dövlətlər rəsmi Bakı ilə əlaqələrin inkişafına xüsusi önəm verir. Dünya liderlərinin Azərbaycan Prezidenti İlham Əliyev ilə sıx dialoqa can atmaları ölkəmizin ortaya qoyduğu siyasi iradənin və həyata keçirdiyi strateji xəttin uğurunu təsdiqləyir.
Bu kontekstdə Azərbaycan ilə İtaliya arasında münasibətlər xüsusi əhəmiyyət kəsb edir. Son illərdə bu əlaqələr dinamik inkişaf edərək strateji tərəfdaşlıq səviyyəsinə yüksəlib. Əməkdaşlıq təkcə siyasi sahəni deyil, enerji, iqtisadiyyat, hərbi-texniki, mədəniyyət və təhsil istiqamətlərini də əhatə edir.
İtaliya Nazirlər Şurasının Sədri Ciorcia Meloninin Azərbaycana rəsmi səfəri iki ölkə arasında münasibətlərin yüksək səviyyədə olduğunu bir daha nümayiş etdirdi. Liderlər arasında formalaşmış qarşılıqlı etimada əsaslanan dialoq əməkdaşlığın əsas hərəkətverici qüvvəsidir. İtaliya Azərbaycanın Avropadakı ilk strateji tərəfdaşlarından biri kimi çıxış edir və bu fakt həm siyasi bəyanatlar, həm də real layihələrlə təsdiqlənir.
2020-ci ildə Prezident İlham Əliyevin İtaliyaya səfəri münasibətlərdə yeni mərhələnin başlanğıcını qoydu. Sonrakı dövrdə müxtəlif beynəlxalq platformalarda keçirilən görüşlər bu dialoqu daha da möhkəmləndirdi. Xüsusilə Ciorcia Meloninin İrəvanda keçirilən beynəlxalq tədbirdən dərhal sonra Bakıya səfər etməsi rəsmi Romanın Azərbaycanla tərəfdaşlığa verdiyi yüksək dəyərin göstəricisidir.
Enerji sahəsində əməkdaşlıq iki ölkə münasibətlərinin əsas sütunlarından biridir. Azərbaycan Avropanın enerji təhlükəsizliyində mühüm rol oynayan etibarlı tərəfdaşdır. Cənub qaz dəhlizi vasitəsilə Azərbaycan qazının Avropaya, xüsusilə İtaliyaya nəqli bu ölkənin enerji siyasətində strateji əhəmiyyət daşıyır.
Hazırda Azərbaycan İtaliyanın əsas qaz təchizatçılarından biridir. Təkcə 2025-ci ildə ölkəmiz bu ölkəyə 10 milyard kubmetr qaz ixrac edib. Ümumilikdə isə ixrac həcmi 50 milyard kubmetrə yaxınlaşıb. Bu fakt Azərbaycanın Avropanın enerji xəritəsində mühüm oyunçuya çevrildiyini göstərir.
İqtisadi sahədə də əməkdaşlıq genişlənməkdədir. Bu gün Azərbaycanda 130-a yaxın İtaliya şirkəti fəaliyyət göstərir. Xüsusilə işğaldan azad olunmuş ərazilərdə həyata keçirilən bərpa və yenidənqurma layihələri İtaliya biznesi üçün yeni imkanlar açır. Artıq bu ərazilərdə İtaliya şirkətləri tərəfindən onlarla layihə icra olunub və bu proses davam edir.
Azərbaycanın coğrafi mövqeyi – Cənubi Qafqaz regionunda yerləşməsi Avropa ilə Asiya arasında mühüm nəqliyyat və logistika körpüsü rolunu oynayır. Bu amil İtaliya üçün yeni iqtisadi və geosiyasi imkanlar yaradır və onun regionda təsir imkanlarını genişləndirir.
Eyni zamanda, İtaliya Azərbaycanın Avropa İttifaqı ilə əlaqələrində mühüm tərəfdaş kimi çıxış edir. Bu əməkdaşlıq Azərbaycanın Avropa məkanına inteqrasiyasına və beynəlxalq mövqelərinin möhkəmlənməsinə töhfə verir.
Humanitar sahədə əməkdaşlıq da xüsusi əhəmiyyət daşıyır. ADA Universiteti nəzdində İtaliya ali təhsil proqramlarının tətbiqi, eləcə də İtaliya-Azərbaycan Universitetinin fəaliyyəti iki ölkə arasında intellektual və mədəni əlaqələrin inkişafına xidmət edir. Hazırda bu proqramlar çərçivəsində yüzlərlə tələbə təhsil alır və gələcəkdə iki ölkə arasında təbii körpü rolunu oynayacaq.
Hərbi-texniki sahədə əməkdaşlıq da genişlənir. Azərbaycan Silahlı Qüvvələrinin modernləşdirilməsi çərçivəsində İtaliya ilə həyata keçirilən layihələr, o cümlədən hərbi texnika və aviasiya sahəsində əməkdaşlıq bu istiqamətdə konkret nəticələrdəndir.
Bütövlükdə, Azərbaycan–İtaliya münasibətləri çoxşaxəli və strateji xarakter daşıyır. Liderlər arasında qarşılıqlı etimada əsaslanan davamlı dialoq bütün sahələrdə əməkdaşlığın inkişafını təmin edir.
Baş nazir Ciorcia Meloninin Azərbaycana səfəri bu əlaqələrin daha da dərinləşəcəyinin göstəricisidir. Mövcud dinamika göstərir ki, yaxın gələcəkdə Azərbaycan–İtaliya əməkdaşlığı daha geniş miqyas alaraq regional və qlobal səviyyədə əhəmiyyətini artıracaq.

Şamo Qasımov
Yeni Azərbaycan Partiyası Laçın rayon təşkilatının sədr müavini