Dostluq və strateji tərəfdaşlıq münasibətləri

Azərbaycan Respublikası ilə İtaliya Respublikası arasında dostluq və strateji tərəfdaşlıq münasibətləri 1992-ci ildə diplomatik əlaqələrin qurulmasından bu günədək uğurla inkişaf edir. Mayın 4-də İtaliya Respublikası Nazirlər Şurasının sədri Ciorcia Meloninin Azərbaycan Respublikasına həyata keçirdiyi rəsmi səfər iki ölkə arasında mövcud münasibətlərin dinamik inkişafının mühüm mərhələsi kimi qiymətləndirilə bilər. Səfər çərçivəsində keçirilmiş görüşlər, aparılmış müzakirələr və verilmiş rəsmi bəyanatlar göstərir ki, Bakı və Roma arasında əməkdaşlıq artıq ənənəvi enerji tərəfdaşlığı çərçivəsini aşaraq daha geniş geosiyasi və iqtisadi məzmun kəsb etmişdir. Birgə bəyanatla çıxışı zamanı Dövlətimizin Başçısı cənab İlham Əliyev bildirdi ki, İtaliya şirkətlərinin Azərbaycanda uğurlu fəaliyyətinin çox böyük tarixi var. Hazırda İtaliyanın 130-a yaxın şirkəti Azərbaycanda fəaliyyət göstərir. İstəyirəm ki, onların sayı daha da çox olsun. O cümlədən işğaldan azad edilmiş Qarabağda və Şərqi Zəngəzurda İtaliya şirkətləri 23 layihə həyata keçirib və həyata keçirir. Xarici ölkələrin şirkətlərinə baxdıqda bu layihələrin icrasında İtaliya yenə qabaqcıl yerlərdədir. Təbii ki, bütün bu biznes, kommersiya, ticarət əlaqələri, şirkətlərin birgə fəaliyyəti və digər məsələlərlə yanaşı, biz bəlkə də ən vacib sahəni də unutmamışıq, o da təhsil sahəsidir. Ciorcia Meloninin Azərbaycana rəsmi səfəri Azərbaycan–İtaliya münasibətlərinin yüksələn xətt üzrə inkişaf etdiyini və yeni məzmunla zənginləşdiyini bir daha təsdiq edir. Bu münasibətlər yalnız ikitərəfli çərçivədə deyil, həm də daha geniş regional və qlobal miqyasda sabitlik, təhlükəsizlik və əməkdaşlığın möhkəmləndirilməsinə töhfə verir.

İtaliyanın Baş naziri Giorgia Meloninin səfəri çərçivəsində müzakirə olunan məsələlər yalnız mövcud sahələrlə məhdudlaşmayıb. Tərəflər iqtisadiyyatın şaxələndirilməsi, bərpa olunan enerji, nəqliyyat-logistika, sənaye, kənd təsərrüfatı və rəqəmsal texnologiyalar sahəsində əməkdaşlığın genişləndirilməsi imkanlarını da nəzərdən keçiriblər. Xüsusilə “yaşıl enerji” və innovasiya sahəsində əməkdaşlıq yeni prioritet istiqamətlər kimi ön plana çıxır. Azərbaycanın bu sahədə həyata keçirdiyi layihələr İtaliya şirkətləri üçün də yeni imkanlar yaradır.

Elməddin Abbasov,

YAP Ağdam rayon təşkilatının əməkdaşı