Göygöl rayonunda məktəblilərarası rəsm müsabiqəsi keçirilib - FOTO

Göygöl rayonunda “Şəhərsalma və Memarlıq İli” çərçivəsində Ulu Öndər Heydər Əliyevin 103 illiyinə həsr olunmuş məktəblilərarası rəsm müsabiqəsi keçirilib.

Yeni Azərbaycan Partiyası Göygöl rayon təşkilatı, Göygöl Rayon İcra Hakimiyyəti, Göygöl rayon Təhsil sektoru və Göygöl Gənclər Evinin birgə təşkilatçılığı ilə 06 May 2026-cı il tarixdə Ümummilli Lider Heydər Əliyevin 103 illiyi ilə bağlı tədbirlər planı çərçivəsində “Şuşasız Qarabağ, Qarabağsız Azırbaycan yoxdur” adlı rəsm müsabiqəsi keçirilib.
İlk öncə Ulu Öndər Heydər Əliyevin və torpaqlarımızın azadlığı uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad olunub.
Sonra YAP Göygöl Rayon Təşkilatının sədri Vüqar İsayev, İcra Hakimiyyəti başçısının müavini Kəmalə İbrahimova, Təhsil sektorunun müdiri Elnur Qasımov çıxış ediblər. Natiqlər dahi şəxsiyyət Ulu Öndər Heydər Əliyevin həyat və fəaliyyətindən, dövlətimiz və xalqımız qarşısındakı misilsiz xidmətlərindən danışıblar. Ümummilli Liderimizin Azərbaycanda müstəqil dövlətçiliyi yaradan və yaşadan Lider olduğunu vurğulanaraq, onun xidmətlərinin miqyasının ölçüyəgəlməzliyinin bugünkü Azərbaycanın reallıqlarında aydın ifadəsini tapdığı diqqətə çatdırılıb.
Sonra məktəblilərin əl işlərindən ibarət olan 48 rəsmə baxış keçirilib, qaliblər müəyyən olunub.
Qeyd edək ki, Göygöldə Ümummilli Lider Heydər Əliyevin 103 illiyinə həsr olunmuş silsilə tədbirlər davam edir və 08 May 2026-cı ildə keçiriləcək yekun tədbirində qaliblərin təltif olunması nəzərdə tutulur.