Azərbaycanın beynəlxalq nüfuzu - ŞƏRH

Prezident İlham Əliyevin 2026-cı il mayın 4-də “Avropa Siyasi Birliyi”nin 8-ci Zirvə toplantısında videobağlantı formatında çıxışı bir daha göstərdi ki, Azərbaycan regionda sülhün, əməkdaşlığın və qarşılıqlı etimadın möhkəmləndirilməsi istiqamətində ardıcıl və prinsipial siyasət həyata keçirir. Dövlət başçısının çıxışında səsləndirilən mühüm məqamlardan biri də Ermənistanın “Avropa Siyasi Birliyi”nin Zirvə görüşünün 2028-ci ildə Azərbaycanda keçirilməsini dəstəkləməsi oldu. Bu, təkcə diplomatik nəzakət deyil, həm də regionda yeni siyasi reallıqların formalaşdığını göstərən mühüm hadisədir.

Azərbaycan son illər beynəlxalq tədbirlərin keçirildiyi etibarlı məkan kimi böyük nüfuz qazanıb. Ölkəmiz müxtəlif beynəlxalq təşkilatların sammitlərinə, forumlara və yüksək səviyyəli görüşlərə uğurla ev sahibliyi edib. Prezident İlham Əliyevin rəhbərliyi ilə həyata keçirilən uğurlu xarici siyasət nəticəsində Azərbaycan artıq yalnız regionun deyil, Avrasiyanın mühüm siyasi və iqtisadi mərkəzlərindən birinə çevrilib. Bu baxımdan “Avropa Siyasi Birliyi”nin Zirvə toplantısının gələcəkdə Azərbaycanda keçirilməsi təşəbbüsü tamamilə qanunauyğun və məntiqli görünür.

Ermənistanın bu təşəbbüsü dəstəkləməsi xüsusi diqqət çəkir. Uzun illər ərzində regionda gərginliyin əsas mənbəyi olmuş Ermənistanın indi Azərbaycanın beynəlxalq nüfuzunu qəbul etməsi mühüm siyasi mesajdır. Bu dəstək onu göstərir ki, bölgədə yeni münasibətlər sistemi formalaşır və reallıqları artıq hər kəs qəbul etməyə başlayır. Azərbaycan öz gücü, siyasi iradəsi və diplomatik fəaliyyəti ilə regionda dayanıqlı sülhün əsas təşəbbüskarına çevrilib.

Prezident İlham Əliyevin çıxışında vurğuladığı kimi, Azərbaycan Avropa ilə əməkdaşlığa böyük önəm verir. Enerji təhlükəsizliyi, nəqliyyat-kommunikasiya layihələri, yaşıl enerji təşəbbüsləri və regional sabitlik məsələlərində ölkəmizin rolu getdikcə artır. Bu gün Avropa İttifaqı və digər beynəlxalq tərəfdaşlar Azərbaycanı etibarlı tərəfdaş kimi qiymətləndirirlər. Belə bir şəraitdə “Avropa Siyasi Birliyi”nin Zirvə görüşünün Bakıda keçirilməsi həm təşkilatın nüfuzuna, həm də regionda əməkdaşlığın inkişafına mühüm töhfə verə bilər.

Azərbaycanın beynəlxalq aləmdə artan nüfuzu ölkəmizin daxili sabitliyi, iqtisadi inkişafı və müstəqil siyasəti ilə birbaşa bağlıdır. Dövlətimizin həyata keçirdiyi balanslaşdırılmış siyasət nəticəsində Azərbaycan müxtəlif siyasi platformalar arasında körpü rolunu uğurla yerinə yetirir. Bakı artıq beynəlxalq dialoq məkanı kimi tanınır. Məhz buna görə də dünyanın müxtəlif ölkələri Azərbaycanın təşəbbüslərinə müsbət yanaşır və əməkdaşlıqda maraqlı olduqlarını nümayiş etdirirlər.

Bu gün regionda yaranmış yeni geosiyasi vəziyyət Azərbaycan həqiqətlərinin beynəlxalq səviyyədə qəbul edildiyini açıq şəkildə göstərir. Ermənistanın 2028-ci ildə Zirvə görüşünün Azərbaycanda keçirilməsini dəstəkləməsi də bu reallığın növbəti təsdiqidir. Bu, eyni zamanda Cənubi Qafqazda sülh gündəliyinin gücləndiyini və gələcəyə yönəlmiş əməkdaşlıq imkanlarının artdığını göstərən mühüm siyasi hadisədir.

Əminliklə demək olar ki, Prezident İlham Əliyevin uzaqgörən siyasəti nəticəsində Azərbaycan bundan sonra da beynəlxalq münasibətlər sistemində öz mövqeyini daha da möhkəmləndirəcək, regionda sülhün, təhlükəsizliyin və əməkdaşlığın əsas təminatçılarından biri olaraq qalacaq.

Mansur Quliyev,

YAP Ağdam rayon təşkilatının sədri