Bakıdan dünyaya verilən mühüm mesaj: dayanıqlı şəhərlər və gələcəyin urbanizasiya modeli

2026-cı il mayın 18-də Bakı daha bir mühüm beynəlxalq tədbirə ev sahibliyi etdi. Dünyanın müxtəlif ölkələrindən minlərlə nümayəndənin qatıldığı BMT-nin Ümumdünya Şəhərsalma Forumunun 13-cü Sessiyası Azərbaycanın beynəlxalq nüfuzunu bir daha nümayiş etdirdi. Azərbaycan Respublikasının Prezidenti İlham Əliyev forumun açılış mərasimində çıxış edərək şəhərsalma, dayanıqlı inkişaf, müasir urbanizasiya və postmünaqişə dövründə yenidənqurma siyasəti ilə bağlı mühüm mesajlar verdi.

Bakıda keçirilən WUF13 forumu təkcə şəhərsalma sahəsində beynəlxalq müzakirə platforması deyil, həm də Azərbaycanın inkişaf modelinin dünyaya təqdimatı baxımından böyük əhəmiyyət daşıyırdı. Prezident İlham Əliyev çıxışında qeyd etdi ki, forumda 182 ölkədən 45 mindən çox iştirakçının qeydiyyatdan keçməsi tədbirin qlobal miqyasını və Bakının beynəlxalq əməkdaşlıq məkanı kimi artan rolunu nümayiş etdirir. Dövlət başçısı bu tədbiri COP29-dan sonra Azərbaycanda keçirilən ikinci ən böyük beynəlxalq platforma kimi dəyərləndirdi.

Forumun əsas mövzusu “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” idi. Bu mövzu müasir dövrdə bütün dünya üçün olduqca aktualdır. Əhalinin sürətli urbanizasiyası, iqlim dəyişiklikləri, ekoloji problemlər, sosial bərabərsizlik və təhlükəsizlik məsələləri şəhərlərin gələcək inkişaf strategiyalarını yenidən düşünməyi zəruri edir. Prezident İlham Əliyevin çıxışında bu çağırışlara Azərbaycanın yanaşması xüsusi diqqət çəkdi.

Dövlət başçısı vurğuladı ki, Azərbaycan son illərdə şəhərsalma sahəsində mühüm uğurlar əldə edib. Xüsusilə işğaldan azad olunmuş ərazilərdə həyata keçirilən genişmiqyaslı yenidənqurma və bərpa layihələri artıq beynəlxalq səviyyədə maraq doğurur. Qarabağ və Şərqi Zəngəzurda “ağıllı şəhər” və “ağıllı kənd” konsepsiyalarının tətbiqi Azərbaycanın müasir urbanizasiya siyasətinin əsas istiqamətlərindən birinə çevrilib.

Prezident İlham Əliyev çıxışında Azərbaycanın uzun illər erməni işğalından əziyyət çəkdiyini, şəhər və kəndlərin tamamilə dağıdıldığını diqqətə çatdırdı. İşğaldan azad olunmuş ərazilərdə aparılan quruculuq işləri isə yeni inkişaf modelinin formalaşdırılmasına imkan yaradıb. Müasir infrastruktur, yaşıl enerji layihələri, ekoloji balansın qorunması və rəqəmsal idarəetmə prinsipləri həmin bölgələrdə həyata keçirilən siyasətin əsas elementləridir.

Bu gün Azərbaycan işğaldan azad olunmuş ərazilərdə dünyanın ən müasir şəhərsalma layihələrindən birini həyata keçirir. Yeni yollar, hava limanları, yaşayış kompleksləri, məktəblər, xəstəxanalar və sosial obyektlər sürətlə inşa edilir. Prezident İlham Əliyevin forumdakı çıxışı göstərdi ki, Azərbaycan yalnız dağıdılmış əraziləri bərpa etmir, eyni zamanda gələcəyin şəhərlərini qurur.

Forumda diqqət çəkən əsas məqamlardan biri də Azərbaycanın yaşıl inkişaf strategiyasına verdiyi önəm idi. Dövlət başçısı vurğuladı ki, şəhərsalma siyasəti yalnız tikinti və infrastruktur məsələləri ilə məhdudlaşmır. Əsas məqsəd insan üçün rahat, təhlükəsiz, ekoloji baxımdan sağlam və dayanıqlı yaşayış mühiti yaratmaqdır. Bu baxımdan yaşıl enerji, ekoloji təmiz nəqliyyat və rəqəmsal texnologiyalar mühüm rol oynayır.

Prezident İlham Əliyev çıxışında Bakının son illərdə keçdiyi inkişaf yolundan da bəhs etdi. Paytaxtın müasir şəhərə çevrilməsi, geniş abadlıq işləri, nəqliyyat infrastrukturunun yenilənməsi və yeni ictimai məkanların yaradılması Azərbaycanın urbanizasiya sahəsində qazandığı uğurların mühüm nümunəsidir. Bakı artıq beynəlxalq tədbirlərin keçirildiyi əsas qlobal platformalardan birinə çevrilib.

WUF13 forumunun Bakıda keçirilməsi Azərbaycanın beynəlxalq nüfuzunun artmasının növbəti göstəricisidir. Son illərdə ölkəmiz bir çox qlobal tədbirlərə uğurla ev sahibliyi edib. Bu isə dövlətimizin təşkilatçılıq imkanlarını və beynəlxalq etimadı açıq şəkildə nümayiş etdirir. Prezident İlham Əliyevin forumdakı çıxışı həm də Azərbaycanın qlobal problemlərin həllində fəal iştirak edən dövlət olduğunu bir daha təsdiqlədi.

Forum çərçivəsində şəhərsalma sahəsində innovativ yanaşmalar, iqlim dəyişikliklərinin şəhərlərə təsiri, sosial inklüzivlik, urbanizasiya problemləri və dayanıqlı inkişaf məsələləri geniş müzakirə olundu. Bakı bu mühüm müzakirələrin mərkəzinə çevrilərək beynəlxalq əməkdaşlıq üçün yeni imkanlar yaratdı.

Prezident İlham Əliyevin çıxışı bir daha göstərdi ki, Azərbaycan müasir inkişaf modelinə malik dövlətdir. Ölkəmiz həm iqtisadi inkişaf, həm sosial rifah, həm də şəhərsalma sahəsində mühüm nailiyyətlər əldə edib. Bu uğurların əsasında isə güclü siyasi iradə, strateji baxış və məqsədyönlü dövlət siyasəti dayanır.

Bugünkü reallıq ondan ibarətdir ki, Azərbaycan regionun əsas inkişaf mərkəzlərindən birinə çevrilib. Dayanıqlı şəhərsalma siyasəti isə ölkənin uzunmüddətli inkişaf strategiyasının mühüm hissəsidir. Prezident İlham Əliyevin forumdakı çıxışı Azərbaycanın gələcəyə hesablanmış inkişaf konsepsiyasını beynəlxalq ictimaiyyətə təqdim etdi.

BMT-nin Ümumdünya Şəhərsalma Forumunun Bakıda keçirilməsi həm də Azərbaycanın qlobal urbanizasiya siyasətində fəal rol oynadığını göstərir. Bu tədbir vasitəsilə ölkəmiz öz təcrübəsini beynəlxalq ictimaiyyətlə bölüşmək imkanı qazandı. Eyni zamanda dünyanın müxtəlif ölkələrinin təcrübələrinin öyrənilməsi gələcək inkişaf baxımından mühüm əhəmiyyət daşıyır.

Prezident İlham Əliyevin çıxışı forum iştirakçıları tərəfindən böyük maraqla qarşılandı. Dövlət başçısının şəhərsalma, dayanıqlı inkişaf və postmünaqişə dövründə bərpa prosesləri ilə bağlı fikirləri Azərbaycanın bu sahədə nümunəvi təcrübəyə malik olduğunu bir daha nümayiş etdirdi.

Bu forum Azərbaycanın beynəlxalq mövqeyini daha da gücləndirdi. Bakı bir daha sübut etdi ki, qlobal əhəmiyyətli tədbirlərin keçirilməsi üçün ən uyğun şəhərlərdən biridir. Müasir infrastruktura, təhlükəsizliyə və yüksək təşkilatçılıq imkanlarına malik olan Azərbaycan artıq dünyanın diqqət mərkəzindədir.

WUF13 forumu həm də gələcəyin şəhərlərinin necə olacağı barədə mühüm mesajlar verdi. Dayanıqlı inkişaf, yaşıl texnologiyalar, insan amilinə əsaslanan şəhərsalma və innovativ idarəetmə prinsipləri müasir urbanizasiya siyasətinin əsas istiqamətlərini təşkil edir. Azərbaycan isə bu prosesdə fəal iştirak edən və öz təcrübəsini təqdim edən ölkələr sırasındadır.

Prezident İlham Əliyevin Bakıda keçirilən Ümumdünya Şəhərsalma Forumunun 13-cü Sessiyasındakı çıxışı Azərbaycanın inkişaf strategiyasının mühüm istiqamətlərini bir daha ortaya qoydu. Bu çıxış həm ölkəmizin nailiyyətlərinin təqdimatı, həm də gələcəyə hesablanmış siyasətin nümayişi baxımından böyük əhəmiyyət daşıyırdı. Azərbaycanın dayanıqlı inkişaf və müasir şəhərsalma sahəsində qazandığı uğurlar artıq beynəlxalq səviyyədə nümunə kimi qiymətləndirilir.

Xəyyam Vəliyev,

YAP Gədəbəy rayon təşkilatının əməkdaşı