Azərbaycanın dayanıqlı inkişaf və müasir şəhərsalma strategiyası - ŞƏRH

2026-cı il mayın 18-də Bakı şəhəri növbəti dəfə beynəlxalq əhəmiyyətli tədbirə ev sahibliyi etdi. Bakıda keçirilən Ümumdünya Şəhərsalma Forumunun 13-cü Sessiyası dünyanın müxtəlif ölkələrindən dövlət nümayəndələrini, şəhərsalma üzrə mütəxəssisləri, beynəlxalq təşkilatların təmsilçilərini və ekspertləri bir araya gətirdi. Forumun açılış mərasimində çıxış edən Azərbaycan Respublikasının Prezidenti İlham Əliyev ölkəmizin müasir şəhərsalma siyasəti, dayanıqlı inkişaf strategiyası və azad edilmiş ərazilərdə aparılan genişmiqyaslı quruculuq işləri barədə ətraflı məlumat verdi.

Prezident çıxışında vurğuladı ki, Azərbaycan son illərdə sürətli sosial-iqtisadi inkişaf yolu keçərək müasir şəhərsalma modelini formalaşdırmağa nail olub. Dövlət başçısı qeyd etdi ki, şəhərsalma yalnız infrastrukturun qurulması deyil, eyni zamanda insan amilinin, ekoloji tarazlığın və innovativ texnologiyaların birgə tətbiqinə əsaslanan kompleks inkişaf strategiyasıdır. Bu istiqamətdə həyata keçirilən layihələr ölkənin şəhər mühitinin daha müasir, təhlükəsiz və rahat olmasına xidmət edir.

Çıxış zamanı xüsusi olaraq azad edilmiş ərazilərdə aparılan yenidənqurma və bərpa işlərinə toxunan Prezident bildirdi ki, həmin ərazilərdə “ağıllı şəhər” və “ağıllı kənd” konsepsiyalarına uyğun layihələr həyata keçirilir. Müasir texnologiyaların tətbiqi, yaşıl enerji zonalarının yaradılması və ekoloji standartların qorunması Azərbaycanın gələcəyə hesablanmış inkişaf modelinin əsas tərkib hissəsidir. Bu layihələr təkcə ölkə üçün deyil, beynəlxalq şəhərsalma təcrübəsi üçün də nümunə hesab olunur.

Prezident İlham Əliyev forum iştirakçılarının diqqətinə çatdırdı ki, Azərbaycan şəhərsalma siyasətində dayanıqlılıq prinsipinə xüsusi önəm verir. İnfrastruktur layihələrinin həyata keçirilməsi zamanı ətraf mühitin qorunması, enerji səmərəliliyi və sosial rifahın təmin olunması əsas prioritetlər sırasındadır. Dövlət başçısı bu yanaşmanın Azərbaycanın uzunmüddətli inkişaf strategiyasının mühüm istiqaməti olduğunu vurğuladı.

Forum çərçivəsində səsləndirilən fikirlər Azərbaycanın beynəlxalq əməkdaşlığa açıq olduğunu bir daha nümayiş etdirdi. Prezident qeyd etdi ki, şəhərsalma sahəsində qabaqcıl beynəlxalq təcrübənin öyrənilməsi və tətbiqi ölkəmizin prioritetlərindən biridir. Azərbaycanın qlobal təşəbbüslərdə fəal iştirakı, müasir urbanizasiya çağırışlarına cavab verməsi ölkəmizin beynəlxalq nüfuzunu daha da artırır.

Bakıda keçirilən Ümumdünya Şəhərsalma Forumunun 13-cü Sessiyası Azərbaycanın şəhərsalma və dayanıqlı inkişaf sahəsində qazandığı nailiyyətlərin beynəlxalq ictimaiyyətə təqdim olunması baxımından mühüm əhəmiyyət daşıyır. Prezident İlham Əliyevin çıxışı bir daha göstərdi ki, Azərbaycan müasir şəhərsalma siyasəti ilə regionda və dünyada örnək olan inkişaf modelini uğurla həyata keçirir.

Toğrul Rəhimli

YAP Sədərək rayon təşkilatının əməkdaşı