Ətraf mühit və dayanıqlı inkişaf prioritetləri - ŞƏRH

2026-cı il mayın 18-də Ümumdünya Şəhərsalma Forumunun 13-cü Sessiyası çərçivəsində çıxış edən Prezident İlham Əliyev Azərbaycanın şəhərsalma, ekologiya və dayanıqlı inkişaf istiqamətində həyata keçirdiyi mühüm layihələrdən bəhs etdi. Prezident xüsusilə vurğuladı ki, müasir dövrdə şəhərlərin inkişafı yalnız yeni binaların tikilməsi ilə deyil, həm də ətraf mühitin qorunması, yaşıl enerjiyə keçid və insanların sağlam yaşayış mühitinin təmin olunması ilə ölçülür.

Çıxış zamanı qeyd olundu ki, Azərbaycan son illərdə işğaldan azad olunmuş ərazilərdə genişmiqyaslı bərpa və quruculuq işləri həyata keçirir. Bu prosesdə “ağıllı şəhər” və “ağıllı kənd” konsepsiyalarına xüsusi önəm verilir. Yeni salınan yaşayış məntəqələrində ekoloji tarazlığın qorunması, alternativ enerji mənbələrinin tətbiqi və müasir infrastrukturun qurulması əsas prioritetlərdəndir.
Prezident İlham Əliyev bildirdi ki, “biz ətraf mühit sahəsində çox işləri görməli olduq”. Bu fikir Azərbaycanın son illərdə qarşılaşdığı ekoloji problemlərin miqyasını göstərir. Uzun illər ərzində baxımsız qalmış ərazilərdə torpaq çirklənməsi, meşələrin məhv edilməsi və su ehtiyatlarının düzgün idarə olunmaması ciddi problemlər yaradıb. Hazırda dövlət tərəfindən həmin ərazilərin ekoloji vəziyyətinin yaxşılaşdırılması istiqamətində geniş tədbirlər görülür. Meşə fondunun bərpası, yaşıllıqların artırılması və ekoloji monitorinqlərin aparılması bu tədbirlərin əsas hissəsini təşkil edir.
Çıxışda yaşıl enerji siyasəti də xüsusi yer tutdu. Azərbaycan günəş və külək enerjisi layihələrinin həyata keçirilməsi ilə regionda ekoloji dayanıqlılığın gücləndirilməsinə çalışır. Bu layihələr həm karbon emissiyalarının azaldılmasına, həm də təmiz enerji istehsalının artırılmasına xidmət edir. Prezident vurğuladı ki, gələcəyin şəhərləri ekoloji cəhətdən təhlükəsiz, enerjiyə qənaət edən və insan yönümlü olmalıdır.
Forum çərçivəsində səsləndirilən fikirlər göstərdi ki, Azərbaycan şəhərsalma siyasətində beynəlxalq təcrübədən faydalanmağa və dayanıqlı inkişaf prinsiplərini tətbiq etməyə böyük önəm verir. Ətraf mühitin qorunması artıq yalnız ekoloji məsələ deyil, həm də iqtisadi və sosial inkişafın əsas tərkib hissəsinə çevrilib. Prezident İlham Əliyevin çıxışı Azərbaycanın gələcək inkişaf strategiyasında yaşıl dünya və ekoloji təhlükəsizlik məsələlərinin mühüm yer tutduğunu bir daha nümayiş etdirdi.

Mahir Qurbanov
YAP Kəngərli rayon təşkilatının fəalı