Davamlı və ekoloji təhlükəsizlik müasir Azərbaycanın əsas prioritetidir - ŞƏRH

2026-cı il mayın 18-də Bakı şəhərində keçirilən Ümumdünya Şəhərsalma Forumunun 13-cü Sessiyası mühüm beynəlxalq platforma kimi dünya ictimaiyyətinin diqqətini urbanizasiya, ekoloji təhlükəsizlik və davamlı inkişaf məsələlərinə yönəltdi. Forumun açılış mərasimində çıxış edən Azərbaycan Prezidenti İlham Əliyev ölkəmizin şəhərsalma siyasəti, ətraf mühitin qorunması istiqamətində həyata keçirilən layihələr və gələcək inkişaf strategiyası barədə geniş fikirlər səsləndirdi.

Prezident çıxışında xüsusilə vurğuladı ki, Bakı uzun illər neft sənayesinin təsiri altında ciddi ekoloji problemlərlə üz-üzə qalmış şəhərlərdən biri olub. Dövlət başçısının sözlərinə görə, XIX əsrin ortalarından başlayaraq sənaye fəaliyyətinin intensiv inkişafı nəticəsində paytaxtın bir çox ərazilərində ətraf mühitə ciddi ziyan dəyib. Bunun nəticəsində “Qara şəhər”, Bibiheybət və digər sənaye zonaları uzun müddət ekoloji baxımdan çətin vəziyyətdə qalıb.
Məhz buna görə də son illərdə Azərbaycanda ekoloji vəziyyətin yaxşılaşdırılması istiqamətində genişmiqyaslı tədbirlər həyata keçirilib. Prezident İlham Əliyev qeyd etdi ki, ölkəmiz ətraf mühitin qorunmasını dövlət siyasətinin mühüm istiqamətlərindən biri kimi müəyyən edib. Xüsusilə paytaxt Bakıda yaşıllıq sahələrinin artırılması, yeni park və bulvarların salınması, sənaye tullantılarının təmizlənməsi və dənizkənarı ərazilərin bərpası istiqamətində mühüm addımlar atılıb. Bu işlər şəhərin ekoloji tarazlığının qorunmasına və insanların daha sağlam mühitdə yaşamasına xidmət edir.
Forumda səsləndirilən fikirlər bir daha göstərdi ki, müasir dövrdə şəhərsalma yalnız binaların tikilməsi ilə məhdudlaşmır. Yeni şəhər konsepsiyası insan amilinə, ekologiyaya və sosial rifaha əsaslanmalıdır. Prezident İlham Əliyev çıxışında bildirdi ki, Azərbaycanın azad edilmiş ərazilərində həyata keçirilən yenidənqurma işləri də məhz “ağıllı şəhər” və “yaşıl enerji” prinsiplərinə uyğun şəkildə aparılır. Bu yanaşma gələcək nəsillər üçün sağlam və təhlükəsiz yaşayış mühitinin formalaşdırılması baxımından xüsusi əhəmiyyət daşıyır.
Bu gün dünyada iqlim dəyişiklikləri, su ehtiyatlarının azalması və ekoloji problemlər bütün dövlətləri ciddi şəkildə düşündürür. Azərbaycan da bu qlobal çağırışlara biganə qalmır. Son illərdə ölkəmizdə alternativ və bərpaolunan enerji mənbələrinin inkişafına xüsusi diqqət ayrılır. Günəş və külək enerjisi layihələrinin genişləndirilməsi, ekoloji təmiz nəqliyyat vasitələrinin tətbiqi və karbon emissiyalarının azaldılması istiqamətində atılan addımlar bunun bariz nümunəsidir.
Prezident İlham Əliyevin forumdakı çıxışı Azərbaycanın beynəlxalq əməkdaşlığa verdiyi önəmi də nümayiş etdirdi. Dövlət başçısı vurğuladı ki, urbanizasiya və ətraf mühit problemləri qlobal xarakter daşıdığı üçün onların həlli yalnız beynəlxalq həmrəylik və birgə fəaliyyət nəticəsində mümkündür. Azərbaycanın belə mötəbər beynəlxalq tədbirə ev sahibliyi etməsi isə ölkəmizin dünya miqyasında artan nüfuzunun göstəricisidir.
Ümumdünya Şəhərsalma Forumunun Bakıda keçirilməsi Azərbaycanın inkişaf modelinə olan marağın artdığını da sübut edir. Bu tədbir həm ölkəmizin şəhərsalma təcrübəsinin təqdim olunması, həm də beynəlxalq təcrübənin öyrənilməsi baxımından mühüm əhəmiyyət daşıyır. Forum çərçivəsində aparılan müzakirələr davamlı inkişafın təmin olunması, şəhərlərin daha yaşıl və təhlükəsiz mühitə çevrilməsi istiqamətində yeni imkanlar açır.
Nəticə etibarilə, Prezident İlham Əliyevin forumdakı çıxışı bir daha göstərdi ki, Azərbaycan yalnız iqtisadi inkişafı deyil, həm də ekoloji təhlükəsizliyi və davamlı şəhərsalmanı əsas prioritetlərdən biri hesab edir. Ətraf mühitin qorunması istiqamətində görülən işlər ölkəmizin gələcək inkişaf strategiyasının mühüm hissəsidir və bu siyasət insanların rifahına, sağlam həyat tərzinə və ekoloji tarazlığın qorunmasına xidmət edir.

Hüseyn Süleymanov
YAP Kəngərli rayon təşkilatının sədr müavini