28 May – Müstəqillik Günü hər bir azərbaycanlı üçün milli qürur və birlik rəmzidir

28 May Azərbaycan xalqının tarixində ən şərəfli və qürurverici günlərdən biridir. 1918-ci il mayın 28-də Azərbaycan Xalq Cümhuriyyətinin yaradılması ilə xalqımız öz müstəqilliyini bütün dünyaya bəyan etmişdir. Bu tarix yalnız dövlət quruculuğunun başlanğıcı deyil, həm də milli azadlıq və istiqlal arzularının gerçəkləşdiyi müqəddəs bir gündür. Məhz həmin gün Şərqdə ilk demokratik və parlamentli respublika yaradılmış, Azərbaycan xalqı öz taleyini müstəqil şəkildə müəyyən etmək hüququnu əldə etmişdir.

Azərbaycan Xalq Cümhuriyyəti qısa müddət fəaliyyət göstərməsinə baxmayaraq, dövlətçilik tariximizdə silinməz iz qoymuşdur. Cümhuriyyət dövründə milli ordu yaradılmış, dövlət atributları qəbul edilmiş, təhsil və mədəniyyət sahəsində mühüm addımlar atılmışdır. Həmçinin qadınlara seçki hüququnun verilməsi həmin dövr üçün böyük demokratik nailiyyət hesab olunurdu. Bu fakt bir daha göstərirdi ki, Azərbaycan dövləti müasir və demokratik prinsiplər əsasında inkişaf etməyə çalışırdı.

1920-ci ildə Azərbaycan Xalq Cümhuriyyətinin fəaliyyəti dayandırılsa da, xalqımızın azadlıq arzusu heç vaxt sönmədi. Uzun illərdən sonra, 1991-ci ildə Azərbaycan yenidən dövlət müstəqilliyini bərpa etdi. Müstəqilliyimizin qorunub saxlanılması və möhkəmləndirilməsi isə ümummilli lider Heydər Əliyevin adı ilə bağlıdır. Onun uzaqgörən siyasəti nəticəsində Azərbaycan sabitlik və inkişaf yoluna qədəm qoydu, dövlətçilik ənənələri daha da gücləndi. Bu gün Azərbaycan Prezident İlham Əliyevin rəhbərliyi ilə müstəqil siyasət yürüdən, beynəlxalq aləmdə nüfuzu artan güclü dövlətə çevrilmişdir. Ölkəmizin iqtisadi inkişafı, ordu quruculuğu, beynəlxalq uğurları və ərazi bütövlüyünün təmin olunması müstəqilliyimizin nə qədər dəyərli olduğunu bir daha sübut edir.

28 May – Müstəqillik Günü hər bir azərbaycanlı üçün milli qürur və birlik rəmzidir. Bu gün xalqımız öz qəhrəman övladlarını ehtiramla yad edir, dövlətimizin müstəqilliyi uğrunda aparılan mübarizəni yüksək qiymətləndirir. Müstəqillik hər bir xalqın ən böyük sərvətidir və onu qorumaq hər bir vətəndaşın müqəddəs borcudur. Azərbaycan xalqı da bu müqəddəs dəyəri daim uca tutaraq gələcək nəsillərə ötürəcəkdir.

Nazim Bünyatov,

YAP Ağcabədi rayon təşkilatının sədr müavini