Aqrar sektorun inkişafında yeni mərhələ - ŞƏRH

Azərbaycan Respublikasının Prezidenti İlham Əliyev kənd təsərrüfatı məsələlərinə həsr olunmuş müşavirədə çıxışı zamanı aqrar sektorun ölkə iqtisadiyyatında strateji əhəmiyyət daşıdığını xüsusi vurğulayıb. Dövlət başçısı qeyd edib ki, qeyri-neft sektorunun əsas istiqamətlərindən biri olan kənd təsərrüfatının inkişafı həm ərzaq təhlükəsizliyinin təmin olunmasına, həm də regionlarda sosial rifahın yüksəlməsinə xidmət edir.

Prezident çıxışında bildirib ki, son illərdə dövlət tərəfindən kənd təsərrüfatının inkişafı məqsədilə genişmiqyaslı proqramlar həyata keçirilir, fermerlərə hərtərəfli dəstək göstərilir və müasir texnologiyaların tətbiqi genişləndirilir. Onun sözlərinə görə, aqrar sahənin inkişafı regionlarda məşğulluğun artırılması baxımından mühüm rol oynayır:
“Kənd təsərrüfatının inkişafı minlərlə insan üçün yeni iş yerlərinin açılması deməkdir. Biz bütün regionlarda əhalinin məşğulluğunu təmin etməli və kənd yerlərində yaşayan insanların rifahını yüksəltməliyik.”
Dövlət başçısı regionların sosial-iqtisadi inkişaf proqramlarının uğurla icra olunduğunu bildirərək, infrastruktur layihələrinin kənd təsərrüfatının inkişafına mühüm töhfə verdiyini qeyd edib. Prezident vurğulayıb ki, yeni yolların çəkilməsi, elektrik enerjisi, su və meliorasiya sistemlərinin yenilənməsi məhsuldarlığın artmasına və kənd təsərrüfatı məhsullarının bazarlara daha rahat çıxarılmasına şərait yaradır.
Müşavirədə kənd təsərrüfatı subsidiyalarının əhəmiyyətindən də geniş bəhs olunub. Prezident qeyd edib ki, fermerlərə verilən subsidiyalar onların maliyyə imkanlarını artırır, istehsalın genişlənməsinə və kənd təsərrüfatında dayanıqlı inkişafın təmin edilməsinə xidmət edir.
“Subsidiyalar fermerlər üçün mühüm dəstək mexanizmidir. Dövlət hər zaman kənd adamının yanında olmalıdır və bu siyasət bundan sonra da davam etdiriləcək,” – deyə Prezident bildirib.
Çıxış zamanı ölkənin su təsərrüfatı və meliorasiya sahəsində həyata keçirilən layihələrə də toxunulub. Dövlət başçısı xüsusilə Şirvan kanalı ilə bağlı görülən işlərin əhəmiyyətini vurğulayaraq bildirib ki, kanalın fəaliyyəti minlərlə hektar əkin sahəsinin su təminatında mühüm rol oynayır. Prezident əlavə edib ki, su ehtiyatlarından səmərəli istifadə kənd təsərrüfatının gələcək inkişafı üçün əsas şərtlərdən biridir.
Bununla yanaşı, Qarabağ kanalının bərpası və yenidən qurulması məsələsi də müşavirənin əsas mövzularından biri olub. Prezident qeyd edib ki, azad olunmuş ərazilərdə kənd təsərrüfatının dirçəldilməsi üçün geniş layihələr icra edilir və Qarabağ kanalının yenidən qurulması həmin ərazilərin aqrar potensialının reallaşdırılmasına böyük töhfə verəcək.
“Qarabağ və Şərqi Zəngəzur iqtisadi rayonlarında kənd təsərrüfatının inkişafı dövlət siyasətinin prioritet istiqamətlərindən biridir. Qarabağ kanalının bərpası bu bölgələrin iqtisadi dirçəlişinə ciddi təkan verəcək,” – deyə dövlət başçısı vurğulayıb.
Müşavirədə səsləndirilən fikirlər bir daha göstərir ki, Azərbaycanda kənd təsərrüfatının inkişafı, regionların sosial rifahının yüksəldilməsi və müasir infrastrukturun qurulması dövlət siyasətinin əsas prioritetlərindən biri olaraq qalır. Prezidentin çıxışı aqrar sahədə yeni inkişaf mərhələsinin əsas istiqamətlərini müəyyən etməklə yanaşı, fermerlərə və kənd zəhmətkeşlərinə göstərilən dövlət qayğısının davamlı xarakter daşıdığını nümayiş etdirib.

Sevda Quluyeva
YAP Kəngərli rayon təşkilatının sədri