Azərbaycanın aqrar-sənaye potensialı inkişaf edir - ŞƏRH

Azərbaycan Respublikasının Prezidenti Cənab İlham Əliyevin rəhbərliyi ilə kənd təsərrüfatı məsələlərinə həsr olunmuş genişmiqyaslı müşavirədə proqram xarakterli çıxışı ölkəmizdə aqrar sektorun modernləşdirilməsi, daxili istehsalın stimullaşdırılması və ərzaq təhlükəsizliyinin tam təmin edilməsi istiqamətində növbəti strateji mərhələnin əsasını qoymuşdur. Dövlət başçısının öz çıxışında xüsusi ilə vurğuladığı və aqrar sahənin inkişafının əsas hərəkətverici qüvvəsi kimi xarakterizə etdiyi ən mühüm istiqamətlərdən biri məhz kənd təsərrüfatı texnikası ilə təminat məsələsidir. Müasir aqrar siyasətin tələblərinə uyğun olaraq, kənd təsərrüfatında yüksək məhsuldarlığa nail olmaq, itkiləri minimuma endirmək və sahələrin səmərəli idarə edilməsini təşkil etmək birbaşa olaraq yüksəktexnoloji maşın və mexanizmlərin istehsalat prosesinə cəlb edilməsindən asılıdır. Prezident cənab İlham Əliyev öz çıxışında qeyd etmişdir ki, torpaqdan maksimum dərəcədə səmərəli istifadə edilməsi və aqrotexniki tədbirlərin vaxtında, keyfiyyətlə həyata keçirilməsi üçün ölkəmizə ən müasir, qlobal standartlara cavab verən texnikaların gətirilməsi və fermerlərin bu resurslara əlçatanlığının tam təmin olunması dövlətin aqrar strategiyasının prioritet xəttidir. Ölkədə kənd təsərrüfatının mexanikləşdirilməsi səviyyəsinin durmadan yüksəldilməsi təkcə ənənəvi sahələrin deyil, həm də strateji əhəmiyyətli bitkiçilik sahələrinin regional miqyasda rəqabətqabiliyyətliliyini artırır. Bu kontekstdə dövlət tərəfindən həyata keçirilən irimiqyaslı subsidiyalaşdırma və güzəştli lizinq şərtləri fermerlərin və iri aqroparkların ən müasir kombaynlar, traktorlar, səpici aqreqatlar və suvarma sistemləri ilə təmin olunmasında müstəsna rol oynayır. Prezident cənab İlham Əliyev çıxışında dövlət dəstəyinin və investisiya mühitinin təkmilləşdirilməsinin vacibliyinə toxunaraq bildirmişdir ki, kənd təsərrüfatı texnikasının alınması üçün ayrılan vəsaitlər birbaşa olaraq torpağın məhsuldarlığının artırılmasına və aqrar sahədə fəaliyyət göstərən sahibkarların rifahının yüksəldilməsinə xidmət etməlidir. Aqrar sektorda aparılan islahatların əsas məqsədlərindən biri də texnika parkının mütəmadi olaraq yenilənməsi, köhnəlmiş və iqtisadi baxımdan səmərəsiz olan maşınların dövriyyədən çıxarılaraq yerinə daha az yanacaq sərf edən, yüksək funksionallığa malik modern avadanlıqların gətirilməsidir. Bu proses həm də ətraf mühitin qorunması və resurslara qənaət edilməsi baxımından böyük əhəmiyyət kəsb edir, çünki müasir texnologiyalar torpağın strukturuna minimal ziyan vurmaqla daha geniş sahələrin qısa zamanda becərilməsinə şərait yaradır.

Dövlət başçısı cənab İlham Əliyevin kənd təsərrüfatı müşavirəsindəki çıxışında toxunulan digər mühüm məqam isə işğaldan azad edilmiş Qarabağ və Şərqi Zəngəzur iqtisadi rayonlarında aqrar fəaliyyətin bərpası və bu ərazilərin yüksəkkeyfiyyətli texnika ilə təminatı məsələsidir. Azad olunmuş torpaqların böyük kənd təsərrüfatı potensialını nəzərə alaraq, dövlət tərəfindən həmin regionlarda "Ağıllı kənd" və modern aqrar infrastruktur layihələri çərçivəsində ən son texnoloji yeniliklər tətbiq edilir. Bu sahədə texnika təminatının düzgün qurulması, xüsusilə də innovativ suvarma aqreqatlarının, pilotsuz uçuş aparatlarının və avtomatlaşdırılmış idarəetmə sistemlərinə malik traktorların sahələrə cəlb edilməsi bütövlükdə respublikanın ümumi kənd təsərrüfatı istehsalına çox böyük təkan verir. Prezident cənab İlham Əliyev qeyd etmişdir ki, yeni torpaqların dövriyyəyə cəlb edilməsi vaxt aparan bir proses olsa da, müasir texniki bazanın mövcudluğu bu keçid dövrünü maksimum dərəcədə sürətləndirir və səmərəli edir. Fermerlərin modern texnikaya cəlb edilməsi fəaliyyətində lizinq xidmətlərinin şəffaflığının təmin edilməsi, bürokratik əngəllərin aradan qaldırılması və xidmət şəbəkəsinin regionlar üzrə coğrafi baxımdan genişləndirilməsi xüsusi əhəmiyyət daşıyır. Müşavirədə qarşıya qoyulan mühüm vəzifələrdən biri də məhz regionlarda, kənd yerlərində texniki servis xidmətlərinin keyfiyyətinin artırılması, ehtiyat hissələrinin əlçatanlığının təmin edilməsi və maşın-mexanizmlərin təmiri prosesinin operativ qurulmasıdır. Çünki mövsüm vaxtı texnikanın nasazlıq səbəbindən dayanması fermerlər üçün həm vaxt, həm də ciddi məhsul itkisinə səbəb ola bilər ki, bunun da qarşısının alınması üçün regional servis mərkəzlərinin şəbəkəsi durmadan genişləndirilməlidir. Eyni zamanda, dövlət başçısı ölkəyə gətirilən texnikaların idarə edilməsi üçün yerli kadrların, xüsusilə gənc mütəxəssislərin hazırlanmasının, onların peşəkar təhsil almasının vacibliyini ön plana çəkmişdir, çünki müasir intellektual idarəetmə sistemləri ilə təchiz olunmuş texnikalardan səmərəli istifadə birbaşa olaraq operatorların bilik və bacarıq səviyyəsindən asılıdır.

Müşavirədə kənd təsərrüfatı texnikası sahəsində daxili istehsalın və montaj xətlərinin qurulması məsələsinə də toxunulmuşdur ki, bu da ölkənin xarici bazarlardan asılılığını azaldan və yerli sənaye potensialını gücləndirən mühüm bir addımdır. Azərbaycanda fəaliyyət göstərən maşınqayırma zavodlarının və montaj müəssisələrinin imkanlarının genişləndirilməsi, aparıcı qlobal şirkətlərlə birgə istehsal sahələrinin yaradılması ölkəmizdə daxili tələbatın daha uyğun qiymətlərlə qarşılanmasına böyük imkanlar yaradır. Prezident cənab İlham Əliyev kənd təsərrüfatı sektorunun dinamik inkişafını təmin etmək üçün bütün dövlət qurumlarının, aidiyyəti nazirliklərin və özəl sektor nümayəndələrinin koordinasiyalı şəkildə fəaliyyət göstərməli olduğunu bildirmişdir. Aqrar sahənin maşın və avadanlıqlarla təminatı məsələsi sadəcə iqtisadi bir layihə deyil, həm də ölkə əhalisinin keyfiyyətli və yerli məhsullarla təmin edilməsinə birbaşa təsir göstərən strateji milli təhlükəsizlik məsələsidir. İnnovativ texnologiyaların tətbiqi torpağın münbitliyinin qorunması ilə yanaşı, həm də aqrar sektorda əmək məhsuldarlığını bir neçə dəfə artırır ki, bu da kənd yerlərində məşğulluğun strukturunun müsbət yönümdə dəyişməsinə, fiziki əməyin yüngülləşməsinə və intellektual əməyin payının artmasına gətirib çıxarır. Müşavirədə qəbul edilən qərarlar və dövlət başçısı tərəfindən verilən tapşırıqlar yaxın gələcəkdə ölkənin aqrar sektorunda texniki təminat sahəsində yeni standartların formalaşacağını, lizinq mexanizmlərinin daha da optimallaşdırılacağını və yerli fermerlərin dünya səviyyəli aqrotexniki imkanlardan yararlanaraq daha yüksək iqtisadi nailiyyətlər əldə edəcəyini tam əminliklə söyləməyə əsas verir. Prezident cənab İlham Əliyevin bu uzaqgörən siyasəti müasir Azərbaycanın aqrar-sənaye potensialını yeni və qlobal inkişaf səviyyəsinə yüksəldir.

Varis Rüstəmov,

Yeni Azərbaycan Partiyası Sabirabad rayon təşkilatının sədri