Laçın rayonda uşaqlara həsr olunan bayram tədbiri keçirilib - FOTOLAR

1 İyun — Uşaqların Beynəlxalq Müdafiəsi Günü münasibətilə Yeni Azərbaycan Partiyası (YAP) Laçın rayon təşkilatının tədbirlər planına uyğun olaraq, ərazi partiya təşkilatları tərəfindən silsilə bayram tədbirləri keçirilmişdir.

Çıxış edənlər uşaqların müdafiəsinin və onlara qayğının təmin edilməsinin hər bir cəmiyyətin ən ümdə vəzifələrindən biri olduğunu vurğulamışlar. Qeyd edilmişdir ki, gələcəyimiz olan uşaqların sağlam, savadlı və vətənpərvər böyüməsi dövlətimizin yürütdüyü humanizm siyasətinin əsas prioritetlərindən birini təşkil edir.
Tədbirlərdə xüsusi olaraq diqqətə çatdırılmışdır ki, Azərbaycanda uşaq hüquqlarının qorunması, gənc nəslə dövlət qayğısının fundamental əsaslarının qoyulması Ümummilli Lider Heydər Əliyevin adı ilə bağlıdır. Məhz Ulu Öndərin uzaqgörən siyasəti və imzaladığı fərmanlar sayəsində ölkəmizdə uşaqların sosial müdafiəsi gücləndirilmiş, onların beynəlxalq standartlara uyğun inkişafı üçün möhkəm zəmin yaradılmışdır.
Bu gün Müzəffər Ali Baş Komandan İlham Əliyevin rəhbərliyi və Birinci vitse-prezident Mehriban xanım Əliyevanın rəhbərlik etdiyi Heydər Əliyev Fondunun xüsusi diqqəti sayəsində uşaqların təhsili, sağlamlığı və rifahı naminə nəhəng layihələr həyata keçirilir. İşğaldan azad edilmiş torpaqlarımızda, o cümlədən Laçında doğma yurdlarına qayıdan uşaqların müasir məktəblərdə təhsil alması və azad, firavan böyüməsi dövlətimizin qüdrətinin və uşaqlara olan böyük sevginin bariz göstəricisidir.
Tədbir iştirakçıları Uşaqların Beynəlxalq Müdafiəsi Gününün cəmiyyətdə uşaq hüquqlarına diqqətin artırılmasında, gələcək nəsillərin milli-mənəvi dəyərlərə sadiq böyüməsində mühüm rol oynadığını bildirərək, bu əlamətdar günün hər zaman böyük sevinc və qürur mənbəyi olacağını ifadə etmişlər.