Azərbaycanın enerji strategiyasının yeni mərhələsi - ŞƏRH

2026-cı il iyunun 1-də Bakıda keçirilən Bakı Enerji Həftəsinin rəsmi açılış mərasimi Azərbaycanın enerji siyasətinin uğurlarını, gələcək prioritetlərini və beynəlxalq əməkdaşlıq imkanlarını bir daha nümayiş etdirdi. Azərbaycan Respublikasının Prezidenti İlham Əliyev tədbirdə çıxış edərək ölkənin enerji sahəsində keçdiyi inkişaf yoluna nəzər saldı, əldə olunmuş nailiyyətləri vurğuladı və qarşıdakı dövr üçün strateji hədəfləri açıqladı. Tədbir çərçivəsində 31-ci Beynəlxalq Xəzər Neft və Qaz Sərgisi “Caspian Oil and Gas”, 14-cü Xəzər Beynəlxalq Təmiz Enerji Sərgisi “Caspian Power” və 31-ci “Baku Energy Forum” təşkil olunmuşdur.

Prezident İlham Əliyev çıxışında qeyd etdi ki, Xəzər Neft və Qaz Sərgisi müasir Azərbaycanın enerji inkişafının təməlini qoymuş mühüm platformadır. Dövlət başçısı vurğuladı ki, ötən onilliklər ərzində bu tədbir yalnız sərgi formatında qalmamış, qlobal enerji liderlərini, investorları və ekspertləri bir araya gətirən nüfuzlu beynəlxalq platformaya çevrilmişdir.

Prezident öz çıxışında Azərbaycanın enerji strategiyasının əsasını təşkil edən uzaqgörən siyasətin təməlində Ümummilli Lider Heydər Əliyev tərəfindən müəyyənləşdirilmiş prinsiplərin dayandığını bildirdi. Məhz həmin strategiya sayəsində Azərbaycan dünya enerji xəritəsində etibarlı tərəfdaş kimi tanınmış, regionun aparıcı enerji mərkəzlərindən birinə çevrilmişdir.

Dövlət başçısı xüsusilə vurğuladı ki, “Şahdəniz” qaz yatağı üzrə müqavilənin imzalanmasının 30 ili tamam olur. Bu müqavilə Azərbaycanın qaz ixracatçısı kimi mövqeyinin möhkəmlənməsində mühüm rol oynayıb və ölkənin beynəlxalq enerji bazarındakı nüfuzunu daha da artırıb.

Çıxışın əsas məqamlarından biri Azərbaycanın enerji təhlükəsizliyinə verdiyi töhfələrlə bağlı idi. Prezident İlham Əliyev qeyd etdi ki, Azərbaycan bu gün bir çox ölkələrin enerji təhlükəsizliyinin təmin edilməsində mühüm tərəfdaşdır. Xüsusilə Avropa ölkələri ilə enerji əməkdaşlığının genişlənməsi Azərbaycanın beynəlxalq əhəmiyyətini artırır və ölkənin etibarlı təchizatçı statusunu daha da möhkəmləndirir.

Prezident çıxışında neft və qaz sektorundakı uğurlarla yanaşı, yaşıl enerji sahəsində həyata keçirilən layihələrə də geniş yer ayırdı. O bildirdi ki, Azərbaycan artıq enerji keçidinin fəal iştirakçılarından biridir və bərpa olunan enerji mənbələrinin inkişafı dövlət siyasətinin prioritet istiqamətlərindəndir. Günəş və külək enerjisi layihələrinin reallaşdırılması ölkənin enerji balansının şaxələndirilməsinə xidmət edir.

Dövlət başçısı vurğuladı ki, yaşıl enerji sahəsində həyata keçirilən layihələr təkcə iqtisadi deyil, həm də ekoloji baxımdan böyük əhəmiyyət daşıyır. Azərbaycanın iqlim dəyişikliklərinə qarşı qlobal mübarizəyə verdiyi töhfə beynəlxalq ictimaiyyət tərəfindən yüksək qiymətləndirilir. Bu istiqamətdə həyata keçirilən proqramlar ölkənin davamlı inkişaf məqsədlərinə sadiqliyini nümayiş etdirir.

Prezident İlham Əliyev Azərbaycanın müstəqillik illərində qazandığı uğurların əsas səbəblərindən biri kimi siyasi sabitliyi və məqsədyönlü iqtisadi siyasəti göstərdi. Onun sözlərinə görə, enerji gəlirlərinin düzgün idarə olunması nəticəsində ölkədə genişmiqyaslı infrastruktur layihələri həyata keçirilmiş, sosial rifah yüksəlmiş və iqtisadiyyatın müxtəlif sahələrinin inkişafı təmin edilmişdir.

Çıxış zamanı Prezident Azərbaycanın beynəlxalq tərəfdaşları ilə münasibətlərinə də toxundu. O qeyd etdi ki, enerji sahəsində qurulan əməkdaşlıq əlaqələri zamanla siyasi və iqtisadi tərəfdaşlıqların möhkəmlənməsinə də xidmət edib. Bu əməkdaşlıq modeli qarşılıqlı etimada əsaslanır və uzunmüddətli perspektivə hesablanıb.

Bakı Enerji Həftəsi çərçivəsində keçirilən tədbirlərin əhəmiyyətindən danışan dövlət başçısı bildirdi ki, bu platforma yeni ideyaların, innovativ texnologiyaların və perspektivli layihələrin müzakirəsi üçün mühüm imkan yaradır. Burada qəbul olunan qərarlar və aparılan müzakirələr qlobal enerji bazarının gələcəyinə təsir göstərən mühüm amillərdən biridir.

Prezident İlham Əliyevin çıxışı bir daha göstərdi ki, Azərbaycan enerji sektorunda əldə etdiyi uğurlarla kifayətlənmir və yeni inkişaf mərhələsinə qədəm qoyur. Ənənəvi enerji resursları ilə yanaşı, yaşıl enerji sahəsində də böyük potensiala malik olan ölkəmiz qarşıdakı illərdə regional və qlobal enerji bazarlarında mövqeyini daha da gücləndirməyi hədəfləyir.

Nəticə etibarilə, Bakı Enerji Həftəsinin rəsmi açılış mərasimində Prezident İlham Əliyevin çıxışı Azərbaycanın enerji siyasətinin uğurlarını, gələcək inkişaf istiqamətlərini və beynəlxalq əməkdaşlığa verdiyi önəmi aydın şəkildə ortaya qoydu. Bu çıxış həm ölkənin enerji strategiyasının növbəti mərhələsinin konturlarını müəyyənləşdirdi, həm də Azərbaycanın qlobal enerji təhlükəsizliyində mühüm rol oynayan etibarlı tərəfdaş olduğunu bir daha təsdiqlədi.

Xəyyam Vəliyev,

YAP Gədəbəy rayon təşkilatının əməkdaşı