Enerji təhlükəsizliyinin etibarlı ünvanı: Azərbaycan - ŞƏRH

Bakı Enerji Həftəsi artıq uzun illərdir ki, dünyanın enerji sənayesinin aparıcı nümayəndələrini, dövlət rəsmilərini, investorları və ekspertləri bir araya gətirən nüfuzlu beynəlxalq platforma kimi çıxış edir. Bu il keçirilən Bakı Enerji Həftəsinin rəsmi açılış mərasimində Azərbaycan Prezidenti İlham Əliyev çıxış edərək ölkəmizin enerji siyasətinin keçdiyi inkişaf yolundan, əldə olunan nailiyyətlərdən və gələcək perspektivlərdən bəhs edib. Prezidentin çıxışında səsləndirilən fikirlər Azərbaycanın enerji tarixinin mühüm mərhələlərini, enerji təhlükəsizliyinin təmin olunmasında oynadığı rolu və beynəlxalq əməkdaşlığın əhəmiyyətini bir daha nümayiş etdirdi.

Dövlət başçısı vurğulayıb ki, Azərbaycanın müasir enerji inkişafının əsası məhz 1994-cü ildə keçirilən ilk Beynəlxalq Xəzər Neft və Qaz Sərgisi ilə qoyulub. Həmin sərgidən dərhal sonra Azərbaycanın beynəlxalq neft şirkətləri konsorsiumu ilə sonradan “Əsrin müqaviləsi” adlandırılan tarixi sazişi imzalaması ölkənin gələcək inkişaf strategiyasını müəyyənləşdirən dönüş nöqtəsinə çevrilib. Prezidentin qeyd etdiyi kimi, bu proses Ümummilli Lider Heydər Əliyev tərəfindən müəyyən edilmiş uzaqgörən siyasətin nəticəsi idi. Məhz həmin dövrdə yaradılan enerji strategiyası Azərbaycanın iqtisadi müstəqilliyinin möhkəmləndirilməsinə, beynəlxalq tərəfdaşlıqların genişlənməsinə və ölkənin qlobal enerji bazarına inteqrasiyasına yol açdı.
Son otuz il ərzində Xəzər Neft və Qaz Sərgisi sadəcə bir sərgi olmaqdan çıxaraq Azərbaycanın enerji tarixinin ayrılmaz hissəsinə çevrilib. Bu tədbir ölkənin enerji potensialının beynəlxalq ictimaiyyətə təqdim edilməsində, xarici investisiyaların cəlb olunmasında və yeni tərəfdaşlıqların qurulmasında mühüm rol oynayıb. Bu gün Azərbaycan dünyanın etibarlı enerji təchizatçılarından biri kimi tanınırsa, bunun təməlində 1994-cü ildə əsası qoyulan uğurlu enerji strategiyası dayanır.
Prezident İlham Əliyev çıxışında enerji təhlükəsizliyi məsələsinə də xüsusi diqqət ayırıb. Müasir dövrdə enerji təhlükəsizliyi hər bir dövlət üçün milli təhlükəsizliyin əsas elementlərindən biri hesab olunur. Azərbaycanın həyata keçirdiyi enerji layihələri yalnız ölkəmizin deyil, eyni zamanda geniş coğrafiyada yerləşən tərəfdaş dövlətlərin enerji təminatında mühüm rol oynayır. Son illərdə dünyada baş verən geosiyasi dəyişikliklər enerji mənbələrinin şaxələndirilməsinin və etibarlı tərəfdaşların əhəmiyyətini daha da artırıb. Azərbaycan isə özünü etibarlı tərəfdaş kimi təsdiq edərək Avropanın və region ölkələrinin enerji təhlükəsizliyinə mühüm töhfələr verir.
Dövlət başçısı çıxışında ölkəmizin zəngin qaz ehtiyatlarına da toxunaraq bildirib ki, Azərbaycanın təsdiqlənmiş təbii qaz ehtiyatları növbəti yüz il ərzində həm ölkəmizin daxili tələbatını, həm də beynəlxalq tərəfdaşların ehtiyaclarını ödəmək üçün kifayət edəcəkdir. Bu fakt Azərbaycanın uzunmüddətli enerji strategiyasının davamlılığını və etibarlılığını nümayiş etdirir. Mövcud ehtiyatlar ölkəyə enerji ixracını uzun illər ərzində davam etdirmək, yeni bazarlara çıxmaq və beynəlxalq əməkdaşlığı genişləndirmək imkanı verir.
Azərbaycanın enerji siyasətinin ən mühüm nailiyyətlərindən biri isə şübhəsiz ki, Cənubi Qaz Dəhlizi layihəsidir. Bu nəhəng enerji infrastrukturu Xəzər hövzəsinin enerji resurslarını Avropa bazarlarına birləşdirən strateji enerji körpüsünə çevrilib. Prezident İlham Əliyevin qeyd etdiyi kimi, bu gün Cənubi Qaz Dəhlizi və onun genişləndirilmiş marşrutları vasitəsilə Azərbaycan qazı 16 ölkəyə çatdırılır. Bu ölkələrin bir çoxu Azərbaycan qazını öz enerji təhlükəsizliyinin əsas mənbələrindən biri kimi qiymətləndirir. Layihənin uğurla fəaliyyət göstərməsi Azərbaycanın beynəlxalq enerji bazarındakı mövqeyini daha da gücləndirir və ölkəmizin strateji əhəmiyyətini artırır.
Bakı Enerji Həftəsi çərçivəsində keçirilən tədbirlər bir daha göstərir ki, Azərbaycan enerji sahəsində əldə etdiyi uğurlarla kifayətlənmir, eyni zamanda yeni inkişaf mərhələsinə qədəm qoyur. Ənənəvi enerji resursları ilə yanaşı, yaşıl enerji layihələrinin inkişafı da dövlət siyasətinin əsas istiqamətlərindən biridir. Bununla yanaşı, neft və qaz sektorunda qazanılmış təcrübə, formalaşdırılmış beynəlxalq tərəfdaşlıq şəbəkəsi və etibarlı enerji siyasəti Azərbaycanın gələcək uğurlarının əsas təminatçısı olaraq qalır.
Nəticə etibarilə, Bakı Enerji Həftəsi və Xəzər Neft və Qaz Sərgisi Azərbaycanın müasir enerji tarixinin başlanğıc nöqtəsi olmaqla yanaşı, ölkəmizin qlobal enerji təhlükəsizliyinə verdiyi töhfələrin nümayiş olunduğu mühüm beynəlxalq platformadır. Prezident İlham Əliyevin açılış mərasimində vurğuladığı kimi, 1994-cü ildə əsası qoyulan enerji strategiyası bu gün də uğurla davam etdirilir və Azərbaycanı dünyanın etibarlı enerji tərəfdaşı kimi daha da möhkəmləndirir.

Sevda Quluyeva
YAP Kəngərli rayon təşkilatının sədri