Enerji təhlükəsizliyinin təminatında Azərbaycanın artan rolu

2026-cı il iyunun 1-də Bakı Ekspo Mərkəzində keçirilən Bakı Enerji Həftəsinin rəsmi açılış mərasimində Azərbaycan Prezidenti İlham Əliyev enerji təhlükəsizliyi, beynəlxalq əməkdaşlıq və yaşıl enerji keçidi ilə bağlı mühüm mesajlar səsləndirdi. Dövlət başçısının çıxışı Azərbaycanın qlobal enerji bazarında etibarlı tərəfdaş kimi mövqeyinin daha da möhkəmləndiyini və ölkənin dünya enerji təhlükəsizliyinə töhfələrinin artdığını bir daha nümayiş etdirdi.

Prezident vurğuladı ki, əsası uzun illər əvvəl qoyulan Xəzər Neft və Qaz Sərgisi bu gün artıq beynəlxalq enerji ictimaiyyətinin ən nüfuzlu platformalarından biri olan Bakı Enerji Həftəsinə çevrilib. Xüsusilə 1996-cı ildə imzalanmış “Şahdəniz” müqaviləsinin Azərbaycanın müasir qaz sənayesinin inkişafında mühüm mərhələ olduğu qeyd edildi. Həmin layihə ölkəmizin enerji ixracatçısı kimi mövqeyini gücləndirməklə yanaşı, bir çox dövlətlərin enerji təhlükəsizliyinin təmin olunmasına da töhfə verib.
Çıxışın əsas mövzularından biri enerji təhlükəsizliyi idi. Prezident İlham Əliyev bildirdi ki, enerji təhlükəsizliyi bu gün hər bir dövlət üçün milli təhlükəsizliyin ayrılmaz hissəsinə çevrilib. Son illərdə dünyada baş verən geosiyasi proseslər etibarlı enerji mənbələrinin və dayanıqlı təchizat marşrutlarının əhəmiyyətini daha da artırıb. Azərbaycan isə öz öhdəliklərinə daim sadiq qalaraq tərəfdaş ölkələrin enerji təminatında mühüm rol oynayır. Bu gün Azərbaycan qazı bir çox ölkəyə ixrac olunur və ölkəmizin enerji tərəfdaşlarının sayı davamlı olaraq artır.
Dövlət başçısı Azərbaycanın zəngin təbii qaz ehtiyatlarına malik olduğunu və mövcud ehtiyatların uzun illər həm ölkədaxili tələbatı, həm də ixrac öhdəliklərini qarşılamaq üçün kifayət etdiyini diqqətə çatdırdı. Bununla yanaşı, Azərbaycan yalnız karbohidrogen resurslarına arxalanmır, həm də bərpaolunan enerji mənbələrinin inkişafına böyük sərmayələr yatırır. Günəş və külək enerjisi layihələrinin həyata keçirilməsi ölkənin enerji sisteminin şaxələndirilməsinə və ekoloji dayanıqlığın gücləndirilməsinə xidmət edir.
Prezident İlham Əliyevin çıxışında beynəlxalq əməkdaşlığın əhəmiyyəti də xüsusi vurğulandı. Azərbaycanın enerji siyasətinin əsas prinsiplərindən biri qarşılıqlı etimada və faydalı tərəfdaşlığa əsaslanan əməkdaşlıq modelidir. Məhz bu siyasət nəticəsində ölkəmiz Avropa ilə Asiyanı birləşdirən mühüm enerji qovşaqlarından birinə çevrilib və qlobal enerji təhlükəsizliyinin təmin edilməsində etibarlı tərəfdaş kimi tanınır.
Bakı Enerji Həftəsinin açılış mərasimində səsləndirilən fikirlər göstərdi ki, Azərbaycan enerji sektorunda əldə etdiyi uğurlarla kifayətlənmir, gələcəyə hesablanmış strateji layihələr həyata keçirir. Neft və qaz ehtiyatlarından səmərəli istifadə ilə yanaşı, yaşıl enerji istiqamətində atılan addımlar ölkənin enerji təhlükəsizliyinə və dayanıqlı inkişafına xidmət edir. Bütün bunlar Azərbaycanın beynəlxalq enerji bazarında nüfuzunu artırır və ölkəmizin qlobal enerji təhlükəsizliyinə töhfəsini daha da gücləndirir.

Məhərrəm Hacıyev
YAP Kəngərli rayon təşkilatının fəalı