Azərbaycanın enerji strategiyasının uğurlu nəticələri - ŞƏRH

Bakı Ekspo Mərkəzində keçirilən Bakı Enerji Həftəsi çərçivəsində 31-ci Beynəlxalq Xəzər Neft və Qaz Sərgisi – “Caspian Oil and Gas”, 14-cü Xəzər Beynəlxalq Təmiz Enerji Sərgisi – “Caspian Power” və 31-ci “Baku Energy Forum”un açılış mərasimi baş tutub. Tədbirdə Azərbaycan Respublikasının Prezidenti İlham Əliyev iştirak edərək ölkənin enerji siyasətinin əsas istiqamətləri, əldə olunan nailiyyətlər və gələcək hədəflər barədə geniş məzmunlu çıxış edib.

Bakı Enerji Həftəsi artıq uzun illərdir ki, dünyanın enerji sektorunda fəaliyyət göstərən aparıcı şirkətləri, investorları və ekspertləri bir araya gətirən nüfuzlu platforma kimi tanınır. Bu tədbir Azərbaycanın beynəlxalq enerji bazarındakı rolunu nümayiş etdirməklə yanaşı, qlobal enerji əməkdaşlığının inkişafına da mühüm töhfə verir.

Prezident İlham Əliyev çıxışında Azərbaycanın müasir enerji strategiyasının təməlinin 1994-cü ildə Ümummilli Lider Heydər Əliyevin rəhbərliyi ilə qoyulduğunu vurğulayıb. Həmin dövrdə ölkə ciddi iqtisadi və siyasi çətinliklərlə üzləşmişdi. Ermənistanın hərbi təcavüzü nəticəsində torpaqlarımızın bir hissəsi işğal edilmiş, iqtisadiyyat isə ağır vəziyyətdə idi. Belə mürəkkəb şəraitdə həyata keçirilən uzaqgörən enerji siyasəti Azərbaycanın gələcək inkişafının əsasını təşkil etdi.

“Əsrin müqaviləsi” ilə başlayan yeni mərhələ ölkəmizə böyük investisiyaların cəlb olunmasına, enerji ehtiyatlarının beynəlxalq bazarlara çıxarılmasına və iqtisadi müstəqilliyin möhkəmlənməsinə imkan yaratdı. Təbii sərvətlərdən əldə olunan gəlirlər məqsədyönlü şəkildə infrastruktur layihələrinə, sosial proqramlara, təhsil və səhiyyə sahələrinin inkişafına yönəldildi. Bunun nəticəsində Azərbaycan regionun iqtisadi cəhətdən ən güclü dövlətlərindən birinə çevrildi.

Dövlət başçısı qeyd edib ki, bəzi hallarda enerji resurslarına malik ölkələr əsassız tənqidlərə məruz qalırlar. Halbuki hər bir suveren dövlət öz təbii sərvətlərindən xalqının rifahı və milli maraqları naminə istifadə etmək hüququna malikdir. Azərbaycan da məhz bu prinsipə əsaslanaraq enerji siyasətini müstəqil şəkildə formalaşdırır və milli maraqlara uyğun həyata keçirir.

Bu gün ölkəmizin əldə etdiyi sosial-iqtisadi göstəricilər həyata keçirilən siyasətin uğurunu təsdiqləyir. Son illərdə yoxsulluq və işsizlik səviyyəsinin minimum həddə enməsi, valyuta ehtiyatlarının artması, xarici borcun aşağı səviyyədə saxlanılması və beynəlxalq reytinqlərdə Azərbaycanın mövqeyinin güclənməsi bunun bariz nümunəsidir. Enerji sektorundan əldə olunan gəlirlər qeyri-neft sahələrinin inkişafına da təkan verərək iqtisadiyyatın şaxələndirilməsinə şərait yaradıb.

Azərbaycan ənənəvi enerji mənbələri ilə yanaşı, bərpa olunan enerji sahəsinə də xüsusi diqqət ayırır. Ölkəmiz yaşıl enerji strategiyasını uğurla həyata keçirərək günəş və külək enerjisi potensialının reallaşdırılması istiqamətində mühüm layihələr icra edir. Bu yanaşma Azərbaycanın qlobal iqlim çağırışlarına verdiyi töhfənin və gələcəyə hesablanmış siyasətinin göstəricisidir.

Azərbaycan enerji təhlükəsizliyinin təmin olunmasında etibarlı tərəfdaş kimi mövqeyini daha da möhkəmləndirir. Eyni zamanda ölkəmiz iqtisadi inkişaf, regional əməkdaşlıq və yaşıl enerji keçidi sahələrində həyata keçirdiyi təşəbbüslərlə beynəlxalq enerji gündəminin formalaşmasına mühüm təsir göstərir.

Türkanə Kərimova

YAP Babək rayon təşkilatının əməkdaşı