Milli Qurtuluşdan güclü Azərbaycana - ŞƏRH

Azərbaycan xalqının tarixində elə günlər var ki, onlar təkcə müəyyən bir tarixi hadisəni deyil, bütöv bir xalqın taleyini və gələcəyini əks etdirir. Belə əlamətdar günlərdən biri də 15 İyun – Milli Qurtuluş Günüdür. Bu gün Azərbaycan dövlətçiliyinin qorunması, ölkədə sabitliyin bərpası və gələcək inkişafın əsasının qoyulması baxımından xüsusi əhəmiyyət daşıyır. Məhz buna görə də 15 İyun Azərbaycan tarixində dönüş nöqtəsi kimi qiymətləndirilir.

Azərbaycan 1991-ci ildə dövlət müstəqilliyini bərpa etsə də, müstəqilliyin ilk illəri ölkəmiz üçün olduqca mürəkkəb və çətin keçmişdir. Həmin dövrdə ölkədə siyasi qeyri-sabitlik hökm sürür, iqtisadi vəziyyət ağırlaşır, idarəetmədə ciddi problemlər yaşanırdı. Ermənistanın Azərbaycana qarşı hərbi təcavüzü nəticəsində torpaqlarımızın bir hissəsi işğal edilmiş, yüz minlərlə insan doğma yurd-yuvasını tərk etməyə məcbur olmuşdu. Bütün bunlar ölkədə gərginliyi daha da artırır və dövlətçiliyin gələcəyini təhlükə altına salırdı.

1993-cü ildə vəziyyət daha da mürəkkəbləşmişdi. Hakimiyyət böhranı yaranmış, ölkədə vətəndaş qarşıdurması təhlükəsi meydana çıxmışdı. Azərbaycanın müstəqilliyinin itirilməsi və parçalanması ehtimalı real təhlükəyə çevrilmişdi. Belə bir şəraitdə xalq öz ümidini böyük dövlət xadimi Heydər Əliyevə bağladı. Xalqın təkidli tələbi ilə Heydər Əliyevin Bakıya qayıtması və 15 iyun 1993-cü ildə Azərbaycan Respublikası Ali Sovetinin sədri seçilməsi ölkənin taleyində yeni mərhələnin başlanğıcı oldu.

Heydər Əliyevin hakimiyyətə qayıdışı Azərbaycan dövlətçiliyinin xilasında həlledici rol oynadı. Onun siyasi təcrübəsi, qətiyyəti və uzaqgörənliyi sayəsində qısa müddət ərzində ölkədə sabitlik bərpa edildi, dövlət idarəçiliyi gücləndirildi və milli həmrəylik yaradıldı. İnsanlarda gələcəyə inam formalaşdı, ölkənin inkişafı üçün möhkəm siyasi zəmin yarandı.

Milli Qurtuluşun ən mühüm nəticələrindən biri hüquqi və demokratik dövlət quruculuğu prosesinin sürətlənməsi oldu. Dövlət institutlarının fəaliyyəti bərpa edildi, qanunvericilik sistemi təkmilləşdirildi və Azərbaycanın beynəlxalq aləmdə mövqeləri möhkəmləndi. Eyni zamanda ölkənin xarici siyasət kursu müəyyənləşdirildi və Azərbaycan beynəlxalq təşkilatlarla daha sıx əməkdaşlığa başladı.

Bu dövrdə iqtisadi sahədə də mühüm addımlar atıldı. Xarici investisiyaların cəlb edilməsi üçün əlverişli şərait yaradıldı, neft strategiyasının əsası qoyuldu və ölkənin iqtisadi inkişaf perspektivləri genişləndi. Sonrakı illərdə həyata keçirilən böyük enerji layihələri Azərbaycanın iqtisadi qüdrətinin artmasına, sosial rifahın yüksəlməsinə və beynəlxalq nüfuzunun güclənməsinə səbəb olduMilli Qurtuluşdan sonra əldə edilən sabitlik regionların inkişafına da müsbət təsir göstərdi. Yeni yollar, məktəblər, xəstəxanalar və digər infrastruktur layihələri həyata keçirildi. Regionlarda məşğulluq səviyyəsi yüksəldi, insanların həyat şəraitinin yaxşılaşdırılması istiqamətində mühüm tədbirlər görüldü. Bütün bunlar ölkənin hərtərəfli inkişafına xidmət etdi.

Bu gün Azərbaycanın əldə etdiyi uğurlara nəzər saldıqda Milli Qurtuluşun əhəmiyyətini daha aydın görmək mümkündür. Güclü dövlət quruculuğu, iqtisadi inkişaf, beynəlxalq nüfuzun artması və ölkənin ərazi bütövlüyünün tam bərpa olunması həmin dövrdə qoyulan möhkəm təməllərin nəticəsidir. Bu uğurlar Azərbaycan xalqının birliyinin və dövlətçilik ənənələrinə sadiqliyinin göstəricisidir.

Hüseyn Süleymanov

YAP Kəngərli rayon təşkilatının sədr müavini