Azərbaycan–Türkiyə ikitərəfli münasibətlərinin zirvə nöqtəsi - ŞƏRH

2021-ci il iyunun 15-də Azərbaycanın mədəniyyət paytaxtı olan Şuşa şəhərində imzalanmış Şuşa Bəyannaməsi Azərbaycan–Türkiyə münasibətlərinin tarixində mühüm dönüş nöqtəsi kimi qiymətləndirilir. Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan tərəfindən imzalanan bu sənəd iki qardaş ölkə arasında strateji tərəfdaşlığı müttəfiqlik səviyyəsinə yüksəltmişdir.
Azərbaycan və Türkiyə xalqları ortaq tarixə, dilə, mədəniyyətə və mənəvi dəyərlərə malikdir. Müstəqilliyini bərpa etdikdən sonra Azərbaycanın beynəlxalq aləmdə tanınan ilk tərəfdaşlarından biri Türkiyə olmuşdur. Ötən illər ərzində iki ölkə arasında siyasi, iqtisadi, hərbi, enerji, nəqliyyat, təhsil və humanitar sahələrdə əməkdaşlıq davamlı şəkildə inkişaf etmişdir. “Bir millət, iki dövlət” prinsipi əsasında qurulan münasibətlər regionda nümunəvi əməkdaşlıq modeli kimi qəbul edilir.
Şuşa Bəyannaməsi bu möhkəm təməl üzərində formalaşaraq tərəflərin qarşılıqlı dəstək və həmrəyliyini daha da gücləndirmişdir. Sənəddə milli təhlükəsizlik, müdafiə sənayesi, hərbi əməkdaşlıq, regional sabitlik, iqtisadi əlaqələrin genişləndirilməsi, enerji təhlükəsizliyi və nəqliyyat layihələrinin inkişafı kimi mühüm istiqamətlər öz əksini tapmışdır. Bəyannaməyə əsasən, tərəflərdən birinə qarşı təhdid və ya təcavüz halında qarşılıqlı məsləhətləşmələr aparılması və birgə fəaliyyət göstərilməsi nəzərdə tutulur.
Azərbaycan və Türkiyə arasında həyata keçirilən irimiqyaslı enerji və nəqliyyat layihələri də ikitərəfli münasibətlərin strateji əhəmiyyətini nümayiş etdirir. Bakı–Tbilisi–Ceyhan Neft Kəməri, TANAP və Bakı–Tbilisi–Qars Dəmir Yolu kimi layihələr yalnız iki ölkənin deyil, bütövlükdə regionun iqtisadi inkişafına və enerji təhlükəsizliyinə mühüm töhfələr verir.
Şuşa Bəyannaməsinin imzalanması Azərbaycanın ərazi bütövlüyünün bərpasından sonra azad edilmiş torpaqlarda baş tutması baxımından da xüsusi rəmzi məna daşıyır. Bu sənəd Azərbaycan və Türkiyənin bölgədə sülhün, təhlükəsizliyin və əməkdaşlığın möhkəmləndirilməsi istiqamətində ortaq iradəsini nümayiş etdirir.
Bu gün Azərbaycan–Türkiyə münasibətləri ən yüksək səviyyədə inkişaf edir. Şuşa Bəyannaməsi isə bu münasibətlərin hüquqi və siyasi əsaslarını daha da gücləndirərək iki qardaş ölkənin gələcək əməkdaşlığı üçün etibarlı yol xəritəsi rolunu oynayır. Müttəfiqlik münasibətlərinin möhkəmlənməsi regionda sabitliyin qorunmasına, iqtisadi tərəqqinin sürətlənməsinə və xalqlarımızın rifahının yüksəlməsinə xidmət edir. Şuşada imzalanan bu tarixi sənəd Azərbaycan–Türkiyə dostluğunun və qardaşlığının sarsılmaz olduğunu bir daha bütün dünyaya nümayiş etdirmişdir.

Lalə Mədətova
YAP Kəngərli rayon təşkilatının məsləhətçisi