Tarixin uçurumundan zəfərin zirvəsinə: 15 iyunun əbədi nuru və qalib Azərbaycanın uğurları - ŞƏRH

Zaman elə bir sərrafdır ki, millətlərin taleyini sınağa çəkəndə anları əsrlərə bərabər edir. Tarixin elə kəsikləri var ki, orada sadəcə təqvimlər dəyişmir, bütöv bir xalqın var olub-olmayacağı sualı həll olunur. Bizim yaxın tariximizin ən ağrılı, həm də ən şərəfli dönüş nöqtəsi – 1993-cü ilin o müqəddəs İyun günləridir. Bu gün uzaqdan baxanda sadəcə bir bayram günü kimi görünən 15 İyun, əslində, bir millətin intihardan imtina edib, yenidən ayağa qalxdığı, öz ləyaqətini və gələcəyini xilas etdiyi Qurtuluş dastanıdır.

Fırtınalı dənizdə kapitansız qalan gəmi: 1993

Gəlin, hafizəmizi bir anlıq 33 il əvvələ qaytaraq. O vaxt mənzərə necə idi? Küçələrdə gəzən çarəsizlik, qardaşın qardaşa tuşladığı silah, param-parça olmaq təhlükəsi yaşayan bir dövlət... Bir tərəfdən mənfur düşmənin torpaqlarımızı qarış-qarış işğal etməsi, digər tərəfdən Bakının küçələrində hökm sürən xaos və hakimiyyətsizlik. İnsanların gözlərində ümid deyil, dərin bir qorxu vardı. Müstəqilliyini yenicə qazanmış Azərbaycan adlı bir gəmi, kapitansız və dənizin ən qorxulu fırtınasının ortasında qayalara çırpılmaq üzrə idi. Dövlətçiliyimiz can verirdi. Küçələrdə, meydanlarda hamı eyni sualı verirdi: "Biz bu uçurumdan necə xilas olacağıq?"

Məhz o vaxt, ümidlərin tükəndiyi, qaranlığın ən qatı anında bütöv bir millətin nəzərləri tək bir ünvana – qədim Naxçıvana, Ümummilli Lider Heydər Əliyevə dikildi. Bu, sadəcə bir siyasi liderə çağırış deyildi; bu, boğulmaqda olan bir xalqın son nəfəsdə etdiyi xilas fəryadı idi.

Xilasın və dirçəlişin təməl daşı

1993-cü il iyunun 15-də dahi şəxsiyyət Heydər Əliyevin Azərbaycan Ali Sovetinin sədri seçilməsi ilə tarixin axarı dəyişdi. O, Bakıya gələndə özü ilə yalnız siyasi təcrübə gətirmədi, o, bu millətə itirdiyi inamı, sarsılmış qüruru və sönmüş ümidi qaytardı. Televiziya və radiolardan gələn o qətiyyətli, müdrik səs insanlara tək bir mesaj verirdi: "Bu dövlət var olacaq, bu millət parçalanmayacaq!"

Dahi rəhbər qardaş qırğınının qarşısını aldı, daxili çəkişmələrə son qoydu və qısa müddətdə dövlətin onurğa sütununu yenidən qurdu. 15 İyun sadəcə rəsmi bir qərarın tarixi deyil; o gün bu torpaqda yaşayan hər bir insanın azadlığının, evindəki dinc yuxusunun, namusunun və gələcəyinin qarantı olan müasir Azərbaycan dövlətinin təməli qoyuldu. Heydər Əliyev parçalanmaqda olan ölkədən bütöv bir sivilizasiya mərkəzi yaratmağın düsturunu yazdı."Dövləti olmayan millətin ordusu, ordusu olmayan millətin isə Zəfəri ola bilməz.

15 İyun Qurtuluşu olmasaydı, bu gün tarixin səhnəsində qalib bir Azərbaycan tapmaq qeyri-mümkün idi."

Heydər Əliyev kursunun zirvəsi: Prezident İlham Əliyevin möhtəşəm siyasəti

Azərbaycan xalqı olaraq bu gün bir həqiqəti daha dərindən dərk edirik: Ulu Öndərin o illərdə əkdiyi müqəddəs toxumlar bu gün möhtəşəm bir çinar kimi göylərə ucalıb. Bu müqəddəs irsi çiyinlərində daşıyan, ulu öndərin siyasi kursunu XXI əsrin qlobal çağırışları ilə uğurla sintez edən şəxsiyyət isə Yeni Azərbaycan Partiyasının sədri, Prezident İlham Əliyevdir.

Prezident İlham Əliyevin uzaqgörən rəhbərliyi altında Azərbaycan sadəcə xilas olmuş bir dövlətdən dünya miqyaslı güclü bir aktora çevrildi. Həyata keçirilən nəhəng transmilli iqtisadi layihələr, Bakı-Tbilisi-Ceyhan layihəsindən Cənub Qaz Dəhlizinə, kosmik sənayenin qurulmasından regional nəqliyyat qovşaqlarının mərkəzi olmağımıza qədər qazanılan hər bir uğur dövlətimizin qüdrətini bütün dünyaya nümayiş etdirdi. Güclü iqtisadiyyat, sarsılmaz daxili sabitlik və xalq-iqtidar birliyi müasir Azərbaycanın ən böyük vizit kartına çevrildi.

"Dəmir Yumruq"la gələn əbədi qurtuluş və şanlı zəfər

15 İyunda qoyulan möhkəm təməl olmasaydı, illər sonra bizim rəşadətli ordumuz, iqtisadi gücümüz və ən əsası, sarsılmaz milli birliyimiz formalaşa bilməzdi. Müzəffər Ali Baş Komandan İlham Əliyevin rəhbərliyi ilə qazandığımız Şanlı Zəfər, Şuşada, Xankəndidə, Xocalıda və Qarabağın hər bir guşəsində dalğalanan üçrəngli bayrağımız məhz o Qurtuluş fəlsəfəsinin ən ali zirvəsidir.

Dövlət başçısının rəhbərliyi və ordumuzun şücaəti ilə 30 illik işğala son qoyuldu, ulu öndərin ən böyük vəsiyyəti şərəflə yerinə yetirildi. Biz o gün xilas olduq ki, bu gün qalib ola bilək! Biz o gün ayaqda qaldıq ki, bu gün dünyaya ədalət və güc dərsi keçək!

Gələcəyə miras: əmanətə sədaqət andı

Bu gün müstəqil Azərbaycanın hər bir vətəndaşı, xüsusən də gənc nəsli bilməlidir ki, bu gün nəfəs aldığımız azad hava, küçələrimizdəki dinclik və dünyada fəxrlə gəzdirdiyimiz pasportumuz bizə asanlıqla başa gəlməyib. Bunun arxasında böyük bir dühanın fədakarlığı, Prezident İlham Əliyevin sarsılmaz iradəsi, şəhidlərimizin qanı və millətimizin dözümü dayanır.

Milli Qurtuluş Günü sadəcə keçmişi xatırlamaq günü deyil. Bu gün gələcəyə baxmaq, dövlətimizi Prezidentimizin ətrafında polad kimi sıx birləşərək daha da ucaltmaq üçün birgə and içmək günüdür. Çünki azadlıq elə bir xəzinədir ki, onu hər gün yenidən qorumalı və yaşatmalıyıq.

Milli Qurtuluş Günümüz mübarək!