Gədəbəydə Milli Qurtuluş Gününə həsr olunmuş dəyirmi masa keçirildi

15 İyun – Milli Qurtuluş Günü münasibətilə YAP Gədəbəy rayon təşkilatının və Gədəbəy Rayon İcra Hakimiyyətinin birgə təşkilatçılığı ilə Heydər Əliyev Mərkəzində dəyirmi masa keçirildi.

Tədbirdən əvvəl iştirakçılar Gədəbəy rayon mərkəzində yerləşən ümummilli lider Heydər Əliyevin abidəsini ziyarət edib, ulu öndərin əziz xatirəsinə dərin ehtiramlarını ifadə edərək abidənin önünə gül dəstələri düzdülər.

Heydər Əliyev Mərkəzində keçirilən dəyirmi masada YAP Gədəbəy rayon təşkilatının sədri Rüstəm Nağıyev, Gədəbəy Rayon İcra Hakimiyyətinin səlahiyyətlərini icra edən Natiq Nağıyev, idarə, müəssisə və təşkilatların rəhbərləri, YAP veteranları, gənclər və rayon ictimaiyyətinin nümayəndələri iştirak etdilər.

Tədbirdə geniş məruzə ilə çıxış edən YAP Gədəbəy rayon təşkilatının sədri Rüstəm Nağıyev 15 İyun – Milli Qurtuluş Gününün Azərbaycan tarixində taleyüklü dönüş nöqtəsi olduğunu bildirib. O qeyd edib ki, bu gün dövlətçiliyimizin xilas edildiyi və sabit inkişaf yoluna qədəm qoyduğu mühüm mərhələ kimi tarixə düşüb. R. Nağıyev 1993-cü ildə ümummilli lider Heydər Əliyevin xalqın tələbi ilə siyasi hakimiyyətə qayıdışının ölkədə hökm sürən xaos və böhranı aradan qaldıraraq güclü dövlət quruculuğunun əsasını qoyduğunu vurğuladı.

Daha sonra Gədəbəy Rayon İcra Hakimiyyətinin səlahiyyətlərini icra edən Natiq Nağıyev çıxış edərək Milli Qurtuluş Gününün Azərbaycanın müstəqillik tarixində mühüm siyasi hadisə olduğunu qeyd edib. O bildirib ki, məhz bu dönüş sayəsində ölkədə sabitlik təmin olunmuş, dövlət institutları möhkəmləndirilmiş və ardıcıl inkişaf strategiyası formalaşdırılmışdır.

YAP veteranı Namiq Rüstəmov çıxışında 15 İyun tarixinin gənc nəslin vətənpərvərlik ruhunda formalaşmasında mühüm əhəmiyyət daşıdığını qeyd edib. O vurğulayıb ki, ümummilli lider Heydər Əliyevin müəyyən etdiyi dövlətçilik xətti bu gün də Azərbaycanın davamlı və uğurlu inkişafının əsasını təşkil edir.

Daha sonra digər çıxış edənlər də Milli Qurtuluş Gününün tarixi əhəmiyyəti barədə fikirlərini bölüşüblər.