Xalqın həmrəy olmağı üçün nüfuzlu siyasi Lider – Ulu Öndər Heydər Əliyevə ehtiyac duyulurdu - ŞƏRH

Bildiyiniz kimi, XX əsrin sonlarında Azərbaycan xalqı öz tarixinin ən mürəkkəb və taleyüklü dövrlərindən birini yaşayırdı. Keçmiş Sovet İttifaqının dağılmasından sonra ölkədə siyasi qeyri-sabitlik, iqtisadi çətinliklər, idarəetmədə yaranmış problemlər və Ermənistanın Azərbaycana qarşı hərbi təcavüzü nəticəsində yaranan ağır vəziyyət insanları ciddi narahat edirdi. Müstəqilliyini yenicə bərpa etmiş Azərbaycan həm daxili, həm də xarici təhlükələrlə üz-üzə qalmışdı. Ölkədə sabitliyin pozulması, müxtəlif siyasi qruplar arasında qarşıdurmalar və xalqın gələcəklə bağlı narahatlığı Azərbaycan dövlətçiliyini təhlükə altına salmışdı. Belə bir zamanda xalqı bir araya gətirəcək, insanlarda inam yaradacaq, dövlətçiliyi qoruyacaq və ölkəni bu çətin vəziyyətdən çıxaracaq güclü və nüfuzlu liderə ehtiyac duyulurdu. Bu lider isə Ulu Öndər Heydər Əliyev idi.1993-cü ilin iyun ayında ölkədə vəziyyət daha da gərginləşmişdi. Hakimiyyət böhranı, silahlı qarşıdurmalar və xaos təhlükəsi Azərbaycanın gələcəyini sual altına qoyurdu. İnsanlar ölkənin taleyi üçün ciddi narahatlıq keçirirdilər. Məhz belə bir vaxtda xalq öz xilaskarını Heydər Əliyevin simasında gördü və onu yenidən hakimiyyətə dəvət etdi. Bu çağırış xalqın ona olan böyük etimadının və inamının göstəricisi idi. Çünki Heydər Əliyev uzun illər ərzində qazandığı idarəçilik təcrübəsi, qətiyyəti, uzaqgörənliyi və xalqın maraqlarını hər şeydən üstün tutması ilə tanınırdı.
Ulu Öndərin hakimiyyətə qayıdışı ölkədə sabitliyin bərpa olunmasına yol açdı. O, ilk növbədə dövlətçiliyin qorunmasını və xalqın birliyinin təmin olunmasını əsas məqsəd kimi qarşıya qoydu. Heydər Əliyev yaxşı bilirdi ki, xalqın gücü onun birliyindədir. Buna görə də cəmiyyətdə həmrəylik yaratmağa, insanları ümumi məqsədlər ətrafında birləşdirməyə çalışdı. Onun çağırışları və fəaliyyəti nəticəsində insanlar dövlətin ətrafında sıx birləşməyə başladılar. Ölkədə qarşıdurmaların qarşısı alındı, sabitlik yaradıldı və vətəndaşların gələcəyə olan inamı yenidən bərpa edildi.
Heydər Əliyevin xalq arasında böyük nüfuza malik olmasının əsas səbəblərindən biri onun hər zaman xalqın yanında olması idi. O, insanların problemlərini dinləyir, onların qayğıları ilə maraqlanır və ölkənin inkişafı üçün gecə-gündüz çalışırdı. Xalq da öz növbəsində onun ətrafında birləşərək dövlətin möhkəmlənməsinə dəstək verirdi. Bu qarşılıqlı etimad və inam Azərbaycanın çətin günlərdən çıxmasında mühüm rol oynadı.
Ulu Öndər xalqın milli-mənəvi dəyərlərinin qorunmasına da xüsusi diqqət yetirirdi. O, azərbaycançılıq ideyasını ön plana çəkərək bütün vətəndaşları Vətən sevgisi, milli birlik və dövlətçilik prinsipləri ətrafında birləşməyə çağırırdı. Bu ideya Azərbaycanın müxtəlif bölgələrində yaşayan insanları vahid məqsəd uğrunda bir araya gətirdi. İnsanlar milli mənsubiyyətləri, dini baxışları və ya siyasi mövqelərindən asılı olmayaraq Azərbaycanın inkişafı naminə birlik nümayiş etdirməyə başladılar.
Heydər Əliyevin həyata keçirdiyi siyasət nəticəsində ölkədə iqtisadi inkişaf üçün də əlverişli şərait yarandı. Xarici investorların Azərbaycana marağı artdı, yeni layihələr həyata keçirildi, iş yerləri açıldı və insanların sosial rifahının yaxşılaşdırılması istiqamətində mühüm addımlar atıldı. Bütün bunlar ölkədə sabitliyin möhkəmlənməsinə və xalqın dövlətə olan inamının daha da artmasına səbəb oldu.
Ulu Öndər həm də Azərbaycanın beynəlxalq aləmdə tanınması və nüfuz qazanması istiqamətində mühüm işlər gördü. Onun həyata keçirdiyi uğurlu xarici siyasət nəticəsində Azərbaycan dünyanın müxtəlif ölkələri ilə əməkdaşlığını genişləndirdi, beynəlxalq təşkilatlarda mövqeyini gücləndirdi və öz müstəqil siyasətini inamla həyata keçirməyə başladı. Bu uğurlar xalqda qürur hissi yaradır, milli birliyi daha da gücləndirirdi.
Bu gündə Heydər Əliyevin müəyyən etdiyi inkişaf yolu Cənab Prezident İlham Əliyev Tərəfindən davam etdirilir.Prezident İlham əliyev Ulu Öndərin siyasi kursunun layiqincə davam etdirməklə,xalqımızın və dövlətçiliyimizin bu kursun mahiyyətindən doğan milli maraqlarını beynəlxalq miqyasda təmin edir .Heydər Əliyev siyasətinin uğurla həyata keçirilməsi müstəqilliyimizi möhkəmləndirir, dövlətçiliyimizi qüdrətləndirir və nəticədə beynəlxalq aləmdə ölkəmizin əhəmiyyətli rolunu və nüfuzunu artırır.Ulu Öndər Heydər Əliyevin əsasını qoyduğu siyasət nəticəsində,Cənab Prezident İlham Əliyev tərəfindən Azərbaycan öz dövrünün ən parlaq günlərini yaşayır.

Xəzəngül Orucova

Naxçıvan Muxtar Respublikası Ali Məclisinin deputatı