15 İyun – Milli Qurtuluş Günü: Azərbaycanın xilas və tərəqqi yolunun başlanğıcı - ŞƏRH

Azərbaycan xalqının tarixində xüsusi yer tutan 15 İyun – Milli Qurtuluş Günü dövlətçiliyimizin qorunub saxlanılması, ölkəmizin sabitliyə və inkişaf yoluna qədəm qoyması baxımından mühüm əhəmiyyət daşıyır. Bu tarixi gün xalqımızın taleyində dönüş nöqtəsi olmaqla yanaşı, müstəqil Azərbaycanın gələcəyinin müəyyənləşdirilməsində həlledici rol oynamışdır.
1990-cı illərin əvvəllərində Azərbaycan mürəkkəb siyasi və iqtisadi vəziyyətlə üz-üzə qalmışdı. Ölkədə hökm sürən xaos, hakimiyyət uğrunda mübarizə, iqtisadi böhran və Ermənistanın hərbi təcavüzü dövlət müstəqilliyini ciddi təhlükə qarşısında qoymuşdu. Belə bir ağır şəraitdə xalqın təkidli tələbi ilə ümummilli lider Heydər Əliyevin hakimiyyətə qayıdışı Azərbaycanın xilası üçün mühüm dönüş yaratdı.
1993-cü il iyunun 15-də Heydər Əliyev Azərbaycan Respublikası Ali Sovetinin Sədri seçildi. Məhz bu tarix sonradan Milli Qurtuluş Günü kimi qeyd olunmağa başladı. Ümummilli liderin uzaqgörən siyasəti nəticəsində ölkədə siyasi sabitlik təmin edildi, dövlət institutları möhkəmləndirildi, vətəndaş qarşıdurmasının qarşısı alındı və Azərbaycan inkişaf yoluna qədəm qoydu.
Milli Qurtuluş Azərbaycanın beynəlxalq aləmdə nüfuzunun artmasına, iqtisadi islahatların həyata keçirilməsinə və müstəqil dövlət quruculuğunun möhkəmlənməsinə geniş imkanlar yaratdı. 1994-cü ildə imzalanan “Əsrin müqaviləsi” ölkəmizin iqtisadi inkişafının əsasını qoydu, xarici investisiyaların cəlb edilməsinə və enerji strategiyasının uğurla həyata keçirilməsinə şərait yaratdı.
Bu gün Prezident İlham Əliyevin rəhbərliyi ilə Heydər Əliyev siyasi kursu uğurla davam etdirilir. Azərbaycanın ərazi bütövlüyünün bərpası, iqtisadi qüdrətinin artması, beynəlxalq nüfuzunun yüksəlməsi və regionun aparıcı dövlətinə çevrilməsi Milli Qurtuluş ideyalarının real nəticələridir.
15 İyun – Milli Qurtuluş Günü Azərbaycan xalqının birlik, həmrəylik və dövlətçilik iradəsinin təntənəsidir. Bu əlamətdar tarix xalqımızın müstəqilliyinin qorunmasının, sabitliyin və davamlı inkişafın rəmzi kimi hər zaman böyük ehtiramla qeyd olunur. Milli Qurtuluş Günü bir daha sübut edir ki, güclü liderlik, xalqın iradəsi və milli birlik ölkənin gələcəyinin ən etibarlı təminatıdır.
Süleyman Tağıyev
YAP Sədərək rayon təşkilatının məsləhətçisi