Prezident İlham Əliyevin hakimiyyəti dövründə ordu quruculuğu məsələləri hər zaman diqqət mərkəzində olub

Prezident İlham Əliyevin rəhbərliyi ilə həyata keçirilən uğurlu dövlət siyasətinin ən mühüm istiqamətlərindən biri Azərbaycan Ordusunun gücləndirilməsi və müasir tələblərə uyğun inkişaf etdirilməsi olmuşdur. Son illər ərzində ölkəmizin iqtisadi imkanlarının artması müdafiə sahəsinə ayrılan vəsaitin də əhəmiyyətli dərəcədə yüksəlməsinə şərait yaratmış, nəticədə Silahlı Qüvvələrimiz regionun ən güclü ordularından birinə çevrilmişdir.Prezident, Silahlı Qüvvələrin Ali Baş Komandanı İlham Əliyev dəfələrlə vurğulamışdır ki, güclü dövlətin əsas dayaqlarından biri güclü ordudur. Məhz bu yanaşmanın nəticəsidir ki, Azərbaycan Ordusunun maddi-texniki bazası müasir standartlara uyğun şəkildə yenilənmiş, ən son texnologiyalara malik silah və hərbi texnika arsenalımıza daxil edilmişdir. Hərbi hissələrdə xidmət şəraitinin yaxşılaşdırılması, yeni hərbi şəhərciklərin, qərargahların və digər infrastruktur obyektlərinin tikilməsi şəxsi heyətin döyüş hazırlığının daha da yüksəldilməsinə xidmət etmişdir.Ali Baş Komandanın diqqət və qayğısı nəticəsində hərbi təhsil sistemi də yeni inkişaf mərhələsinə qədəm qoymuşdur. Peşəkar zabit kadrlarının hazırlanması, beynəlxalq təcrübənin öyrənilməsi və müasir döyüş taktikasının tətbiqi istiqamətində mühüm addımlar atılmışdır. Orduda nizam-intizamın gücləndirilməsi, idarəetmə sisteminin təkmilləşdirilməsi və döyüş hazırlığının artırılması məqsədilə mütəmadi təlimlər keçirilmiş, hərbi qulluqçuların peşəkarlıq səviyyəsi daha da yüksəldilmişdir.
Azərbaycan Ordusunun keçdiyi inkişaf yolunun ən parlaq göstəricisi 2020-ci ildə baş vermiş 44 günlük Vətən müharibəsində əldə edilən tarixi Zəfərdir. Prezident İlham Əliyevin qətiyyətli siyasi iradəsi, yüksək sərkərdəlik bacarığı və dəqiq müəyyən edilmiş strategiyası nəticəsində Azərbaycan Ordusu işğal altında olan torpaqlarımızı azad etdi. Bu Qələbə təkcə hərbi uğur deyil, həm də uzun illər ərzində həyata keçirilən məqsədyönlü ordu quruculuğu siyasətinin məntiqi nəticəsi idi.Vətən müharibəsindən sonra da Azərbaycan Ordusunun inkişafı dayandırılmamış, əksinə yeni mərhələyə qədəm qoymuşdur. Azad edilmiş ərazilərdə yeni hərbi hissələr yaradılmış, komando birlikləri formalaşdırılmış, sərhədlərimizin təhlükəsizliyinin təmin olunması istiqamətində mühüm tədbirlər həyata keçirilmişdir. Ordumuzun döyüş qabiliyyətinin daha da artırılması məqsədilə yeni silah sistemləri alınmış, müasir texnologiyalar tətbiq edilmiş və hərbi idarəetmə mexanizmləri təkmilləşdirilmişdir.2023-cü ildə həyata keçirilən antiterror tədbirləri nəticəsində Azərbaycanın suverenliyinin bütün ərazidə tam bərpa olunması da ordumuzun yüksək peşəkarlığının və gücünün növbəti təzahürü oldu. Bu uğurlar bir daha göstərdi ki, Prezident İlham Əliyevin rəhbərliyi ilə həyata keçirilən ordu quruculuğu siyasəti Azərbaycan dövlətinin təhlükəsizliyinin etibarlı təminatına çevrilmişdir.Bu gün Azərbaycan Ordusu xalqımızın qürur mənbəyi, dövlətimizin müstəqilliyinin və suverenliyinin əsas dayaqlarından biridir. Prezident İlham Əliyevin rəhbərliyi altında həyata keçirilən uğurlu siyasət nəticəsində Silahlı Qüvvələrimiz qarşıya qoyulan bütün vəzifələri yerinə yetirməyə qadir olan, yüksək peşəkarlığa və müasir imkanlara malik qüdrətli bir ordu kimi fəaliyyətini davam etdirir.

Sərkərova Lyudmila

YAP Qusar rayon təşkilatının fəalı