Azərbaycan Ordusu – müstəqilliyimizin qarantı və zəfərimizin mənbəyi - ŞƏRH

Azərbaycan xalqının dövlətçilik tarixində ordu quruculuğu hər zaman xüsusi əhəmiyyət kəsb etmişdir. Güclü və müstəqil dövlətin əsas dayaqlarından biri onun Silahlı Qüvvələridir. Ordu yalnız ölkənin sərhədlərini qoruyan hərbi qüvvə deyil, eyni zamanda dövlət müstəqilliyinin, milli təhlükəsizliyin və xalqın gələcəyinin təminatçısıdır. Bu gün Azərbaycan Ordusu regionun ən güclü hərbi qüvvələrindən biri olmaqla yanaşı, dünyanın nüfuzlu orduları sırasında layiqli yer tutur. Bu uğurun təməlində isə məqsədyönlü dövlət siyasəti, xalq-iqtidar birliyi və hərbçilərimizin qəhrəmanlığı dayanır.

Azərbaycan milli ordusunun yaranma tarixi Azərbaycan Xalq Cümhuriyyəti dövrünə təsadüf edir. 1918-ci il iyunun 26-da Azərbaycan Xalq Cümhuriyyətinin qərarı ilə Əlahiddə Azərbaycan Korpusu yaradıldı və bununla da milli ordunun əsası qoyuldu. Məhz buna görə də hər il 26 İyun Azərbaycanda Silahlı Qüvvələr Günü kimi qeyd olunur. Qısa müddət ərzində formalaşdırılan milli ordu ölkənin müdafiəsinin təşkilində mühüm rol oynasa da, Cümhuriyyətin süqutu bu prosesin davamlı inkişafına mane oldu.
Azərbaycan yenidən dövlət müstəqilliyini bərpa etdikdən sonra milli ordu quruculuğu məsələsi qarşıda duran ən vacib vəzifələrdən biri oldu. Lakin müstəqilliyin ilk illərində ölkədə hökm sürən siyasi böhran, hakimiyyət uğrunda mübarizə və idarəetmədəki xaos güclü ordunun formalaşdırılmasına ciddi maneələr yaradırdı.
Azərbaycan Ordusunun formalaşması və inkişafında Ümummilli Lider Heydər Əliyevin misilsiz xidmətləri olmuşdur. Hələ 1969-cu ildə respublikaya rəhbər seçildikdən sonra Heydər Əliyev milli hərbi kadrların hazırlanmasına böyük diqqət yetirmişdir. Onun təşəbbüsü ilə gənclərin hərbi təhsil almasına geniş imkanlar yaradılmışdır.
1993-cü ildə xalqın tələbi ilə siyasi hakimiyyətə qayıdan Ulu Öndər Heydər Əliyev ölkədə dövlətçiliyin xilası ilə yanaşı, nizami ordu quruculuğu istiqamətində də qətiyyətli addımlar atdı. Silahlı dəstələr vahid komandanlıq altında birləşdirildi, hərbi hissələrdə nizam-intizam gücləndirildi və peşəkar ordunun təməli qoyuldu.
Ulu Öndərin əsasını qoyduğu ordu quruculuğu siyasəti Prezident, Silahlı Qüvvələrin Ali Baş Komandanı İlham Əliyev tərəfindən uğurla davam etdirilmişdir. Son illərdə müdafiə sənayesinin inkişafı, hərbi büdcənin artırılması, ordunun ən müasir silah və texnika ilə təchiz olunması istiqamətində mühüm işlər görülmüşdür.
Müasir hərbi texnologiyaların tətbiqi Azərbaycan Ordusunun döyüş imkanlarını əhəmiyyətli dərəcədə artırmışdır. Ordumuzun arsenalına daxil edilmiş müasir pilotsuz uçuş aparatları, raket sistemləri və digər texnologiyalar Silahlı Qüvvələrimizin gücünü daha da artırmışdır.
Azərbaycan Ordusunun gücü və peşəkarlığı 2016-cı ilin Aprel döyüşlərində özünü aydın şəkildə göstərdi. Bu qələbə Azərbaycan xalqında böyük ruh yüksəkliyi yaratmaqla yanaşı, ordumuzun qarşıya qoyulan istənilən vəzifəni yerinə yetirməyə qadir olduğunu sübut etdi.
2020-ci il sentyabrın 27-də başlayan və 44 gün davam edən Vətən müharibəsi Azərbaycan Ordusunun gücünü bütün dünyaya nümayiş etdirdi. Müzəffər Ali Baş Komandan İlham Əliyevin rəhbərliyi altında Azərbaycan Ordusu misilsiz qəhrəmanlıq göstərərək işğal altında olan torpaqlarımızı azad etdi. Şuşanın azad olunması Azərbaycanın hərbi tarixində əbədi qalacaq şanlı səhifələrdən biri oldu.
Vətən müharibəsində qazanılan möhtəşəm Zəfər nəticəsində Azərbaycan öz ərazi bütövlüyünü bərpa etdi. Bu qələbə yalnız hərbi uğur deyil, həm də xalqımızın milli qürurunun, birliyinin və dövlətə sədaqətinin təntənəsi idi.
2023-cü ilin sentyabr ayında həyata keçirilmiş lokal xarakterli antiterror tədbirləri nəticəsində Azərbaycanın dövlət suverenliyi ölkənin bütün ərazisində tam təmin olundu. Bununla da Azərbaycan bayrağı ölkəmizin bütün ərazilərində dalğalanmağa başladı.
Ordunun daha da gücləndirilməsi istiqamətində həyata keçirilən mühüm yeniliklərdən biri Komando Qüvvələrinin yaradılmasıdır. Müasir döyüş şəraitinə uyğun hazırlanmış komando birlikləri yüksək peşəkarlıq və çeviklik nümayiş etdirirlər.
Bu gün Azərbaycan Ordusu yalnız regionun deyil, dünyanın ən güclü ordularından biri hesab olunur. Ordumuzun sıralarında xidmət edən hər bir əsgər və zabit Vətənə sədaqət, xalqına məhəbbət və dövlətə bağlılıq nümunəsidir.
Azərbaycan Ordusu müstəqilliyimizin etibarlı təminatçısı, dövlətçiliyimizin dayağı və xalqımızın qürur mənbəyidir. Qazanılan tarixi Zəfər, bərpa olunan ərazi bütövlüyü və güclü ordu quruculuğu siyasəti Azərbaycanın gələcək inkişafı üçün möhkəm zəmin yaratmışdır.

Ayaz Novruzov

YAP Culfa rayon Camaldın kənd ərazi partiya təşkilatının sədri