Azərbaycan–Türkmənistan münasibətləri yeni inkişaf mərhələsində - ŞƏRH

İyunun 22-də Azərbaycan Respublikasının Prezidenti İlham Əliyev və Türkmənistan Prezidenti Sərdar Berdiməhəmmədov mətbuata bəyanatlarla çıxış edərək iki dost və qardaş ölkə arasında münasibətlərin hazırkı vəziyyəti, gələcək əməkdaşlıq istiqamətləri və regional əhəmiyyət daşıyan layihələr barədə mühüm mesajlar verdilər.

Prezident İlham Əliyevin çıxışında xüsusi vurğulanan məqamlardan biri Azərbaycan ilə Türkmənistan arasında dostluq və qardaşlıq münasibətlərinin tarixi köklərə söykənməsi, bu münasibətlərin qarşılıqlı hörmət, etimad və strateji tərəfdaşlıq prinsipləri əsasında sürətlə inkişaf etməsi oldu. Dövlət başçısı qeyd etdi ki, xalqlarımızı ortaq tarix, mədəniyyət, dil və milli-mənəvi dəyərlər birləşdirir. Bu amillər isə ikitərəfli əlaqələrin daha da möhkəmlənməsi üçün etibarlı zəmin yaradır.

Azərbaycanın həyata keçirdiyi uğurlu xarici siyasətin əsas istiqamətlərindən biri dost və qardaş dövlətlərlə əməkdaşlığın genişləndirilməsidir. Türkmənistanla münasibətlər də məhz bu siyasətin mühüm tərkib hissəsidir. Son illər iki ölkə arasında siyasi dialoqun intensivləşməsi, qarşılıqlı səfərlərin artması, imzalanan sənədlər və həyata keçirilən birgə layihələr münasibətlərin keyfiyyətcə yeni mərhələyə yüksəldiyini nümayiş etdirir.

Prezident İlham Əliyev bəyanatında iqtisadi əməkdaşlığın genişləndirilməsinin vacibliyini də xüsusi qeyd etdi. Bildirildi ki, ticarət dövriyyəsinin artırılması, sənaye, kənd təsərrüfatı, logistika və digər sahələrdə yeni əməkdaşlıq imkanlarının reallaşdırılması üçün böyük potensial mövcuddur. Hər iki ölkənin iqtisadi imkanları və qarşılıqlı maraqları bu istiqamətdə mühüm nəticələrin əldə olunacağına əsas verir.

Çıxışda enerji sahəsində əməkdaşlıq da əsas mövzulardan biri oldu. Azərbaycan və Türkmənistan Xəzər hövzəsinin mühüm enerji dövlətləri kimi regionun enerji təhlükəsizliyinin təmin edilməsində mühüm rol oynayırlar. Prezident İlham Əliyev qeyd etdi ki, enerji sahəsində əməkdaşlığın genişləndirilməsi həm ölkələrimizin maraqlarına, həm də beynəlxalq enerji təhlükəsizliyinə xidmət edir. Azərbaycanın yaratdığı müasir enerji infrastrukturu və ixrac marşrutları Türkmənistan üçün də geniş imkanlar açır.

Dövlət başçısı nəqliyyat və logistika sahəsində əməkdaşlığın inkişafına da toxunaraq vurğuladı ki, Azərbaycan Şərq-Qərb və Şimal-Cənub beynəlxalq nəqliyyat dəhlizlərinin əsas iştirakçılarından biridir. Türkmənistanın da bu marşrutlarda mühüm mövqeyə malik olması ölkələrimiz arasında yükdaşımaların həcmini artırmaqla yanaşı, bütün region üçün yeni iqtisadi imkanlar yaradır. Xəzər dənizi üzərindən həyata keçirilən daşımaların genişləndirilməsi Orta Dəhlizin əhəmiyyətini daha da artırır.

Prezident İlham Əliyev Türk dünyasının birliyinin möhkəmləndirilməsinin vacibliyini də ön plana çəkdi. Azərbaycanın təşəbbüsü və fəal iştirakı ilə türk dövlətləri arasında siyasi, iqtisadi, humanitar və mədəni əməkdaşlıq ildən-ilə genişlənir. Türkmənistanın beynəlxalq neytrallıq statusuna baxmayaraq, türk dövlətləri ilə əlaqələrinin inkişaf etdirilməsi ümumi həmrəyliyin güclənməsinə mühüm töhfə verir.

Bəyanatda beynəlxalq təşkilatlar çərçivəsində qarşılıqlı dəstək məsələlərinə də toxunuldu. Prezident İlham Əliyev bildirdi ki, Azərbaycan və Türkmənistan beynəlxalq platformalarda daim bir-birinin mövqeyini dəstəkləyir və bu əməkdaşlıq gələcəkdə də davam etdiriləcək. Bu qarşılıqlı etimad ölkələrimizin beynəlxalq nüfuzunun möhkəmlənməsinə də xidmət edir.

Azərbaycanın təşəbbüsü ilə reallaşdırılan irimiqyaslı nəqliyyat və enerji layihələrinin regionun geosiyasi və geoiqtisadi əhəmiyyətini artırdığı artıq beynəlxalq səviyyədə qəbul edilir. Türkmənistanın bu layihələrdə daha fəal iştirakı Xəzər regionunun iqtisadi inteqrasiyasını gücləndirəcək, Avropa ilə Asiya arasında etibarlı əlaqələrin daha da möhkəmlənməsinə şərait yaradacaq.

Prezident İlham Əliyevin mətbuata bəyanatı bir daha göstərdi ki, Azərbaycan–Türkmənistan münasibətləri yalnız ikitərəfli əməkdaşlıq çərçivəsində deyil, bütövlükdə Türk dünyasının inteqrasiyası, regional sabitlik, enerji təhlükəsizliyi və beynəlxalq nəqliyyat əlaqələrinin inkişafı baxımından da strateji əhəmiyyət daşıyır. Qarşılıqlı etimad və siyasi iradəyə əsaslanan bu münasibətlər gələcəkdə daha geniş layihələrin həyata keçirilməsinə, xalqlarımızın rifahına və regionun davamlı inkişafına mühüm töhfələr verəcək.

Sahib Şükürov

YAP Göyçay rayon təşkilatının sədri