Azərbaycan-Türkmənistan qardaşlığının parlaq nümunəsi - ŞƏRH

2026-cı il iyunun 22-də Türkmənistan Prezidenti Sərdar Berdiməhəmmədovun Azərbaycana dövlət səfəri çərçivəsində keçirilən görüşlər və mətbuata verilən bəyanatlar Azərbaycan-Türkmənistan münasibətlərinin strateji tərəfdaşlıq səviyyəsində uğurla inkişaf etdiyini bir daha nümayiş etdirdi. Prezident İlham Əliyevin səsləndirdiyi “Qarabağın bərpasında köməyə görə Türkmənistana, əziz qardaşım Arkadağ Qurbanqulu Məlikquliyeviç Berdiməhəmmədova bir daha təşəkkürümü bildirmək istərdim” fikri isə iki qardaş ölkə arasında mövcud olan səmimi dostluğun, qarşılıqlı hörmətin və həmrəyliyin ən bariz ifadələrindən biri kimi xüsusi əhəmiyyət daşıyır.

Azərbaycan və Türkmənistan xalqlarını ortaq tarixi köklər, dil, mədəniyyət və mənəvi dəyərlər birləşdirir. Bu amillər əsrlər boyu formalaşmış qardaşlıq münasibətlərinin əsasını təşkil edir. Məhz bu möhkəm təməl üzərində qurulan dövlətlərarası əlaqələr son illərdə daha da inkişaf edərək strateji tərəfdaşlıq mərhələsinə yüksəlib. Türkmənistanın Qarabağın bərpası prosesində göstərdiyi dəstək də bu qardaşlıq münasibətlərinin praktik təzahürüdür.

İşğaldan azad edilmiş ərazilərdə genişmiqyaslı quruculuq və bərpa işləri Azərbaycanın dövlət siyasətinin əsas prioritetlərindən biridir. Prezident İlham Əliyevin rəhbərliyi ilə həyata keçirilən bu proses yalnız infrastrukturun yenidən qurulması deyil, həm də tarixi ədalətin bərpası, insanların doğma torpaqlarına qayıdışının təmin edilməsi və regionun sosial-iqtisadi inkişafının sürətləndirilməsi məqsədini daşıyır. Bu mühüm mərhələdə dost və qardaş ölkələrin mənəvi və praktiki dəstəyi xüsusi önəm kəsb edir.

Türkmənistanın Qarabağın yenidən qurulmasına verdiyi töhfə iki ölkə arasında mövcud olan yüksək etimadın və qarşılıqlı dəstəyin göstəricisidir. Prezident İlham Əliyevin Türkmənistanın Milli Lideri, Xalq Məsləhətinin sədri Qurbanqulu Berdiməhəmmədova xüsusi təşəkkürünü ifadə etməsi, Azərbaycan xalqının bu dəstəyi yüksək qiymətləndirdiyini göstərir. Bu təşəbbüs təkcə maddi yardım deyil, həm də qardaş Türkmənistanın Azərbaycanın ərazi bütövlüyünün bərpasından sonra həyata keçirdiyi quruculuq prosesinə mənəvi dəstəyinin ifadəsidir.

Prezident İlham Əliyev mətbuata bəyanatında vurğulayıb ki, həm təkbətək, həm də geniş tərkibdə keçirilən görüşlər zamanı ikitərəfli əməkdaşlığın bütün mühüm istiqamətləri ətrafında ətraflı fikir mübadiləsi aparılıb və gələcək fəaliyyətin prioritetləri müəyyənləşdirilib. Bu əməkdaşlıq enerji, nəqliyyat, logistika, ticarət, humanitar və digər sahələri əhatə edir. Qarabağın bərpası istiqamətində əməkdaşlıq isə bu münasibətlərə əlavə məzmun qazandıraraq tərəfdaşlığın daha da dərinləşməsinə xidmət edir.

Azərbaycan və Türkmənistan arasında iqtisadi əməkdaşlıq da sürətlə genişlənir. Xəzər dənizi vasitəsilə həyata keçirilən yükdaşımaların artması, Şərq-Qərb və Orta Dəhliz layihələrinin inkişafı iki ölkənin geoiqtisadi əhəmiyyətini yüksəldir. Azərbaycanın yaratdığı müasir nəqliyyat infrastrukturu və logistika imkanları Türkmənistan üçün yeni əməkdaşlıq perspektivləri açır. Bu istiqamətdə qurulan tərəfdaşlıq Qarabağın gələcək inkişafına və regionun beynəlxalq iqtisadi sistemə inteqrasiyasına da mühüm töhfə verə bilər.

Eyni zamanda, Azərbaycan və Türkmənistan beynəlxalq təşkilatlar çərçivəsində bir-birini daim dəstəkləyir. BMT və digər nüfuzlu beynəlxalq platformalarda nümayiş etdirilən qarşılıqlı həmrəylik ölkələrimizin strateji maraqlarının uyğunluğunu nümayiş etdirir. Qarabağın bərpasına göstərilən dəstək də məhz bu qarşılıqlı etimad və dostluq siyasətinin davamı kimi qiymətləndirilə bilər.

Humanitar sahədə əməkdaşlıq da Azərbaycan-Türkmənistan münasibətlərinin vacib istiqamətlərindən biridir. Təhsil, elm, mədəniyyət və idman sahələrində həyata keçirilən layihələr xalqlar arasında dostluq əlaqələrinin daha da möhkəmlənməsinə xidmət edir. Qarabağın yenidən qurulması prosesində mədəni irsin bərpası və qorunması istiqamətində görülən işlər də ortaq türk-mədəni dəyərlərinin yaşadılmasına töhfə verir. Türkmənistanın bu prosesə göstərdiyi diqqət və dəstək qardaş xalqların mənəvi birliyini daha da gücləndirir.

Türkmənistan Prezidenti Sərdar Berdiməhəmmədovun bəyan etdiyi kimi, Azərbaycanla əməkdaşlığın genişləndirilməsi Türkmənistanın xarici siyasətində mühüm yer tutur. Bu yanaşma iki ölkə arasındakı münasibətlərin uzunmüddətli və strateji xarakter daşıdığını təsdiqləyir. Qarabağın bərpasına göstərilən dəstək də həmin strateji münasibətlərin mühüm tərkib hissəsi kimi çıxış edir.

Prezident İlham Əliyevin “Qarabağın bərpasında köməyə görə Türkmənistana, əziz qardaşım Arkadağ Qurbanqulu Məlikquliyeviç Berdiməhəmmədova bir daha təşəkkürümü bildirmək istərdim” fikri Azərbaycan-Türkmənistan münasibətlərinin mahiyyətini dolğun şəkildə ifadə edir. Bu təşəkkür sözləri yalnız bir layihəyə verilən qiymət deyil, həm də iki qardaş xalq arasında mövcud olan sarsılmaz dostluğun, qarşılıqlı etimadın və həmrəyliyin təzahürüdür. Qarabağın bərpasında Türkmənistanın dəstəyi Azərbaycan-Türkmənistan strateji tərəfdaşlığının yeni mərhələdə daha da möhkəmləndiyini göstərir və regionda əməkdaşlıq, sabitlik və inkişaf naminə atılan mühüm addım kimi tarixdə qalacaqdır.

Pərviz Hüseynzadə

YAP Babək rayon təşkilatının əməkdaşı