Aprel döyüşləri Zəfərə aparan yolun başlanğıcı oldu - ŞƏRH

Hər bir xalqın tarixində onun gələcək taleyini müəyyənləşdirən dönüş nöqtələri olur. Azərbaycanın müasir tarixində belə mühüm hadisələrdən biri 2016-cı ilin Aprel döyüşləridir. Cəmi dörd gün davam etməsinə baxmayaraq, bu döyüşlər təkcə hərbi əməliyyat deyil, həm də Azərbaycanın gələcək böyük Qələbəsinin başlanğıcı, xalqın zəfər inamının bərpası və ordumuzun artan qüdrətinin nümayişi kimi tarixə düşdü.

Uzun illər ərzində Ermənistan-Azərbaycan münaqişəsinin həlli istiqamətində aparılan danışıqlar heç bir nəticə vermirdi. Ermənistan işğalçılıq siyasətini davam etdirir, beynəlxalq hüququn norma və prinsiplərini kobud şəkildə pozaraq Azərbaycan torpaqlarını işğal altında saxlamağa çalışırdı. Bu dövrdə Azərbaycan dövləti bir tərəfdən sülh danışıqlarına sadiqliyini nümayiş etdirir, digər tərəfdən isə ordunun gücləndirilməsi istiqamətində məqsədyönlü siyasət həyata keçirirdi.

Prezident, Silahlı Qüvvələrin Ali Baş Komandanı İlham Əliyevin rəhbərliyi ilə həyata keçirilən ordu quruculuğu siyasəti nəticəsində Azərbaycan Silahlı Qüvvələri keyfiyyətcə yeni inkişaf mərhələsinə qədəm qoymuşdu. Ordunun maddi-texniki bazası möhkəmləndirilmiş, müasir silah və texnikalar alınmış, şəxsi heyətin döyüş hazırlığı əhəmiyyətli dərəcədə yüksəldilmişdi. Bütün bunlar Azərbaycan Ordusunun real döyüş şəraitində öz gücünü nümayiş etdirməsi üçün möhkəm zəmin yaratmışdı.

2016-cı ilin aprel ayında Ermənistan silahlı qüvvələrinin təxribatlarına cavab olaraq Azərbaycan Ordusu əks-hücum əməliyyatına başladı. Cəbhənin müxtəlif istiqamətlərində həyata keçirilən uğurlu hərbi əməliyyatlar nəticəsində düşmənə sarsıdıcı zərbələr vuruldu. Ordumuz qısa müddətdə strateji əhəmiyyətə malik bir sıra yüksəklikləri və mövqeləri nəzarətə götürdü. Xüsusilə Lələtəpə yüksəkliyinin azad olunması həm hərbi, həm də mənəvi baxımdan mühüm əhəmiyyət daşıyırdı.

Aprel döyüşləri Azərbaycan Ordusunun son illərdə keçdiyi inkişaf yolunun real nəticələrini ortaya qoydu. Həmin döyüşlər göstərdi ki, Azərbaycan Silahlı Qüvvələri istənilən döyüş tapşırığını yerinə yetirmək iqtidarındadır və işğal altında olan torpaqları azad etməyə tam hazırdır. Ermənistan ordusunun “məğlubedilməzliyi” barədə illərlə formalaşdırılan mif məhz Aprel döyüşlərində darmadağın edildi.

Dörd günlük müharibə Azərbaycan cəmiyyətində də böyük ruh yüksəkliyi yaratdı. Xalq öz ordusunun gücünü gördü, qələbəyə inam daha da möhkəmləndi. Minlərlə gəncin könüllü şəkildə hərbi komissarlıqlara müraciət etməsi xalq–ordu birliyinin gücünü bir daha nümayiş etdirdi. Azərbaycan xalqı əmin oldu ki, ölkəmizin ərazi bütövlüyünün bərpası artıq əlçatmaz məqsəd deyil, yaxın gələcəyin reallığıdır.

Aprel döyüşləri beynəlxalq ictimaiyyətə də mühüm mesaj verdi. Azərbaycan nümayiş etdirdi ki, işğal faktı ilə heç vaxt barışmayacaq və öz ərazi bütövlüyünü təmin etmək üçün kifayət qədər güclü orduya malikdir. Eyni zamanda, bu döyüşlər regionda yaranmış status-kvonun davamlı olmadığını və münaqişənin həllinin qaçılmaz olduğunu göstərdi.

Prezident İlham Əliyev sonrakı çıxışlarında dəfələrlə vurğuladı ki, Aprel döyüşləri Azərbaycan xalqının və dövlətinin gücünü nümayiş etdirdi. Həqiqətən də, həmin döyüşlərdə əldə olunan uğurlar sonrakı illərdə ordumuzun daha da gücləndirilməsi üçün əlavə stimul yaratdı. Silahlı Qüvvələrimiz yeni texnologiyalar, müasir silah sistemləri və qabaqcıl döyüş təcrübəsi ilə daha da təkmilləşdirildi.

Tarixi proseslərin gedişi göstərdi ki, Aprel döyüşləri təsadüfi hadisə deyildi. Bu döyüşlər 2020-ci ilin Vətən müharibəsində qazanılan möhtəşəm Zəfərin ilk müjdəçisi idi. Dörd gün ərzində nümayiş etdirilən peşəkarlıq, döyüş ruhu və qələbə əzmi sonradan 44 günlük müharibədə daha geniş miqyasda öz təsdiqini tapdı. Məhz buna görə də Aprel döyüşləri haqlı olaraq Böyük Zəfərə aparan yolun başlanğıcı kimi qiymətləndirilir.

Bu gün geriyə nəzər saldıqda aydın görünür ki, 2016-cı ilin aprelində Azərbaycan Ordusu yalnız bir neçə strateji mövqeni deyil, həm də xalqın qələbəyə inamını geri qaytardı. Həmin inam isə dörd il sonra işğal altındakı torpaqlarımızın azad olunması və tarixi ədalətin bərpası ilə özünün ən möhtəşəm təcəssümünü tapdı.

Aprel döyüşləri Azərbaycan hərb tarixində qəhrəmanlıq, peşəkarlıq və vətənpərvərlik nümunəsi kimi əbədi yaşayacaq. Bu döyüşlər bir daha sübut etdi ki, güclü dövlətin güclü ordusu varsa, qarşıya qoyulan ən böyük məqsədlərə belə nail olmaq mümkündür.

Aytəkin Mahmudova,

YAP Neftçala rayon təşkilatı ərazi partiya təşkilatının sədri

Neftçala rayon İnterasiya təlimli İnternat tipli Gimnaziyanın direktoru