Özbəkistan Gürcüstanda səfirlik açacaq - FOTO

Gürcüstanda səfərdə olan Özbəkistan Prezidenti Şavkat Mirziyoyev Gürcüstanın Baş naziri İrakli Kobaxidze ilə Gürcüstanda səfirlik açmaq barədə razılığa gəliblər. Danışıqlar zamanı tərəflər ticarət, investisiya, nəqliyyat, turizm, mədəniyyət və təhsil sahələrində əməkdaşlıq məsələlərini müzakirə ediblər. Həmçinin hökumətlər, parlamentlər, biznes və humanitar sektor nümayəndələri arasında daha aktiv əlaqələri müzakirə ediblər. Özbəkistan və Gürcüstan arasında ticarət dövriyyəsi ötən il 270 milyon dollar təşkil edib və bu ilin əvvəlindən bəri 100 milyon dolları keçib. Ölkələr qarşıdakı illərdə qarşılıqlı ticarəti 1 milyard dollara çatdırmaq üçün yol xəritəsi hazırlamaq barədə razılığa gəliblər. Həmçinin, tələb olunan məhsulların tədarükünü genişləndirmək və hər iki ölkədə sənaye sərgiləri keçirmək planlaşdırılır.

Prezident Şavkat Mirziyoyev qeyd edib ki, bu səfər iki ölkə arasında münasibətləri yeni səviyyəyə qaldırmalıdır. O Gürcüstan tərəfinə Tbilisi parkına Əlişir Nəvainin adını vermək qərarına görə təşəkkür edib. Mart ayında Daşkənddə Gürcüstan Mədəniyyəti Günləri keçirilib və bu il Özbəkistan üçün birgə təhsil və turizm forumları da planlaşdırılır.

Danışıqlardan sonra tərəflər əldə edilmiş razılaşmaların həyata keçirilməsi üçün birgə yol xəritəsi hazırlayacaqlar.

Xatırladaq ki, Özbəkistan və Gürcüstan arasında diplomatik münasibətlər 19 avqust 1994-cü ildə qurulub. Diplomatik mövcudluq asimmetrik olaraq qalır: Gürcüstanın Daşkənddə səfirliyi var, Özbəkistanın Gürcüstandakı maraqları isə Bakıdakı səfirliyi tərəfindən təmsil olunur.

Daha əvvəl xəbər verdiyimiz kimi, Özbəkistan Prezidenti Şavkat Mirziyoyev və Gürcüstanın Baş naziri İrakli Kobaxidze Strateji Tərəfdaşlıq Əlaqələrinin Qurulması haqqında Bəyannamə imzalayıblar. Hökumətlər və qurumlar arasında bir sıra sənədlər də imzalanıb.

İlham