Quba rayonuna gəzinti təşkil olunub - FOTOLAR

4 iyul tarixində Yeni Azərbaycan Partiyası Xəzər Rayon Təşkilatının təşkilatçılığı ilə Quba rayonuna gəzinti təşkil olunub.Gəzintidə Yeni Azərbaycan Partiyası Xəzər Rayon Təşkilatının sədri Namiq Əhmədov, təşkilat sədrinin müavini Şəfayət Nənəcanov, sosial şəbəkə fəalları və ərazi partiya təşkilatlarının sədrləri iştirak ediblər.

Təşkil olunan gəzintinin əsas məqsədi partiya fəalları arasında ünsiyyətin daha da inkişaf etdirilməsi, əməkdaşlıq əlaqələrinin möhkəmləndirilməsi, qarşılıqlı fikir mübadiləsinin aparılması və komanda ruhunun gücləndirilməsi olub. Səfər çərçivəsində iştirakçılar səmimi şəraitdə bir araya gələrək fəaliyyət istiqamətləri, gələcək əməkdaşlıq imkanları və partiya işinin daha səmərəli təşkili ilə bağlı fikir mübadiləsi aparıblar.

Görüş zamanı Yeni Azərbaycan Partiyasının həyata keçirdiyi layihələrin əhəmiyyəti, ictimai-siyasi proseslərdə partiya fəallarının rolu, sosial şəbəkələrdə aparılan maarifləndirmə fəaliyyətinin genişləndirilməsi və cəmiyyətlə effektiv kommunikasiyanın qurulmasının vacibliyi də vurğulanıb. Qeyd edilib ki, bu cür görüşlər müxtəlif istiqamətlər üzrə fəaliyyət göstərən partiya üzvləri arasında əlaqələrin möhkəmlənməsinə, qarşılıqlı təcrübə mübadiləsinə və gələcək birgə fəaliyyətin daha səmərəli təşkilinə müsbət təsir göstərir.

İştirakçılar belə tədbirlərin həm kollektiv daxilində həmrəyliyin gücləndirilməsi, həm də işgüzar münasibətlərin inkişaf etdirilməsi baxımından əhəmiyyətini yüksək qiymətləndiriblər. Bildirilib ki, qarşılıqlı etimada əsaslanan əməkdaşlıq və səmimi ünsiyyət Yeni Azərbaycan Partiyasının fəaliyyətində mühüm rol oynayır və bu kimi tədbirlər həmin dəyərlərin daha da möhkəmlənməsinə xidmət edir.

Səfər xoş təəssüratlarla başa çatıb və iştirakçılar gələcəkdə də bu formatda görüşlərin davam etdirilməsinin faydalı olacağını bildiriblər.