Etibarlı tərəfdaşlıq, enerji təhlükəsizliyi və Cənubi Qafqazda sülhün yeni reallığı - ŞƏRH

Müasir beynəlxalq münasibətlər sistemində etibarlı tərəfdaşlıq, qarşılıqlı etimad və uzunmüddətli strateji əməkdaşlıq dövlətlər arasında münasibətlərin əsas meyarına çevrilib. Bu baxımdan Azərbaycan ilə Avropa İttifaqı arasında son illərdə sürətlə inkişaf edən əlaqələr təkcə ikitərəfli əməkdaşlığın deyil, həm də Avrasiyanın enerji təhlükəsizliyi, nəqliyyat bağlantıları və regional sabitliyi baxımından xüsusi əhəmiyyət kəsb edir.

İyulun 1-də Avropa Komissiyasının Prezidenti Ursula fon der Lyayenin Azərbaycana səfəri və Prezident İlham Əliyevlə keçirdiyi görüşlər bu münasibətlərin yeni inkişaf mərhələsinə qədəm qoyduğunu bir daha nümayiş etdirdi. Mətbuata bəyanatla çıxış edən Prezident İlham Əliyev Azərbaycan–Avropa İttifaqı əlaqələrinin bugünkü səviyyəsini yüksək qiymətləndirərək bildirdi ki, "Biz Avropa Komissiyası ilə münasibətlərimizin çox mühüm mərhələsindəyik." Dövlətimizin başçısının bu fikri əslində son illər formalaşmış qarşılıqlı etimadın, intensiv siyasi dialoqun və strateji əməkdaşlığın məntiqi nəticəsidir.
Azərbaycan müstəqil xarici siyasət yürüdən, milli maraqlarını əsas götürən və bütün tərəfdaşları ilə qarşılıqlı hörmət prinsipi əsasında münasibətlər quran dövlətdir. Avropa İttifaqı ilə əlaqələrin inkişafı da məhz bu siyasətin mühüm istiqamətlərindən biridir.
Son illərdə yüksək səviyyəli qarşılıqlı səfərlərin intensivləşməsi, müxtəlif sahələr üzrə əməkdaşlıq mexanizmlərinin genişlənməsi və siyasi dialoqun fəallaşması tərəflər arasında münasibətlərin strateji xarakter aldığını göstərir. Prezident İlham Əliyevin qeyd etdiyi kimi, son aylarda Avropa Komissiyasının nümayəndələrinin Azərbaycana çoxsaylı səfərləri münasibətlərdə yeni dinamikanın formalaşdığını təsdiqləyir.
Bu gün Avropa İttifaqı Azərbaycanın əsas iqtisadi və ticarət tərəfdaşlarından biridir. Xarici ticarət dövriyyəsinin əhəmiyyətli hissəsi Avropa ölkələrinin payına düşür. Avropa şirkətləri Azərbaycanda enerji, sənaye, nəqliyyat, informasiya texnologiyaları, kənd təsərrüfatı və xidmət sektorlarında uğurla fəaliyyət göstərirlər. Eyni zamanda, Azərbaycanın Avropa bazarlarına ixrac imkanları ilbəil genişlənir.
Ölkəmizin Şərq-Qərb və Şimal-Cənub beynəlxalq nəqliyyat dəhlizlərinin kəsişməsində yerləşməsi, müasir liman, dəmir yolu və avtomobil infrastrukturu Avropa ilə Asiyanı birləşdirən etibarlı logistika mərkəzi kimi Azərbaycanın rolunu daha da artırır.
XXI əsrdə enerji təhlükəsizliyi dövlətlərin milli təhlükəsizliyinin ən mühüm elementlərindən birinə çevrilib. Dünyada baş verən geosiyasi proseslər bir daha sübut edir ki, etibarlı enerji mənbələrinə malik olmaq və onların fasiləsiz şəkildə dünya bazarlarına çatdırılması dövlətlərin iqtisadi inkişafı ilə yanaşı, siyasi sabitliyinin də əsas təminatıdır.
Azərbaycan uzun illərdir ki, beynəlxalq enerji bazarında sözün əsl mənasında etibarlı tərəfdaş kimi tanınır. Prezident İlham Əliyevin də bəyan etdiyi kimi, ölkəmiz üzərinə götürdüyü bütün öhdəlikləri vaxtında və tam şəkildə yerinə yetirib. Məhz buna görə də Avropa İttifaqı Azərbaycanın enerji siyasətinə böyük etimad göstərir.
Cənub Qaz Dəhlizi bu gün Avropanın enerji təhlükəsizliyinin mühüm komponentlərindən biridir. Azərbaycan qazı artıq bir çox Avropa ölkəsinin enerji balansında mühüm yer tutur. Bu, təkcə iqtisadi əməkdaşlıq deyil, həm də qarşılıqlı etimada söykənən strateji tərəfdaşlığın bariz nümunəsidir.
Prezident İlham Əliyevin vurğuladığı kimi, enerji sahəsində əməkdaşlıq gələcəkdə də genişlənəcək və Azərbaycan Avropanın etibarlı enerji tərəfdaşı olaraq öz missiyasını bundan sonra da uğurla davam etdirəcək.
Müasir dövrdə enerji təhlükəsizliyi artıq yalnız neft və qaz ehtiyatları ilə məhdudlaşmır. Dünyada yaşıl enerji keçidi sürətlənir və Azərbaycan bu prosesdə fəal iştirak edən ölkələrdən biridir.
Qarabağ və Şərqi Zəngəzurun "yaşıl enerji zonası" elan olunması, Xəzər dənizinin böyük külək enerjisi potensialı, günəş elektrik stansiyalarının tikintisi və beynəlxalq investorlarla həyata keçirilən layihələr Azərbaycanın bu sahədə geniş imkanlara malik olduğunu göstərir.
Avropa İttifaqının iqlim siyasəti və yaşıl inkişaf strategiyası ilə Azərbaycanın həyata keçirdiyi layihələr bir-birini tamamlayır. Bu istiqamətdə əməkdaşlığın genişlənməsi həm enerji təhlükəsizliyinin möhkəmlənməsinə, həm də qlobal iqlim dəyişiklikləri ilə mübarizəyə mühüm töhfə verəcək.
Prezident İlham Əliyevin bəyanatında xüsusi diqqət yetirilən məsələlərdən biri də Azərbaycan ilə Ermənistan arasında münasibətlərin normallaşdırılması prosesi oldu.
Azərbaycan postmünaqişə dövründə regionda davamlı sülhün bərqərar olunması üçün konkret təşəbbüslərlə çıxış edib və sülh müqaviləsinin imzalanmasının tərəfdarı olduğunu dəfələrlə bəyan edib. Dövlətimizin başçısı çıxışında vurğuladı ki, "Sülh artıq reallıqdır. Lakin biz onu möhkəmləndirmək və uzunmüddətli etmək üçün birlikdə çalışmalıyıq."
Bu fikir əslində Azərbaycanın regionun gələcəyi ilə bağlı baxışını ifadə edir. Çünki sülh yalnız siyasi bəyanatlar və ya imzalanan sənədlərlə ölçülmür. Əsl sülh insanların gündəlik həyatında hiss edilməlidir. İnsanlar təhlükəsiz şəraitdə yaşamalı, sərhədlər əməkdaşlıq məkanına çevrilməli, iqtisadi əlaqələr inkişaf etməli, yeni kommunikasiya xətləri açılmalı, gənclər müharibə deyil, inkişaf haqqında düşünməlidirlər.
Azərbaycan xalqı tarix boyu müxtəlif xalqlarla mehriban qonşuluq və qarşılıqlı hörmət şəraitində yaşayıb. Multikulturalizm və tolerantlıq bizim cəmiyyətimizin əsas xüsusiyyətlərindəndir. Biz sülh şəraitində yaşamağı, əməkdaşlıq etməyi və birgə inkişaf etməyi bacaran xalqıq. Buna görə də regionda uzunmüddətli sülhün təmin olunması Azərbaycanın milli maraqlarına tam uyğundur.
İyulun 1-də Bakıda səslənən bəyanatlar göstərdi ki, Azərbaycan–Avropa İttifaqı münasibətləri artıq yeni strateji mərhələyə qədəm qoyub. Bu münasibətlərin əsasını etibarlı tərəfdaşlıq, qarşılıqlı hörmət, bərabərhüquqlu əməkdaşlıq və ortaq maraqlar təşkil edir.
Enerji təhlükəsizliyi, yaşıl enerji, iqtisadi və ticarət əlaqələrinin genişləndirilməsi, nəqliyyat-kommunikasiya layihələri, rəqəmsal inkişaf və regional sülh gündəliyi bundan sonra da əməkdaşlığın prioritet istiqamətləri olacaq.
Prezident İlham Əliyevin qətiyyətli və uzaqgörən siyasəti nəticəsində Azərbaycan bu gün həm Avropanın etibarlı tərəfdaşı, həm də Cənubi Qafqazda sabitliyin, təhlükəsizliyin və əməkdaşlığın təşviqçisi kimi tanınır. Ölkəmizin həyata keçirdiyi balanslaşdırılmış xarici siyasət, iqtisadi gücü və sülhə sadiqliyi göstərir ki, Azərbaycan regional və qlobal miqyasda etibarlı söz sahibidir.
Məhz buna görə də Azərbaycan ilə Avropa İttifaqı arasında inkişaf edən münasibətlər təkcə bugünkü maraqlara deyil, gələcək nəsillərin təhlükəsizliyinə, rifahına və dayanıqlı inkişafına xidmət edən strateji tərəfdaşlığın parlaq nümunəsi kimi qiymətləndirilməlidir.

Sevda Quluyeva
YAP Kəngərli rayon təşkilatının sədri