Azərbaycanın sülh gündəliyi regional sabitliyin əsas təminatına çevrilir - ŞƏRH

Azərbaycan Respublikasının Prezidenti İlham Əliyevin Avropa Komissiyasının Prezidenti Ursula Fon der Lyayenin 2026-cı il iyulun 1-də Azərbaycana səfəri zamanı verdiyi bəyanat ölkəmizin regionda formalaşdırdığı yeni siyasi reallıqların, sülh təşəbbüslərinin və beynəlxalq əməkdaşlıq gündəliyinin növbəti dəfə diqqət mərkəzinə çıxmasına səbəb oldu. Dövlət başçısı çıxışında regional təhlükəsizlik məsələlərinin, xüsusilə Azərbaycan ilə Ermənistan arasında normallaşma prosesinin geniş müzakirə olunduğunu vurğulayaraq, Cənubi Qafqazda davamlı sülhün təmin edilməsinin əsas prioritetlərdən biri olduğunu bildirdi.

Prezident İlham Əliyev qeyd etdi ki, son illərdə Azərbaycanın ardıcıl və prinsipial siyasəti nəticəsində regionda yeni əməkdaşlıq mühiti formalaşır. Bu siyasətin əsas məqsədi qarşıdurma səhifəsini tamamilə bağlamaq, dövlətlərin suverenliyinə və ərazi bütövlüyünə hörmət əsasında uzunmüddətli sülhə nail olmaqdır. Məhz bu yanaşma beynəlxalq ictimaiyyət tərəfindən də müsbət qiymətləndirilir və Azərbaycanın etibarlı tərəfdaş kimi mövqeyini daha da möhkəmləndirir.
Dövlət başçısı çıxışında ötən ilin mühüm siyasi hadisələrindən biri olan Vaşinqton görüşünə də xüsusi diqqət ayırdı. O bildirdi ki, 2025-ci ilin avqustunda Vaşinqtonda, Ağ Evdə ABŞ Prezidenti Donald Trampın iştirakı ilə Ermənistan və Azərbaycan Birgə Bəyannaməni imzalayıblar. Prezident Donald Tramp sənədə şahid qismində imza atmaqla yanaşı, Ermənistan ilə Azərbaycan arasında hazırlanmış sülh sazişinin mətnini də paraflayıb. Prezident İlham Əliyevin sözlərinə görə, bu mühüm addım regionda faktiki olaraq sülhün bərqərar olmasını təmin edib və artıq bunun real nəticələri müşahidə olunur.
Prezident vurğuladı ki, de-fakto sülhün mövcudluğu regionda sabitliyin möhkəmlənməsinə, qarşılıqlı etimadın artmasına və yeni əməkdaşlıq imkanlarının yaranmasına şərait yaradır. Gərginliyin azalması iqtisadi layihələrin həyata keçirilməsini sürətləndirir, nəqliyyat-kommunikasiya əlaqələrinin genişlənməsi üçün əlverişli zəmin formalaşdırır və bütövlükdə Cənubi Qafqazın inkişaf perspektivlərini gücləndirir. Bu baxımdan Azərbaycanın təşəbbüsləri yalnız milli maraqlara deyil, həm də regional rifaha və təhlükəsizliyə xidmət edir.
Prezident İlham Əliyev bəyanatında Avropa İttifaqı ilə əməkdaşlığın da mühüm əhəmiyyət daşıdığını diqqətə çatdırdı. Regional sabitliyin möhkəmləndirilməsi, iqtisadi tərəfdaşlığın genişləndirilməsi, enerji təhlükəsizliyi və nəqliyyat bağlantılarının inkişafı Azərbaycan ilə Avropa İttifaqı arasında münasibətlərin əsas istiqamətlərindən biridir. Ursula Fon der Lyayenin Azərbaycana səfəri də bu əməkdaşlığın strateji xarakter daşıdığını bir daha nümayiş etdirdi.
Azərbaycanın həyata keçirdiyi xarici siyasət kursu göstərir ki, ölkəmiz sülh, əməkdaşlıq və qarşılıqlı faydalı münasibətlər prinsiplərinə sadiqdir. Regionda yaranmış yeni reallıqların qorunması və davamlı sülhün hüquqi əsaslarının tam formalaşdırılması istiqamətində atılan addımlar Cənubi Qafqazın gələcək inkişafı üçün mühüm zəmin yaradır. Prezident İlham Əliyevin bəyanatı bir daha təsdiq etdi ki, Azərbaycan regionda sabitliyin və təhlükəsizliyin təmin olunmasında aparıcı rol oynayır və sülh gündəliyinin həyata keçirilməsinə qətiyyətlə davam edir.

Məhərrəm Hacıyev
YAP Kəngərli rayon təşkilatının fəalı