Sülhün təminində birmənalı humanitar addımların əhəmiyyəti - ŞƏRH

Müasir beynəlxalq münasibətlər sistemində davamlı sülhün və təhlükəsizliyin təmin olunması dövlətlərin yalnız siyasi bəyanatları və ya imzalanan sənədləri ilə məhdudlaşmır. Həqiqi sülh qarşılıqlı etimadın formalaşdırılması, humanitar dəyərlərin qorunması və insanların gündəlik həyatında müsbət dəyişikliklərin hiss olunması ilə öz təsdiqini tapır. Bu baxımdan dövlətlərin atdığı humanitar və iqtisadi xarakterli birtərəfli addımlar regionda uzunmüddətli sabitliyin təmin edilməsində mühüm rol oynayır.

Azərbaycan Respublikası postmünaqişə dövründə regionda davamlı sülhün və əməkdaşlığın bərqərar olunmasına sadiqliyini dəfələrlə əməli addımları ilə nümayiş etdirmişdir. Ölkəmiz sülhün yalnız kağız üzərində qalmaması, insanların gündəlik həyatında da hiss olunması məqsədilə bir sıra mühüm birtərəfli təşəbbüslər irəli sürmüş və onları ardıcıl şəkildə həyata keçirmişdir. Bu addımlar Azərbaycanın beynəlxalq hüququn norma və prinsiplərinə, humanizm dəyərlərinə və regional sabitliyin möhkəmləndirilməsinə verdiyi önəmin bariz nümunəsidir.

Atılan mühüm addımlardan biri Azərbaycanın öz ərazisi vasitəsilə Ermənistana daşınan yüklərin tranzitinə tətbiq edilmiş məhdudiyyətlərin aradan qaldırılması olmuşdur. Məlum olduğu kimi, həmin məhdudiyyətlər Ermənistanın uzun illər Azərbaycan Respublikasının beynəlxalq səviyyədə tanınmış ərazilərini işğal altında saxlaması nəticəsində yaranmış vəziyyətlə əlaqədar tətbiq edilmişdi. Postmünaqişə mərhələsində isə Azərbaycan regionda etimad mühitinin formalaşdırılması və münasibətlərin normallaşdırılması naminə yeni yanaşma ortaya qoyaraq bu istiqamətdə mühüm humanitar addımlar atmışdır.

Bununla yanaşı, Azərbaycan Ermənistanın enerji təminatına dəstək məqsədilə mühüm əhəmiyyət kəsb edən yanacaq məhsullarının, xüsusilə benzin və dizel yanacağının tədarükünə şərait yaratmışdır. Bu addım yalnız iqtisadi əməkdaşlıq baxımından deyil, həm də humanitar məsuliyyət və normallaşan qonşuluq münasibətlərinin inkişaf etdirilməsi baxımından xüsusi əhəmiyyət daşıyır. Belə təşəbbüslər dövlətlər arasında etimadın möhkəmlənməsinə, gərginliyin azalmasına və uzunmüddətli sülhün bərqərar olmasına xidmət edir.

Hazırkı mürəkkəb geosiyasi şəraitdə enerji təhlükəsizliyi, nəqliyyat-kommunikasiya marşrutlarının etibarlılığı və regional əməkdaşlıq məsələləri dünya gündəminin əsas mövzularından biridir. Bu baxımdan Azərbaycanın həyata keçirdiyi birtərəfli humanitar və iqtisadi təşəbbüslər təkcə ikitərəfli münasibətlər üçün deyil, bütövlükdə Cənubi Qafqaz regionunda sabitliyin möhkəmləndirilməsi, iqtisadi inteqrasiyanın genişləndirilməsi və qarşılıqlı etimadın artırılması baxımından mühüm əhəmiyyət kəsb edir.

Azərbaycan Respublikası hər zaman sülh müqaviləsinin imzalanmasının tərəfdarı olduğunu bəyan etmiş, regionun gələcəyinin qarşıdurmada deyil, əməkdaşlıqda olduğunu vurğulamışdır. Ölkəmizin həyata keçirdiyi humanitar təşəbbüslər də bu siyasi iradənin praktik təzahürü kimi qiymətləndirilə bilər. Sülh yalnız diplomatik danışıqlar masasında deyil, insanların gündəlik həyatına təsir edən konkret addımlar vasitəsilə möhkəmlənir və davamlı xarakter alır.

Azərbaycanın postmünaqişə dövründə həyata keçirdiyi birtərəfli addımlar sülhə sadiqliyin, beynəlxalq hüquqa hörmətin və humanizm prinsiplərinin praktik ifadəsidir. Bu təşəbbüslər regionda etimadın gücləndirilməsinə, qarşılıqlı əməkdaşlığın inkişafına və uzunmüddətli sabitliyin təmin olunmasına mühüm töhfə verir. Davamlı sülhün əsas şərti qarşılıqlı hörmət, beynəlxalq hüquqa əməl olunması və dövlətlərin konstruktiv dialoqa üstünlük verməsidir. Azərbaycan da məhz bu prinsiplərə əsaslanaraq regionun firavan və təhlükəsiz gələcəyinin qurulmasına öz töhfəsini verməyə davam edir.

Yeni Azərbaycan Partiyasının fəal üzvü və Naxçıvan şəhər 10 nömrəli körpələr evi–uşaq bağçasının müdiri olaraq, ölkəmizin öz milli maraqlarına əsaslanan sülh siyasətini daim dəstəkləyir və bu siyasətin gələcək nəsillərə təhlükəsiz, sabit və firavan bir region miras qoyacağına inanıram. Hesab edirəm ki, hər bir vətəndaş öz fəaliyyəti ilə ölkəmizdə birlik, həmrəylik və sülh dəyərlərinin möhkəmlənməsinə töhfə verməlidir.

Səriyyə Əhmədova

Yeni Azərbaycan Partiyasının fəal üzvü,

Naxçıvan şəhər 10 saylı körpələr evi-uşaq bağçasının müdiri