Sülhün praktik nəticələri: Azərbaycanın etimad və əməkdaşlıq siyasəti - ŞƏRH

Prezident İlham Əliyevin Avropa Komissiyasının Prezidenti Ursula Fon der Lyayen ilə keçirdiyi görüş zamanı səsləndirdiyi fikirlər Azərbaycanın regionda sülhün möhkəmləndirilməsi istiqamətində atdığı praktiki addımları bir daha nümayiş etdirdi. Dövlətimizin başçısı vurğuladı ki, Azərbaycan sülhün yalnız sənədlər üzərində qalmasını deyil, insanların gündəlik həyatında real şəkildə hiss olunmasını əsas məqsəd kimi müəyyənləşdirib. Məhz bu yanaşma ölkəmizin regional siyasətinin əsas istiqamətlərindən birini təşkil edir.
Prezident İlham Əliyev bildirdi ki, Azərbaycan etimadın möhkəmləndirilməsi məqsədilə bir sıra mühüm birtərəfli addımlar atıb. Onlardan biri Ermənistan istiqamətində ölkə ərazisindən keçən tranzit yüklərə tətbiq olunan bütün məhdudiyyətlərin aradan qaldırılmasıdır. Bu məhdudiyyətlər uzun illər Ermənistanın Azərbaycanın beynəlxalq səviyyədə tanınmış ərazilərini işğal etməsi səbəbindən qüvvədə idi. Yeni şəraitdə həmin məhdudiyyətlərin ləğv edilməsi Azərbaycanın sülh gündəliyinə sadiqliyinin və qarşılıqlı etimadın gücləndirilməsinə verdiyi önəmin bariz nümunəsidir.
Dövlətimizin başçısı, eyni zamanda, Azərbaycanın Ermənistana mühüm enerji məhsulları, xüsusilə benzin və dizel yanacağının təchizatına başladığını diqqətə çatdırdı. Müasir geosiyasi şəraitdə enerji təhlükəsizliyinin strateji əhəmiyyət daşıdığı nəzərə alınarsa, bu addım təkcə iqtisadi deyil, həm də humanitar və siyasi baxımdan mühüm əhəmiyyət kəsb edir. Bu, Azərbaycanın regionda sabitlik və əməkdaşlıq mühitinin formalaşmasına verdiyi real töhfənin göstəricisidir.
Azərbaycanın həyata keçirdiyi bu addımlar göstərir ki, ölkəmiz Cənubi Qafqazda davamlı sülhün bərqərar olmasına yalnız bəyanatlarla deyil, konkret əməli fəaliyyətlə də dəstək verir. Qarşılıqlı etimadın artırılması, iqtisadi əlaqələrin inkişafı və kommunikasiyaların açılması regionun gələcək rifahı üçün mühüm əhəmiyyət daşıyır. Prezident İlham Əliyevin rəhbərliyi ilə həyata keçirilən bu siyasət bölgədə yeni əməkdaşlıq mühitinin formalaşmasına xidmət edir.
Bu gün Cənubi Qafqazda yaranmış yeni reallıqlar bütün dövlətlər üçün əməkdaşlıq və inkişaf imkanları yaradır. Azərbaycan regionun lider dövləti kimi sülh, sabitlik və qarşılıqlı faydalı əməkdaşlıq prinsiplərinə sadiqliyini əməli addımlarla nümayiş etdirir. Prezident İlham Əliyevin bəyanatı da göstərir ki, davamlı sülh yalnız siyasi razılaşmalarla deyil, xalqların gündəlik həyatına müsbət təsir göstərən real təşəbbüslərlə möhkəmlənə bilər.
Nəticə etibarilə, Azərbaycanın tranzit məhdudiyyətlərini aradan qaldırması, enerji təchizatını həyata keçirməsi və digər etimad quruculuğu tədbirləri regionda yeni əməkdaşlıq mühitinin formalaşmasına xidmət edir. Bu addımlar Prezident İlham Əliyevin uzaqgörən siyasətinin, Azərbaycanın sülhə sadiqliyinin və Cənubi Qafqazın sabit gələcəyinə verdiyi töhfənin bariz ifadəsidir.

Vüqar Qasımzadə
YAP Sədərək rayon təşkilatının fəalı,
Heydərabad qəsəbə ərazi partiya təşkilatının sədri