IV Şuşa Qlobal Media Forumu: Prezident İlham Əliyevin mesajları və Azərbaycanın dünyaya təqdim etdiyi yeni reallıqlar

Şuşa artıq təkcə Azərbaycanın mədəniyyət paytaxtı və tarixi Zəfərin rəmzi deyil. Son illər bu qədim şəhər beynəlxalq siyasi və intellektual dialoqun da mühüm ünvanına çevrilib. IV Şuşa Qlobal Media Forumunun məhz bu şəhərdə keçirilməsi təsadüfi deyil. Bu forum Azərbaycanın dünyaya verdiyi mühüm mesajlardan biri idi: Qarabağda həyat bərpa olunub, bölgə inkişaf edir və artıq beynəlxalq gündəliyin müzakirə olunduğu nüfuzlu platformaya çevrilib.

Dünyanın onlarla ölkəsindən media rəhbərlərinin, tanınmış jurnalistlərin, ekspertlərin və analitiklərin iştirakı ilə keçirilən forum informasiya əsrinin çağırışlarının müzakirəsi baxımından böyük əhəmiyyət daşıdı. Bu gün informasiya təkcə xəbərin yayılması deyil, həm də ictimai rəyin formalaşdırılması, dövlətlərin nüfuzu və beynəlxalq münasibətlərə təsir edən əsas amillərdən biridir. Belə bir dövrdə fərqli ölkələrin media nümayəndələrinin Şuşada açıq fikir mübadiləsi aparması Azərbaycanın beynəlxalq etimad qazandığını göstərən mühüm göstəricidir.
Forumun ən diqqətçəkən hissəsi Prezident İlham Əliyevin iştirakçılarla görüşü və onların çoxsaylı suallarını cavablandırması oldu. Bu görüş bir daha göstərdi ki, Azərbaycan rəhbərliyi beynəlxalq ictimaiyyətlə açıq dialoqa üstünlük verir və ölkəni maraqlandıran bütün məsələlər barədə öz mövqeyini şəffaf şəkildə ifadə edir.
Prezident İlham Əliyevin çıxışı bir neçə mühüm istiqaməti əhatə etdi. İlk növbədə, dövlət başçısı Azərbaycanın regionda formalaşan yeni siyasi reallıqlara münasibətini aydın şəkildə ortaya qoydu. O vurğuladı ki, Cənubi Qafqazda uzun illər davam edən münaqişə artıq tarixə qovuşub və Azərbaycan öz ərazi bütövlüyünü tam bərpa edib. Bu reallığın qəbul olunması regionda uzunmüddətli sabitlik və əməkdaşlıq üçün əsas şərtdir.
Prezident İlham Əliyev çıxışında Ermənistanla münasibətlərə də toxunaraq bildirdi ki, Azərbaycan sülh gündəliyinə sadiqdir və bölgədə davamlı sabitliyin təmin olunmasında maraqlıdır. Bunun üçün isə beynəlxalq hüququn prinsiplərinə hörmət və qarşılıqlı etimad əsas şərtlərdir. Dövlət başçısının bu mövqeyi Azərbaycanın müharibədən sonra da konstruktiv yanaşma nümayiş etdirdiyini bir daha təsdiqlədi.
Forum zamanı diqqət çəkən mövzulardan biri də Qarabağ və Şərqi Zəngəzurda aparılan genişmiqyaslı bərpa-quruculuq işləri oldu. Prezident İlham Əliyev azad olunmuş ərazilərdə həyata keçirilən layihələrdən danışaraq yeni şəhərlərin və kəndlərin salındığını, müasir infrastrukturun qurulduğunu, “ağıllı şəhər” və “ağıllı kənd” konsepsiyalarının tətbiq edildiyini qeyd etdi. Xarici jurnalistlərin bu dəyişiklikləri yerində müşahidə etməsi Azərbaycanın həyata keçirdiyi bərpa siyasətinin ən real sübutu idi.
Dövlət başçısının çıxışında enerji təhlükəsizliyi və beynəlxalq əməkdaşlıq da xüsusi yer tutdu. Prezident İlham Əliyev vurğuladı ki, Azərbaycan uzun illərdir etibarlı enerji tərəfdaşı kimi fəaliyyət göstərir və bu gün Avropanın enerji təhlükəsizliyində mühüm rol oynayır. Cənub Qaz Dəhlizi, yaşıl enerji layihələri və yeni ixrac marşrutları ölkəmizin beynəlxalq əhəmiyyətini daha da artırır. Azərbaycanın təşəbbüsü ilə həyata keçirilən bu layihələr təkcə iqtisadi deyil, həm də geosiyasi baxımdan mühüm əhəmiyyət daşıyır.
Forum çərçivəsində dövlət başçısı qlobal geosiyasi proseslər, beynəlxalq təşkilatların fəaliyyəti, çoxtərəfli əməkdaşlıq və regional nəqliyyat dəhlizləri barədə də fikirlərini bölüşdü. Xüsusilə Orta Dəhlizin perspektivləri ilə bağlı səsləndirilən fikirlər Azərbaycanın Avropa ilə Asiyanı birləşdirən əsas logistika mərkəzlərindən birinə çevrildiyini bir daha nümayiş etdirdi.
Prezident İlham Əliyevin çıxışında diqqət çəkən mühüm məqamlardan biri də medianın məsuliyyəti ilə bağlı səsləndirdiyi fikirlər idi. İnformasiya müharibələrinin geniş vüsət aldığı bir dövrdə obyektiv jurnalistikanın və faktlara söykənən məlumatların əhəmiyyəti xüsusi vurğulandı. Dövlət başçısı qeyd etdi ki, dezinformasiyaya qarşı mübarizənin ən təsirli yolu həqiqətləri açıq şəkildə təqdim etməkdir. Məhz bu baxımdan Şuşa Qlobal Media Forumu müxtəlif ölkələrdən olan media nümayəndələri üçün birbaşa müşahidə və obyektiv qiymətləndirmə imkanı yaratdı.
Forum bir daha sübut etdi ki, Prezident İlham Əliyevin həyata keçirdiyi uğurlu xarici siyasət nəticəsində Azərbaycan beynəlxalq etimad qazanan, sözünə və öhdəliklərinə sadiq dövlət kimi qəbul olunur. Son illərdə ölkəmizin COP29-a ev sahibliyi etməsi, Qoşulmama Hərəkatına uğurlu sədrliyi, beynəlxalq humanitar və siyasi platformaların Azərbaycanda təşkili də bunun bariz nümunəsidir. Şuşa Qlobal Media Forumu da həmin uğurlu siyasi xəttin məntiqi davamıdır.
Bu uğurların təməlində isə Ümummilli Lider Heydər Əliyevin müəyyən etdiyi dövlətçilik strategiyası dayanır. Müstəqil Azərbaycanın möhkəm siyasi əsaslarının formalaşdırılması, balanslaşdırılmış xarici siyasət kursunun müəyyən edilməsi və milli maraqların qorunması məhz Heydər Əliyevin uzaqgörən siyasətinin nəticəsi idi. Prezident İlham Əliyev bu siyasi kursu müasir dövrün çağırışlarına uyğun inkişaf etdirərək Azərbaycanın beynəlxalq nüfuzunu daha da möhkəmləndirib, ölkəmizi regionun lider dövlətinə çevirib.
IV Şuşa Qlobal Media Forumu göstərdi ki, müasir dünyada informasiya uğrunda mübarizədə ən böyük üstünlük həqiqətə, açıq dialoqa və güclü dövlət siyasətinə malik olan ölkələrdədir. Şuşadan səslənən mesajlar yalnız Azərbaycanın mövqeyini ifadə etmədi, eyni zamanda beynəlxalq ictimaiyyətə Cənubi Qafqazın gələcəyi ilə bağlı aydın baxış təqdim etdi.
Bu gün Şuşa artıq təkcə tarixi irsimizin incisi deyil, həm də Azərbaycanın siyasi, diplomatik və informasiya mərkəzlərindən birinə çevrilib. Burada keçirilən hər bir beynəlxalq tədbir, o cümlədən IV Şuşa Qlobal Media Forumu ölkəmizin artan nüfuzunun, Prezident İlham Əliyevin uzaqgörən siyasətinin və Azərbaycanın dünya miqyasında etibarlı tərəfdaş kimi qəbul edilməsinin növbəti təsdiqidir.

Nərminə Qədirova
YAP Nərimanov rayon təşkilatının məsləhətçisi