REGİONAL SÜLH, MEDİA MİSSİYASI VƏ HƏQİQƏTİN BƏRPASI - ŞƏRH

İyulun 13-də Azərbaycanın mədəniyyət paytaxtı Şuşada “Sülhün təşviqində medianın missiyası: Həqiqətin bərpası və etimadın yenidən qurulması” mövzusunda keçirilən IV Şuşa Qlobal Media Forumu həm regional, həm də qlobal miqyasda mühüm hadisəyə çevrilmişdir. Forumda dünyanın 53 ölkəsindən 160-dan çox media nümayəndəsinin, o cümlədən nüfuzlu xəbər agentliklərinin və beynəlxalq təşkilatların rəhbərlərinin iştirakı bu platformanın beynəlxalq nüfuzunun bariz göstəricisidir. Tədbirdə iştirak edən Azərbaycan Respublikasının Prezidenti İlham Əliyev media nümayəndələrinin suallarını səmimi və ətraflı şəkildə cavablandıraraq, ölkəmizin daxili və xarici siyasətinin fundamental prinsiplərini bir daha dünya ictimaiyyətinə çatdırmışdır. Prezident İlham Əliyev öz çıxışında Şuşada belə bir mötəbər tədbirin keçirilməsinin rəmzi və praktiki əhəmiyyətini xüsusi vurğulamışdır. Forumun ideyası yalnız qlobal media çağırışlarını müzakirə etmək deyil, həm də dünya jurnalistlərinə Qarabağda və Şuşada baş verən tarixi dəyişiklikləri öz gözləri ilə görmək imkanı yaratmaqdır. Ötən dörd il ərzində bu forum 80-dən çox ölkədən 600-ə yaxın media təmsilçisini bir araya gətirərək, bölgədəki reallıqların, bərpa və yenidənqurma işlərinin dünya ictimaiyyətinə düzgün çatdırılmasında əvəzsiz rol oynamışdır. Qonaqlar ilk illərdə yalnız dağıntıları gördükləri halda, indi yeni bərpa olunan şəhərləri, müasir infrastrukturu və öz doğma yurdlarına qayıdan sakinlərin xoşbəxt həyatını müşahidə edirlər. Bu, həqiqətin bərpası və yalan təbliğatın ifşası yolunda Azərbaycanın qazandığı ən böyük uğurlardan biridir. Müasir dövrdə informasiyanın görünməmiş sürətlə yayıldığı, lakin etimadın qazanılmasının get-gedə çətinləşdiyi bir şəraitdə medianın missiyası daha da mürəkkəbləşir. Saxta xəbərlər (fake news), dezinformasiya, süni intellektin təsirləri və rəqəmsal platformaların sürətli inkişafı fonunda jurnalistlərin üzərinə böyük məsuliyyət düşür. Prezident İlham Əliyev qeyd etmişdir ki, medianın rolu yalnız məlumatlandırmaq deyil, həm də xalqlar arasında anlaşmanı qurmaq, dialoqu həvəsləndirmək və yekun nəticədə sülhə töhfə verməkdir. Azərbaycan 30 illik müharibə və işğal dövründən sonra bölgədə davamlı sülhün bərqərar olması üçün bütün zəruri addımları atır. Prezidentin vurğuladığı mühüm məqamlardan biri də odur ki, sülh beynəlxalq hüquqa əsaslanmalı və ədalətli olmalıdır. Azərbaycan öz suverenliyini bərpa etdikdən sonra hərbi əməliyyatları vaxtında dayandıraraq, müharibənin sonsuz eskalasiyasının qarşısını almışdır. Bu müdriklik və məsuliyyət Cənubi Qafqazda yeni əməkdaşlıq dövrünün əsasını qoymuşdur. Şuşa Forumu məhz bu yeni reallıqların, regional sülhün və etimad quruculuğunun qlobal səviyyədə təbliği üçün unikal və səmərəli intellektual mərkəz rolunu oynayır

Azər SÜLEYMANOV,

Yeni Azərbaycan Partiyası Nəsimi rayon təşkilatının sədri