Şuşadan verilən mesaj aydındır - Azərbaycan qlobal çağırışlara qarşı prinsipial mövqeyini qoruyur - ŞƏRH

Müasir beynəlxalq münasibətlər sistemində baş verən mürəkkəb proseslər, geosiyasi gərginliklər və qlobal çağırışlar dövlətlərin mövqeyinin daha aydın və prinsipial şəkildə ortaya qoyulmasını zəruri edir. Bu baxımdan İyulun 13-də Şuşada keçirilən“Sülhün təşviqində medianın missiyası: Həqiqətin bərpası və etimadın yenidən qurulması” mövzusunda IV Şuşa Qlobal Media Forumu yalnız regional deyil, həm də beynəlxalq əhəmiyyət daşıyan mühüm platforma kimi diqqəti cəlb edir. Forumda 53 ölkədən 160 qonağın, o cümlədən 30 xəbər agentliyinin nümayəndələrinin, 60-dan artıq media qurumunun, eləcə də bu sahədə fəaliyyət göstərən 10 beynəlxalq təşkilat və təsisatın iştirak etməsi forumun qlobal miqyasını və beynəlxalq nüfuzunu açıq şəkildə nümayiş etdirir.

Bu geniş iştirak coğrafiyası göstərir ki, Şuşada keçirilən Qlobal Media Forumu artıq yalnız regional deyil, dünya informasiya məkanında mühüm platformaya çevrilmişdir. Belə bir yüksək səviyyəli təmsilçilik forumun müzakirə etdiyi məsələlərin aktuallığını təsdiqləməklə yanaşı, Azərbaycanın beynəlxalq dialoq və əməkdaşlıq üçün etibarlı məkan olduğunu bir daha sübut edir.

Eyni zamanda, bu qədər müxtəlif media və beynəlxalq qurumların iştirakı forumun qlobal informasiya təhlükəsizliyi, media etikası və müasir çağırışlar ətrafında fikir mübadiləsi üçün əhəmiyyətli tribuna olduğunu ortaya qoyur. Bu isə Azərbaycanın informasiya diplomatiyasında artan rolunun bariz göstəricisidir. Forum çərçivəsində Azərbaycan Respublikasının Prezidenti cənab İlham Əliyevin çıxışı, xüsusilə dünyəvi müstəvidə toxunduğu məsələlər və ölkəmizin strateji mövqeyinin təqdimatı həm siyasi, həm də ideoloji baxımdan böyük əhəmiyyət kəsb edir.

Şuşa şəhərinin özü artıq simvolik məna daşıyan bir məkana çevrilmişdir. Azərbaycanın mədəni paytaxtı olmaqla yanaşı, eyni zamanda siyasi dialoq və qlobal müzakirələrin aparıldığı nüfuzlu platformaya çevrilən Şuşa bu forum vasitəsilə dünyaya yeni mesajlar ötürür. Cənab Prezident İlham Əliyevin çıxışı da məhz bu kontekstdə Azərbaycanın artan beynəlxalq nüfuzunun, müstəqil siyasət kursunun və qlobal məsələlərə obyektiv yanaşmasının göstəricisi kimi çıxış edir.

Forum zamanı dövlət başçısı beynəlxalq münasibətlər sistemində müşahidə olunan ikili standartlar, ədalətsiz yanaşmalar və bəzi güc mərkəzlərinin selektiv siyasətini açıq şəkildə tənqid edərək, Azərbaycanın daim beynəlxalq hüquqa əsaslanan mövqeyini qoruduğunu vurğulamışdır. Bu, bir daha göstərir ki, Azərbaycan yalnız regional aktor deyil, həm də qlobal müzakirələrdə öz sözünü deyən, prinsipial mövqeyi ilə seçilən bir dövlətdir.

Eyni zamanda, Prezident İlham Əliyev çıxışında informasiya müharibələrinin artdığı bir dövrdə medianın roluna da xüsusi diqqət çəkmişdir. O qeyd etmişdir ki, dezinformasiyanın geniş yayıldığı müasir dövrdə obyektiv və qərəzsiz jurnalistika beynəlxalq sabitlik üçün vacib amillərdən biridir. Bu yanaşma Azərbaycanın söz və informasiya azadlığına verdiyi önəmi, eyni zamanda qlobal informasiya təhlükəsizliyinə töhfə vermək niyyətini açıq şəkildə nümayiş etdirir.

Azərbaycanın enerji təhlükəsizliyi sahəsində oynadığı rol da forumda xüsusi vurğulanmışdır. Dövlət başçısı ölkəmizin Avropa və digər regionlar üçün etibarlı enerji tərəfdaşı olduğunu qeyd edərək, bu istiqamətdə həyata keçirilən layihələrin yalnız iqtisadi deyil, həm də siyasi sabitliyə xidmət etdiyini bildirmişdir. Bu, Azərbaycanın beynəlxalq arenada etibarlı tərəfdaş kimi mövqeyini daha da möhkəmləndirir.

Bununla yanaşı, Prezident İlham Əliyev Azərbaycanın multikultural dəyərlərə sadiqliyini və sivilizasiyalararası dialoqu dəstəklədiyini də xüsusi olaraq qeyd etmişdir. Bu siyasət Azərbaycanın müxtəlif mədəniyyətlərin və dinlərin harmoniyada yaşadığı bir ölkə kimi nüfuzunu artırmaqla yanaşı, beynəlxalq əməkdaşlıq üçün də möhkəm zəmin yaradır.

IV Şuşa Qlobal Media Forumu bir daha sübut etdi ki, Azərbaycan yalnız regionda deyil, qlobal miqyasda da söz sahibi olan bir dövlətdir. Prezident İlham Əliyevin çıxışı isə ölkəmizin strateji baxışını, milli maraqlara əsaslanan müstəqil siyasətini və beynəlxalq ədalətə söykənən mövqeyini dünyaya aydın şəkildə təqdim etdi.

Şuşadan verilən mesaj aydındır: Azərbaycan qlobal çağırışlara qarşı prinsipial mövqeyini qoruyaraq, beynəlxalq hüquqa əsaslanan ədalətli dünya nizamının tərəfdarı kimi çıxış edir. Bu mövqe isə ölkəmizin artan nüfuzunun və gələcək uğurlarının əsas təminatıdır.

David Həsənov

YAP Naxçıvan şəhər təşkilatının əməkdaşı