Qarşılıqlı etimad üzərində qurulmuş münasibətlər - ŞƏRH

İyulun 14-də Şuşa şəhəri növbəti dəfə mühüm beynəlxalq siyasi görüşə ev sahibliyi etdi. Azərbaycan Respublikasının Prezidenti İlham Əliyev və Slovakiya Respublikasının Prezidenti Peter Pelleqrini arasında keçirilən görüşdən sonra liderlərin mətbuata verdikləri bəyanatlar iki ölkə arasında münasibətlərin hazırkı vəziyyətini və gələcək inkişaf istiqamətlərini aydın şəkildə ortaya qoydu. Şuşada keçirilən bu görüş təsadüfi deyil. İşğaldan azad olunmuş şəhərin bu gün beynəlxalq səviyyəli tədbirlərin, siyasi dialoqun və dövlət başçılarının görüşlərinin keçirildiyi məkana çevrilməsi Azərbaycanın əldə etdiyi tarixi Zəfərin və həyata keçirdiyi bərpa siyasətinin mühüm nəticəsidir.
Prezident İlham Əliyev bəyanatında Azərbaycan ilə Slovakiya arasında formalaşmış dostluq münasibətlərinin qarşılıqlı etimad üzərində qurulduğunu vurğuladı. Dövlət başçısı qeyd etdi ki, ölkələr arasında siyasi dialoq ardıcıl xarakter daşıyır və müxtəlif istiqamətlərdə əməkdaşlığın genişləndirilməsi üçün əlverişli imkanlar mövcuddur. Ali səviyyəli təmasların intensivləşməsi tərəflərin münasibətləri strateji baxımdan inkişaf etdirmək niyyətindən xəbər verir.
Prezident İlham Əliyevin çıxışında xüsusi yer tutan məsələlərdən biri iqtisadi əməkdaşlığın genişləndirilməsi oldu. Dövlət başçısı bildirdi ki, mövcud iqtisadi potensialdan daha səmərəli istifadə edilməli, ticarət dövriyyəsinin artırılması, investisiya layihələrinin təşviqi və biznes dairələri arasında əlaqələrin möhkəmləndirilməsi istiqamətində konkret addımlar atılmalıdır. Bu baxımdan Azərbaycan və Slovakiya arasında iqtisadi tərəfdaşlığın yeni mərhələyə qədəm qoyması üçün əlverişli zəmin formalaşıb.
Enerji sahəsində əməkdaşlıq da bəyanatın əsas istiqamətlərindən biri idi. Prezident İlham Əliyev Azərbaycanın Avropanın enerji təhlükəsizliyində etibarlı tərəfdaş kimi oynadığı rolu diqqətə çatdıraraq ölkəmizin enerji resurslarının şaxələndirilmiş marşrutlarla Avropa bazarlarına çatdırıldığını qeyd etdi. Bu sahədə əldə olunan uğurlar Azərbaycanı qitənin enerji xəritəsində mühüm mövqeyə yüksəldib və Slovakiya ilə əməkdaşlıq üçün də yeni imkanlar açıb.
Dövlət başçısı, həmçinin işğaldan azad edilmiş ərazilərdə həyata keçirilən genişmiqyaslı bərpa və yenidənqurma işlərinə toxundu. Bildirildi ki, Qarabağ və Şərqi Zəngəzur bu gün müasir infrastrukturun qurulduğu, yaşayışın bərpa edildiyi və iqtisadi fəallığın sürətlə artdığı bölgəyə çevrilir. Şuşada keçirilən yüksək səviyyəli görüşlər və beynəlxalq tədbirlər bu torpaqlarda həyatın tam bərpa olunduğunu və Azərbaycanın suverenliyinin bütün ərazisində təmin edildiyini nümayiş etdirir.
Prezident İlham Əliyevin bəyanatında diqqət çəkən digər mühüm məqam beynəlxalq münasibətlərdə etibarlı tərəfdaşlığın əhəmiyyəti idi. Azərbaycan qarşılıqlı hörmətə, bərabərhüquqlu əməkdaşlığa və milli maraqların qorunmasına əsaslanan xarici siyasət kursunu ardıcıl şəkildə davam etdirir. Məhz bu siyasət nəticəsində ölkəmiz həm Avropa məkanında, həm də daha geniş beynəlxalq platformalarda etibarlı tərəfdaş kimi qəbul olunur.
Şuşada keçirilən Azərbaycan–Slovakiya yüksək səviyyəli görüşü bir daha təsdiqlədi ki, dövlətlər arasında qarşılıqlı etimada əsaslanan münasibətlər yeni təşəbbüslərin reallaşmasına geniş imkan yaradır. Prezident İlham Əliyevin mətbuata bəyanatında səsləndirdiyi fikirlər iki ölkə arasında əməkdaşlığın gələcək inkişafına dair aydın perspektivlər müəyyənləşdirdi və Azərbaycanın beynəlxalq əlaqələrinin uğurla inkişaf etdiyini bir daha nümayiş etdirdi.

Çingiz İbrahimov
YAP Göyçay rayon təşkilatının əməkdaşı