Slovakiya-Azərbaycan əlaqələrinin inkişafı uğurla davam edir - ŞƏRH

Azərbaycan Respublikasının Prezidenti İlham Əliyevin Slovakiya Respublikasının Prezidenti Peter Pelleqrinin Azərbaycana rəsmi səfəri çərçivəsində iyulun 14-də Şuşa şəhərində verdiyi bəyanat iki ölkə arasında münasibətlərin hazırkı inkişaf səviyyəsini və gələcək əməkdaşlıq istiqamətlərini aydın şəkildə nümayiş etdirdi. Dövlət başçısının vurğuladığı kimi, Slovakiya ilə Azərbaycan arasında siyasi dialoq müntəzəm xarakter alıb, qarşılıqlı etimada əsaslanan münasibətlər isə əməkdaşlığın bütün sahələrində yeni imkanlar yaradıb. Prezident İlham Əliyevin bəyanatında səsləndirilən fikirlər bir daha göstərir ki, Bakı ilə Bratislava arasında əlaqələr təkcə diplomatik münasibətlərlə məhdudlaşmır, eyni zamanda iqtisadi, enerji, nəqliyyat, humanitar və regional təhlükəsizlik sahələrini əhatə edən çoxşaxəli strateji tərəfdaşlığa çevrilməkdədir.
Prezident İlham Əliyev çıxışında ötən ilin sonunda Slovakiyaya etdiyi rəsmi səfəri məmnunluqla xatırlayaraq, Prezident Peter Pelleqrinə göstərilən yüksək qonaqpərvərliyə görə təşəkkürünü bildirdi. Dövlət başçısının bu fikri diplomatik etiketdən daha çox, iki ölkə rəhbərləri arasında formalaşmış qarşılıqlı etimadın və səmimi münasibətlərin göstəricisidir. Müasir beynəlxalq münasibətlər sistemində liderlər arasında şəxsi etimadın mövcudluğu dövlətlərarası əlaqələrin inkişafında mühüm rol oynayır. Məhz bu amil Azərbaycan ilə Slovakiya arasında əməkdaşlığın dinamik xarakter almasını təmin edən əsas faktorlardan biri kimi çıxış edir.
Prezident İlham Əliyevin vurğuladığı kimi, siyasi təmasların intensivliyi tərəflərin qarşılıqlı əməkdaşlığın genişləndirilməsində maraqlı olduqlarını nümayiş etdirir. Bu gün beynəlxalq münasibətlər sistemində etibarlı tərəfdaşlıq münasibətlərinin formalaşdırılması xüsusi əhəmiyyət daşıyır. Azərbaycan öz xarici siyasətində qarşılıqlı hörmət, beynəlxalq hüququn norma və prinsiplərinə sadiqlik, daxili işlərə qarışmamaq və bərabərhüquqlu əməkdaşlıq prinsiplərini əsas götürür. Slovakiya ilə münasibətlər də məhz bu prinsiplər üzərində qurulmuşdur.
Şuşada keçirilən görüşün məhz Azərbaycanın mədəniyyət paytaxtında baş tutması da xüsusi siyasi və simvolik məna daşıyır. Şuşa artıq təkcə Azərbaycanın mədəni irsinin beşiyi deyil, həm də beynəlxalq siyasi dialoq platformalarından birinə çevrilib. Son illərdə şəhərdə keçirilən beynəlxalq forumlar, yüksək səviyyəli dövlət səfərləri və diplomatik görüşlər Azərbaycanın postmünaqişə dövründə həyata keçirdiyi uğurlu quruculuq siyasətinin beynəlxalq ictimaiyyət tərəfindən yüksək qiymətləndirildiyini nümayiş etdirir. Slovakiya Prezidentinin Şuşaya səfəri də bu baxımdan xüsusi əhəmiyyət kəsb edir və Azərbaycanın ərazi bütövlüyünün, suverenliyinin və azad olunmuş ərazilərdə aparılan bərpa-quruculuq işlərinin beynəlxalq səviyyədə tanınmasının növbəti ifadəsidir.
Prezident İlham Əliyev bəyanatında nümayəndə heyətlərinin geniş tərkibinə diqqət çəkərək qeyd etdi ki, bu fakt əməkdaşlığın müxtəlif istiqamətlər üzrə inkişaf etdiyini göstərir. Həqiqətən də, iki ölkə arasında münasibətlər yalnız siyasi dialoqla məhdudlaşmır. İqtisadiyyat, energetika, sənaye, kənd təsərrüfatı, rəqəmsal inkişaf, təhsil, elm, mədəniyyət, turizm və digər sahələrdə əməkdaşlığın genişləndirilməsi üçün real imkanlar mövcuddur. Bu isə münasibətlərin uzunmüddətli və dayanıqlı inkişafına xidmət edən mühüm amildir.
Azərbaycan Avropanın enerji təhlükəsizliyinin təmin olunmasında etibarlı tərəfdaş kimi mühüm rol oynayır. Ölkəmizin təşəbbüsü ilə reallaşdırılan Cənub Qaz Dəhlizi Avropa dövlətlərinin enerji mənbələrinin şaxələndirilməsi baxımından strateji əhəmiyyət daşıyır. Slovakiya da enerji təhlükəsizliyi məsələlərində Azərbaycanın etibarlı tərəfdaş kimi rolunu yüksək qiymətləndirən dövlətlər sırasındadır. Son illərdə Avropada enerji təhlükəsizliyi məsələlərinin aktuallaşması Azərbaycan qazına olan marağı daha da artırıb. Bu baxımdan Slovakiya ilə enerji əməkdaşlığının genişləndirilməsi həm ikitərəfli münasibətlər, həm də Avropanın enerji təhlükəsizliyi baxımından mühüm perspektivlər açır.
İki ölkə arasında nəqliyyat və logistika sahəsində əməkdaşlıq da diqqətəlayiq istiqamətlərdəndir. Azərbaycanın yerləşdiyi əlverişli geostrateji mövqe onu Avropa ilə Asiyanı birləşdirən əsas nəqliyyat qovşaqlarından birinə çevirib. Orta Dəhlizin inkişafı, Bakı-Tbilisi-Qars dəmir yolu, Bakı Beynəlxalq Dəniz Ticarət Limanı və digər iri infrastruktur layihələri Avrasiyanın logistika xəritəsini dəyişdirən mühüm təşəbbüslərdir. Slovakiya kimi Avropanın mərkəzində yerləşən ölkə üçün bu marşrutlar yeni iqtisadi imkanlar yaradır və qarşılıqlı ticarət əlaqələrinin genişlənməsinə şərait formalaşdırır.
Prezident İlham Əliyevin çıxışında diqqəti cəlb edən əsas məqamlardan biri də dialoqun konkret nəticələr verməsinə yönəlmiş yanaşmadır. Dövlət başçısı xüsusi vurğuladı ki, tərəflər arasında yalnız müzakirələr deyil, eyni zamanda praktik işlər həyata keçirilir. Bu yanaşma Azərbaycanın xarici siyasət fəlsəfəsinin əsas xüsusiyyətlərindən biridir. Son illərdə Azərbaycanın müxtəlif dövlətlərlə qurduğu tərəfdaşlıq münasibətləri də məhz konkret layihələr və qarşılıqlı fayda prinsipi üzərində inkişaf edib. Slovakiya ilə münasibətlərdə də bu model özünü uğurla doğruldur.
Humanitar əməkdaşlıq münasibətlərin mühüm istiqamətlərindən biridir. Təhsil, elm, mədəniyyət və turizm sahələrində əlaqələrin genişləndirilməsi xalqlar arasında qarşılıqlı anlaşmanın və dostluğun möhkəmlənməsinə xidmət edir. Universitetlər arasında əməkdaşlıq proqramları, tələbə mübadiləsi, birgə elmi layihələr və mədəni tədbirlər gələcək nəsillər arasında əlaqələrin inkişafına mühüm töhfə verə bilər. Bu baxımdan Slovakiya ilə humanitar əlaqələrin genişləndirilməsi də ikitərəfli əməkdaşlığın perspektivli istiqamətlərindən hesab olunur.
Azərbaycanın müstəqil və balanslaşdırılmış xarici siyasəti ölkəmizin beynəlxalq nüfuzunu davamlı şəkildə artırır. Prezident İlham Əliyevin rəhbərliyi ilə həyata keçirilən xarici siyasət kursu Azərbaycanın həm Avropa İttifaqına üzv dövlətlərlə, həm də digər beynəlxalq tərəfdaşlarla qarşılıqlı hörmət və etimada əsaslanan münasibətlər qurmasına imkan verib. Slovakiya ilə əlaqələrin inkişafı da bu siyasətin uğurlu nəticələrindən biridir. Müasir geosiyasi reallıqlar fonunda belə tərəfdaşlıqlar regional sabitliyin möhkəmləndirilməsi və iqtisadi əməkdaşlığın genişləndirilməsi baxımından xüsusi əhəmiyyət daşıyır.
Şuşada səsləndirilən bəyanat bir daha göstərdi ki, Azərbaycan beynəlxalq əməkdaşlığın inkişafına açıq olan, etibarlı tərəfdaş kimi öz mövqeyini daha da möhkəmləndirən dövlətdir. Slovakiya ilə münasibətlərin yeni mərhələyə qədəm qoyması qarşılıqlı maraqlara, ortaq dəyərlərə və uzunmüddətli strateji baxışa əsaslanır. İki ölkə arasında siyasi dialoqun intensivləşməsi, iqtisadi əlaqələrin genişlənməsi və yeni layihələrin həyata keçirilməsi gələcək əməkdaşlıq üçün möhkəm zəmin yaradır.
Prezident İlham Əliyevin Şuşada verdiyi bəyanat təkcə iki ölkə arasında mövcud münasibətlərin yüksək səviyyəsini ifadə etmir, həm də gələcək əməkdaşlığın strateji yol xəritəsini müəyyənləşdirir. Dövlət başçısının qeyd etdiyi kimi, geniş gündəlik, müntəzəm siyasi təmaslar və praktiki əməkdaşlıq Azərbaycan ilə Slovakiya arasında əlaqələrin davamlı inkişaf edəcəyinə əminlik yaradır. Bu münasibətlər qarşılıqlı etimad, ortaq maraqlar və konkret nəticələrə hesablanmış fəaliyyət əsasında inkişaf edərək həm iki xalqın rifahına, həm də Avropa ilə Cənubi Qafqaz arasında əməkdaşlığın möhkəmlənməsinə mühüm töhfələr verməyə davam edəcəkdir.

Şamo Qasımov
Yeni Azərbaycan Partiyası Laçın rayon təşkilatının sədr müavini