Şuşa Qlobal Media Forumu: Azərbaycanın beynəlxalq informasiya məkanında artan rolunun göstəricisi - ŞƏRH

Prezident İlham Əliyevin IV Şuşa Qlobal Media Forumunda çıxışı Azərbaycanın beynəlxalq informasiya və kommunikasiya məkanında artan nüfuzunu bir daha nümayiş etdirdi. Dövlət başçısının qeyd etdiyi kimi, Azərbaycanda, xüsusilə Qarabağda və Şuşada dünyanın müxtəlif ölkələrindən gəlmiş mötəbər media nümayəndələrini qəbul etmək böyük şərəfdir. Bu, yalnız yüksək səviyyəli tədbirin keçirilməsi deyil, eyni zamanda Azərbaycanın yeni reallıqlarını, inkişaf modelini və beynəlxalq əməkdaşlığa açıq mövqeyini dünyaya təqdim etmək baxımından mühüm platformadır.
Şuşa Qlobal Media Forumu artıq qlobal informasiya gündəliyinin əsas müzakirə platformalarından birinə çevrilməkdədir. Dünyanın müxtəlif ölkələrindən media rəhbərlərinin, jurnalistlərin və ekspertlərin iştirakı Azərbaycanın beynəlxalq media ilə əlaqələrinin genişlənməsini, ölkənin informasiya siyasətində yeni mərhələyə qədəm qoyduğunu göstərir. Forum çərçivəsində müzakirə olunan məsələlər müasir dövrün əsas çağırışlarını – informasiya təhlükəsizliyi, süni intellekt, media transformasiyası, qlobal kommunikasiya prosesləri və yeni informasiya reallıqlarını əhatə edir.Tədbirin məhz Şuşada keçirilməsi xüsusi rəmzi məna daşıyır. Şuşa Azərbaycanın tarixi, mədəni və mənəvi simvollarından biri olmaqla yanaşı, bu gün bərpa və quruculuq proseslərinin mərkəzinə çevrilib. İşğaldan azad edilmiş ərazilərdə həyata keçirilən genişmiqyaslı yenidənqurma işləri, müasir infrastruktur layihələri və “ağıllı şəhər” konsepsiyası Azərbaycanın sülh və inkişaf gündəliyini nümayiş etdirir. Şuşanın beynəlxalq tədbirlərə ev sahibliyi etməsi isə şəhərin yenidən qlobal mədəni və diplomatik məkana çevrildiyini göstərir.
Prezident İlham Əliyevin forumda səsləndirdiyi fikirlər Azərbaycanın dünya ictimaiyyətinə öz mövqeyini birbaşa çatdırmaq imkanlarının genişləndiyini göstərir. Müasir dövrdə informasiya məkanında obyektiv və operativ məlumatın əhəmiyyəti artdığı bir vaxtda belə platformalar ölkələrin öz həqiqətlərini beynəlxalq auditoriyaya çatdırması üçün mühüm əhəmiyyət daşıyır. Azərbaycan da bu imkanlardan istifadə edərək regionda gedən proseslər, sülh təşəbbüsləri və gələcək inkişaf perspektivləri barədə beynəlxalq ictimaiyyəti məlumatlandırır.
IV Şuşa Qlobal Media Forumu Azərbaycanın yeni geosiyasi reallıqlar fonunda artan rolunun daha bir göstəricisidir. Ölkənin regional liderliyi, beynəlxalq tərəfdaşlarla əməkdaşlığı və qlobal məsələlər üzrə fəal mövqeyi belə tədbirlərin əhəmiyyətini daha da artırır. Şuşada keçirilən bu forum Azərbaycanın yalnız mühüm siyasi və iqtisadi layihələrə deyil, eyni zamanda qlobal informasiya dialoquna da töhfə verdiyini nümayiş etdirir.IV Şuşa Qlobal Media Forumu Azərbaycanın beynəlxalq media ictimaiyyəti ilə əlaqələrinin inkişafında, ölkənin həqiqətlərinin dünya auditoriyasına çatdırılmasında və Şuşanın qlobal tədbirlər məkanı kimi mövqeyinin möhkəmləndirilməsində mühüm rol oynayır. Bu forum Azərbaycanın açıq dialoqa, əməkdaşlığa və informasiya mübadiləsinə əsaslanan siyasətinin növbəti uğurlu nümunəsidir.

Anar Əhmədov

YAP Kəlbəcər rayon təşkilatının məsləhətçisi