Milli Mətbuat – İctimai etimadın ünvanı - ŞƏRH

22 iyul tarixində Azərbaycanda Milli Mətbuat Günü qeyd olunur. Bu əlamətdar gün 1875-ci ildə görkəmli maarifçi Həsən bəy Zərdabinin nəşr etdirdiyi "Əkinçi" qəzeti ilə əsası qoyulan Azərbaycan milli mətbuatının yaranmasının ildönümüdür. "Əkinçi" qəzeti yalnız ilk milli mətbuat orqanı kimi deyil, həm də xalqın maariflənməsinə, milli şüurun formalaşmasına və ictimai fikrin inkişafına xidmət edən mühüm bir məktəb kimi tarixə düşmüşdür. Məhz həmin gündən etibarən Azərbaycan mətbuatı cəmiyyətin inkişafında fəal iştirak edərək ölkənin ictimai-siyasi həyatının ayrılmaz hissəsinə çevrilmişdir.

Tarix boyu Azərbaycan mətbuatı müxtəlif dövrlərdə üzləşdiyi çətinliklərə baxmayaraq, öz əsas missiyasına sadiq qalaraq həqiqətin, maarifçiliyin və milli dəyərlərin təbliği istiqamətində mühüm fəaliyyət göstərmişdir. Milli mətbuat cəmiyyətin məlumatlandırılması ilə yanaşı, insanların ictimai proseslərdə fəal iştirakına, milli birlik və həmrəyliyin möhkəmlənməsinə, dövlətçilik ənənələrinin qorunmasına mühüm töhfələr vermişdir. Mətbuat hər zaman cəmiyyətin aynası olmuş, baş verən hadisələri obyektiv şəkildə işıqlandırmaqla ictimai rəyin formalaşmasına təsir göstərmişdir.

Müasir dövrdə informasiya ən dəyərli resurslardan birinə çevrilmişdir. İnformasiya texnologiyalarının sürətlə inkişaf etdiyi bir şəraitdə peşəkar və məsuliyyətli medianın rolu daha da artmışdır. Operativliklə yanaşı, xəbərin dəqiqliyi, obyektivliyi və etibarlılığı cəmiyyət üçün xüsusi əhəmiyyət kəsb edir. Bu baxımdan, milli mətbuat yalnız informasiya yayan vasitə deyil, həm də dövlətlə vətəndaş arasında etibarlı əlaqə yaradan, ictimai etimadı möhkəmləndirən mühüm platformadır.

Azərbaycan dövləti milli mətbuatın inkişafını daim diqqətdə saxlayır. Son illər media sahəsində həyata keçirilən islahatlar, jurnalistikanın müasir çağırışlara uyğun inkişafı, rəqəmsal medianın imkanlarının genişlənməsi və informasiya təhlükəsizliyinin gücləndirilməsi bu sahəyə göstərilən dövlət qayğısının bariz nümunəsidir. Sağlam informasiya mühitinin formalaşdırılması həm dövlət idarəçiliyinin səmərəliliyinə, həm də vətəndaşların düzgün məlumatlandırılmasına xidmət edir.

Azərbaycan mediası xüsusilə Vətən müharibəsi dövründə informasiya cəbhəsində üzərinə düşən məsuliyyəti uğurla yerinə yetirdi. Jurnalistlər hadisələri operativ şəkildə işıqlandırmaqla yanaşı, ölkəmizin haqlı mövqeyinin beynəlxalq ictimaiyyətə çatdırılmasına, dezinformasiyaya qarşı mübarizəyə və milli həmrəyliyin möhkəmləndirilməsinə mühüm töhfə verdilər. Müharibədən sonrakı dövrdə isə işğaldan azad olunmuş ərazilərdə həyata keçirilən genişmiqyaslı bərpa və yenidənqurma işləri, infrastruktur layihələri və Böyük Qayıdış proqramı barədə ictimaiyyətin dolğun məlumatlandırılması medianın əsas fəaliyyət istiqamətlərindən birinə çevrilmişdir.

Bu gün dövlət qurumları ilə media arasında səmərəli əməkdaşlıq cəmiyyətin düzgün məlumatlandırılmasının vacib şərtlərindən hesab olunur. Açıq informasiya siyasəti dövlət qurumlarının fəaliyyətinə ictimai etimadı artırır, şəffaflığın təmin olunmasına və vətəndaşlarla sağlam kommunikasiyanın qurulmasına xidmət edir.

Bu baxımdan, Azərbaycan Dövlət Su Ehtiyatları Agentliyi də media ilə qarşılıqlı etimada əsaslanan əməkdaşlığa xüsusi önəm verir. Agentlik ölkənin su ehtiyatlarının səmərəli idarə olunması, içməli su təchizatı və kanalizasiya sistemlərinin inkişafı, meliorasiya və irriqasiya layihələrinin icrası, su infrastrukturunun müasirləşdirilməsi, daşqınlardan mühafizə tədbirləri və həyata keçirilən digər strateji layihələr barədə ictimaiyyətin operativ və dolğun məlumatlandırılmasını daim diqqətdə saxlayır. Kütləvi informasiya vasitələri ilə qurulan açıq əməkdaşlıq həyata keçirilən layihələrin mahiyyətinin cəmiyyətə çatdırılmasına, vətəndaşların məlumatlandırılmasına və dövlətlə ictimaiyyət arasında etibarlı informasiya mühitinin formalaşmasına mühüm töhfə verir.

Milli mətbuatın inkişafı Azərbaycanın davamlı inkişafı, dövlətçiliyin möhkəmləndirilməsi və cəmiyyətin informasiya təhlükəsizliyinin təmin olunması baxımından mühüm əhəmiyyət daşıyır. Peşəkarlıq, obyektivlik və milli maraqlara sadiqlik prinsiplərinə əsaslanan Azərbaycan mediası bundan sonra da dövlətimizin inkişafına, cəmiyyətimizin maariflənməsinə və milli həmrəyliyin güclənməsinə öz töhfəsini verməyə davam edəcəkdir.

22 İyul – Milli Mətbuat Günü münasibətilə ölkəmizin bütün media nümayəndələrini, jurnalistləri və söz adamlarını səmimi-qəlbdən təbrik edir, onlara möhkəm cansağlığı, peşə fəaliyyətlərində uğurlar, yeni yaradıcılıq nailiyyətləri və həqiqətə xidmət yolunda davamlı müvəffəqiyyətlər arzulayırıq.

Çinarə Nəbiyeva

YAP Yasamal rayon “Moskva pr. 67” ünvanı (ADSEA) üzrə ərazi partiya təşkilatının fəal üzvü