Azərbaycan–Almaniya münasibətlərində yeni strateji mərhələ: əməkdaşlığın üfüqləri genişlənir - ŞƏRH

Azərbaycanın xarici siyasət kursunda Avropanın aparıcı dövlətləri ilə qarşılıqlı hörmət, etibarlı tərəfdaşlıq və milli maraqlara əsaslanan əlaqələrin inkişafı xüsusi yer tutur. Bu istiqamətdə Almaniya ilə münasibətlər son illərdə keyfiyyətcə yeni mərhələyə yüksələrək siyasi dialoqdan iqtisadi əməkdaşlığa, enerji təhlükəsizliyindən regional sabitliyə qədər geniş sahələri əhatə edən strateji xarakter alıb.

İki ölkə arasında formalaşmış münasibətlərin əsas xüsusiyyəti qarşılıqlı etimadın möhkəmlənməsi və müntəzəm siyasi dialoqun davamlı xarakter daşımasıdır. Dövlət başçılarının qarşılıqlı səfərləri, yüksək səviyyəli görüşlər və parlamentlərarası əlaqələrin genişlənməsi əməkdaşlığın institusional əsaslarını daha da gücləndirib. Bu dinamika Azərbaycan ilə Almaniyanın təkcə ikitərəfli münasibətlərində deyil, beynəlxalq platformalarda da ortaq maraqlar çərçivəsində daha sıx əməkdaşlıq etməsinə şərait yaradıb.
Prezident İlham Əliyevin Almaniyaya rəsmi səfəri çərçivəsində Almaniya Prezidenti Frank-Valter Ştaynmayer və Federal Kansler Fridrix Mertslə keçirdiyi görüşlər münasibətlərin gələcək inkişaf istiqamətlərini müəyyən edən mühüm siyasi hadisələrdən biri kimi qiymətləndirilə bilər. Danışıqlarda siyasi dialoqun dərinləşdirilməsi, iqtisadi əlaqələrin genişləndirilməsi, enerji təhlükəsizliyi, nəqliyyat-kommunikasiya layihələri və regional sabitlik kimi məsələlər əsas müzakirə mövzularını təşkil edib.
Görüşlər zamanı vurğulanan əsas məqamlardan biri Azərbaycanın və Almaniyanın öz regionlarında sabitlik yaradan, iqtisadi inkişafı təmin edən və beynəlxalq əməkdaşlığa töhfə verən dövlətlər olması idi. Xüsusilə Cənubi Qafqazda sülh prosesinin irəliləməsi və Azərbaycan ilə Ermənistan arasında əldə olunan nəticələrin regionda yeni əməkdaşlıq imkanları yaratdığı qeyd edildi. Bu proseslərin Avropa üçün də mühüm əhəmiyyət daşıdığı Almaniya rəhbərliyi tərəfindən xüsusi vurğulandı.
Enerji sahəsində tərəfdaşlıq isə münasibətlərin ən vacib istiqamətlərindən biri olaraq qalır. Azərbaycanın Avropanın enerji təhlükəsizliyində artan rolu Almaniya tərəfindən yüksək qiymətləndirilir. Xəzər hövzəsinin enerji ehtiyatlarının Avropa bazarlarına təhlükəsiz şəkildə çatdırılmasında Azərbaycanın etibarlı tərəfdaş kimi mövqeyi son illər daha da möhkəmlənib. Bununla yanaşı, ölkəmizin yaşıl enerji istehsalı və ixracı sahəsində həyata keçirdiyi layihələr Almaniyanın enerji keçidi strategiyası ilə də uzlaşır və gələcək əməkdaşlıq üçün geniş perspektivlər yaradır.
Nəqliyyat və logistika sahəsində də Azərbaycan strateji əhəmiyyətini artırmaqda davam edir. Orta Dəhlizin inkişafı, Mərkəzi Asiya ilə Avropa arasında yeni bağlantıların yaradılması və ölkəmizin mühüm tranzit mərkəzinə çevrilməsi Almaniya üçün də xüsusi maraq doğurur. Bu baxımdan, Azərbaycan Avropa ilə Asiyanı birləşdirən etibarlı logistika qovşağı kimi öz mövqeyini daha da gücləndirir.
İqtisadi əməkdaşlığın genişləndirilməsi də danışıqların əsas istiqamətlərindən biri olub. Azərbaycanda fəaliyyət göstərən çoxsaylı alman şirkətləri ölkədə yaradılmış əlverişli investisiya mühitindən faydalanaraq müxtəlif sahələrdə uğurla fəaliyyət göstərirlər. Yeni investisiya imkanlarının açılması, sənaye, rəqəmsal iqtisadiyyat, innovasiya və yüksək texnologiyalar üzrə əməkdaşlığın genişləndirilməsi hər iki ölkənin biznes dairələri üçün əlavə perspektivlər formalaşdırır.
Səfər zamanı imzalanan sənədlər isə münasibətlərin hüquqi bazasını daha da möhkəmləndirdi. Xüsusilə "Azərbaycan Respublikası ilə Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə" əməkdaşlığın uzunmüddətli istiqamətlərini müəyyən edən mühüm siyasi sənəd kimi çıxış edir. Bu sənəd siyasi dialoqdan iqtisadi əməkdaşlığa, təhlükəsizlikdən humanitar əlaqələrə qədər müxtəlif istiqamətlər üzrə konkret fəaliyyət mexanizmlərinin formalaşdırılmasına imkan yaradır.
Bununla yanaşı, Azərbaycan–Almaniya Biznes Şurasının yaradılması iqtisadi əlaqələrin daha sistemli inkişafına xidmət edəcək. Yeni platforma sahibkarlar arasında birbaşa əməkdaşlığı genişləndirəcək, investisiya layihələrinin həyata keçirilməsini sürətləndirəcək və qarşılıqlı ticarət dövriyyəsinin artmasına əlavə stimul verəcək.
Azərbaycan–Avropa İttifaqı münasibətlərinin inkişafı baxımından da Almaniyanın dəstəyi mühüm əhəmiyyət daşıyır. Avropanın aparıcı iqtisadi və siyasi gücü olan Almaniyanın ölkəmizlə strateji tərəfdaşlığın möhkəmləndirilməsinə verdiyi önəm Azərbaycan ilə Avropa İttifaqı arasında əməkdaşlığın yeni mərhələyə keçməsinə töhfə verə bilər.
Bütövlükdə, Prezident İlham Əliyevin Almaniyaya rəsmi səfəri və keçirilən yüksək səviyyəli görüşlər göstərir ki, Azərbaycan–Almaniya münasibətləri artıq ənənəvi əməkdaşlıq çərçivəsini geridə qoyaraq strateji tərəfdaşlıq mərhələsinə daxil olur. Qarşılıqlı siyasi iradə, iqtisadi maraqların üst-üstə düşməsi və regional sabitliyə verilən ortaq töhfələr gələcək illərdə bu münasibətlərin daha da dərinləşəcəyini və hər iki ölkə üçün yeni imkanlar yaradacağını deməyə əsas verir.

İsa Məmmədov
YAP Babək rayon təşkilatının sədri