Berlin səfəri- etibarlı tərəfdaşlığın və strateji əməkdaşlığın yeni üfüqləri - ŞƏRH

Azərbaycan Respublikasının Prezidenti İlham Əliyevin 21 iyul 2026-cı il tarixində Almaniya Federativ Respublikasına rəsmi səfəri ölkəmizin müstəqil xarici siyasət strategiyasının uğurlu nəticələrini bir daha nümayiş etdirdi. Dünyanın aparıcı iqtisadi və siyasi güclərindən biri olan Almaniyaya həyata keçirilən bu səfər ikitərəfli münasibətlərin inkişafına yeni impuls verməklə yanaşı, Azərbaycanın Avropa ilə əməkdaşlıq siyasətində növbəti mühüm mərhələnin əsasını qoydu.
Prezident İlham Əliyevin səfər çərçivəsində verdiyi bəyanatda səsləndirdiyi fikirlər göstərdi ki, Azərbaycan və Almaniya arasında əlaqələr yalnız diplomatik münasibətlərlə məhdudlaşmır. İki ölkəni qarşılıqlı hörmətə, etimada, praqmatik əməkdaşlığa və ortaq maraqlara söykənən geniş tərəfdaşlıq əlaqələri birləşdirir. Bu münasibətlər siyasi dialoqdan iqtisadi əməkdaşlığa, enerji təhlükəsizliyindən yaşıl keçidə, elm və təhsildən innovasiya və rəqəmsal texnologiyalara qədər müxtəlif istiqamətləri əhatə edir.
Son illərdə Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində Azərbaycan regionun aparıcı siyasi və iqtisadi mərkəzlərindən birinə çevrilib. Güclü iqtisadi potensial, sabit siyasi mühit, əlverişli investisiya iqlimi və beynəlxalq öhdəliklərə sadiqlik ölkəmizi Avropa dövlətləri üçün etibarlı tərəfdaş kimi ön plana çıxarıb. Almaniya ilə münasibətlərin dinamik inkişafı da məhz bu etimadın real ifadəsidir.
Bu gün Avropanın qarşısında duran əsas məsələlərdən biri enerji təhlükəsizliyidir. Qlobal enerji bazarında baş verən dəyişikliklər fonunda etibarlı tərəfdaşlara olan ehtiyac daha da artıb. Azərbaycan isə özünü sözün əsl mənasında etibarlı enerji tərəfdaşı kimi təsdiqləyib. Prezident İlham Əliyevin bəyanatında da vurğulandığı kimi, ölkəmiz Avropanın enerji təhlükəsizliyinə mühüm töhfələr verir və bu istiqamətdə əməkdaşlığın genişləndirilməsi üçün böyük potensial mövcuddur.
Azərbaycanın təşəbbüsü və iştirakı ilə reallaşdırılan beynəlxalq enerji layihələri, xüsusilə Cənub Qaz Dəhlizi Avropanın enerji təminatında mühüm rol oynayır. Bununla yanaşı, ölkəmiz artıq yaşıl enerji sahəsində də iddialı hədəflər müəyyənləşdirib. Qarabağ və Şərqi Zəngəzur iqtisadi rayonlarında həyata keçirilən "yaşıl enerji zonası" layihələri, bərpaolunan enerji istehsalının artırılması və xarici investorların bu sahəyə cəlb olunması Azərbaycanın gələcəyə hesablanmış inkişaf modelini nümayiş etdirir. Almaniyanın bu sahədəki zəngin təcrübəsi əməkdaşlıq üçün yeni imkanlar yaradır.
Səfər zamanı iqtisadi əməkdaşlığın genişləndirilməsi də əsas müzakirə mövzularından biri oldu. Almaniyanın sənaye, maşınqayırma, yüksək texnologiyalar və rəqəmsal inkişaf sahəsində qazandığı uğurlar Azərbaycan üçün yeni əməkdaşlıq perspektivləri açır. Eyni zamanda, Azərbaycanın nəqliyyat-logistika imkanları, Orta Dəhlizdə oynadığı mühüm rol və Avrasiya məkanında formalaşdırdığı tranzit infrastrukturu Almaniya üçün də strateji əhəmiyyət daşıyır.
Prezident İlham Əliyev bəyanatında regionda davamlı sülhün və təhlükəsizliyin təmin edilməsinin vacibliyini də xüsusi qeyd etdi. Azərbaycanın postmünaqişə dövründə nümayiş etdirdiyi konstruktiv mövqe, sülh gündəliyinə sadiqliyi və beynəlxalq hüququn norma və prinsiplərinə əsaslanan siyasəti ölkəmizin məsuliyyətli dövlət olduğunu bir daha sübut edir. Bu yanaşma beynəlxalq ictimaiyyət tərəfindən də yüksək qiymətləndirilir.
Azərbaycanın beynəlxalq nüfuzunun yüksəlməsi təsadüfi deyil. Son illərdə ölkəmiz qlobal siyasi və iqtisadi gündəliyin formalaşmasına töhfə verən, beynəlxalq tədbirlərə uğurla ev sahibliyi edən, etibarlı tərəfdaş kimi qəbul olunan dövlətə çevrilib. Prezident İlham Əliyevin həyata keçirdiyi uğurlu xarici siyasət kursu Azərbaycanın milli maraqlarını qətiyyətlə müdafiə etməklə yanaşı, beynəlxalq əməkdaşlığın genişlənməsinə də xidmət edir.
Berlinə rəsmi səfər və bu səfər zamanı verilən mesajlar göstərdi ki, Azərbaycan–Almaniya münasibətləri perspektiv baxımından böyük potensiala malikdir. Qarşılıqlı hörmət, etimad və ortaq maraqlara əsaslanan bu əlaqələr gələcəkdə daha da inkişaf edəcək, iqtisadi əməkdaşlıq genişlənəcək, siyasi dialoq möhkəmlənəcək və iki ölkə arasında strateji tərəfdaşlıq daha da dərinləşəcək.
Prezident İlham Əliyevin Almaniyaya rəsmi səfəri bir daha sübut etdi ki, Azərbaycanın müstəqil, milli maraqlara söykənən xarici siyasəti ölkəmizin beynəlxalq mövqeyini gündən-günə gücləndirir.

Lalə İskəndərova,
YAP Qusar rayon təşkilatının məsləhətçisi