YAP Masallı rayon təşkilatı Türkoba kəndində partiya fəalları ilə görüş keçirib - FOTO

27 iyul 2026-cı il tarixdə Yeni Azərbaycan Partiyası (YAP) Masallı rayon təşkilatı “Partiya fəalları” layihəsi çərçivəsində Türkoba ərazi partiya təşkilatında fəallarla görüş keçirib.

Görüş Ulu Öndər Heydər Əliyevin və ölkəmizin ərazi bütövlüyü uğrunda canlarından keçmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
YAP Masallı rayon təşkilatının sədri Seyfəddin Əliyev keçirilən görüşdə Ümummilli Lider Heydər Əliyevin dövlətçiliyimizin təməllərinin atılması və ölkənin tərəqqisi naminə göstərdiyi misilsiz fəaliyyətdən danışıb. O, dahi şəxsiyyətin siyasi irsinin hazırda ölkə rəhbəri İlham Əliyev tərəfindən müasir dövrün tələblərinə uyğun olaraq yeni mərhələdə böyük uğurla icra olunduğunu diqqətə çatdırıb.
Seyfəddin Əliyev qeyd edib ki, müasir Azərbaycan dövlətinin möhkəm təməllər üzərində ucalması, milli intibah və iqtisadi müstəqillik məhz Ulu Öndərin uzaqgörən daxili və xarici siyasətinin məntiqi nəticəsidir. Zaman fərqi qoymadan hər bir dövrün qlobal çağırışlarına cavab verən bu zəngin irs, bu gün dövlətimizin milli maraqlarının qorunmasında və beynəlxalq arenada nüfuzunun artmasında ən etibarlı rəhbər rolunu oynayır. Məhz bu uğurlu və sarsılmaz siyasi varislik sayəsində Azərbaycan, həm iqtisadi potensialına, həm də çoxşaxəli diplomatik uğurlarına görə regionun şəksiz lider dövlətinə çevrilmişdir.
Sədr xüsusi vurğulayıb ki, Ümummilli Liderin ən böyük arzusu olan torpaqlarımızın işğaldan azad edilməsi və ərazi bütövlüyümüzün tam bərpası Müzəffər Ali Baş Komandan İlham Əliyevin dəmir iradəsi, qətiyyəti və rəşadətli Azərbaycan Ordusunun qəhrəmanlığı sayəsində reallığa çevrilmişdir. Qazanılan tarixi zəfərlər, həmçinin işğaldan azad olunmuş ərazilərdə bu gün böyük sürətlə aparılan nəhəng quruculuq, abadlıq və "Böyük Qayıdış" layihələri Heydər Əliyev ideyalarının və strateji kursunun ölkəmizdə nə dərəcədə əzmlə reallaşdırıldığının bariz sübutudur. Müasir dövrün mürəkkəb geosiyasi şəraitində Azərbaycanın atdığı hər bir uğurlu addım Ulu Öndərin müəyyənləşdirdiyi inkişaf modelinin alternativsizliyini göstərir.
Çıxışının sonunda Seyfəddin Əliyev partiya fəallarını, xüsusilə də gəncləri Ümummilli Lider Heydər Əliyevin zəngin dövlətçilik məktəbini hər zaman dərindən öyrənməyə və yaşatmağa çağırıb. Sədr qətiyyətlə bildirib ki, Yeni Azərbaycan Partiyasının hər bir üzvü ölkə rəhbərinin rəhbərliyi ilə həyata keçirilən genişmiqyaslı islahatlara öz əməli töhfəsini verməli, dövlətimizin daha da qüdrətlənməsi və gələcək tərəqqisi naminə Prezident İlham Əliyevin ətrafında monolit bir qüvvə kimi sıx birləşməlidir. Çünki qazanılan hər bir möhtəşəm uğur Heydər Əliyev dühasının ölməzliyini və bu uzaqgörən siyasi xəttin dövlətimizin əbədi müstəqillik qarantı olduğunu təsdiq edir.
Sonra Türkoba ərazi partiya təşkilatının sədri Leyla Əzizova, partiya fəallarından Əfqan İbrahimov, Qəzənfər Fəttayev və başqaları çıxış edərək ölkəmizin keçdiyi möhtəşəm inkişaf yoluna nəzər salıblar. Natiqlər Ulu Öndər Heydər Əliyevin əsasını qoyduğu siyasi kursun Prezident İlham Əliyev tərəfindən qətiyyətlə yürüdülməsi nəticəsində Azərbaycanın böyük tərəqqi mərhələsinə qədəm qoyduğunu vurğulayıblar.